សៀមរាបៈ រដ្ឋាករទឹកស្វយ័តសៀមរាប និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំប្រទេសកម្ពុជា ចុះហត្ថលេខាអនុវត្ត «គម្រោងលើកកម្ពស់សេវាទឹកស្អាត និងអនាម័យដើម្បីទប់ស្កាត់ជំងឺកូវីដ ១៩» ខេត្តសៀមរាប ក្រោមជំនួយបច្ចេកទេសរបស់ប្រទេសជប៉ុនដែលប្រជាជនប្រមាណ ៩៣ ៤២៦ នាក់ នឹងទទួលបានអត្ថប្រយោជន៍ពីគម្រោងនេះ។
ការចុះហត្ថលេខានេះធ្វើឡើងរវាងលោក ឃុត វុត្យារិទ្ធ អគ្គនាយករដ្ឋាករទឹកស្វយ័តសៀមរាប និងលោកស្រីកាមេយ ហារូកុ ប្រធានតំណាងការិយាល័យ JICA ប្រចាំប្រទេសកម្ពុជានៅថ្ងៃទី ១១ តុលា នៅការិយាល័យ JICA ប្រចាំប្រទេសកម្ពុជា។ គម្រោងនេះមានគោលបំណងលើកកម្ពស់វិធានការបង្ការជំងឺកូវីដ ១៩ តាមរយៈការពង្រីកសេវាកម្មផ្គត់ផ្គង់ទឹកស្អាត ប្រកបដោយសុវត្ថិភាព ចីរភាព និងលើកកម្ពស់នូវការអនុវត្តការលាងសម្អាតដៃឱ្យកាន់តែប្រសើរឡើង។
គម្រោងនឹងផ្តល់នូវសម្ភារចាំបាច់មានដូចជា ឧស្ម័នក្ល័រ និងកំបោរ ដើម្បីធានាគុណភាពទឹកឱ្យស្របតាមស្តង់ដាគុណភាពទឹកផឹកថ្នាក់ជាតិ។ ផ្តល់នូវនាឡិកាទឹក បំពង់ទឹក និងសម្ភារតំណព្រមទាំងឧបករណ៍ផ្សេងៗដល់រដ្ឋាករទឹកស្វយ័តសៀមរាប ដើម្បីធ្វើការពង្រីកសេវាទឹកស្អាតដល់តំបន់ដែលមិនទាន់មានការផ្គត់ផ្គង់ទឹកក្នុងសង្កាត់ស្លក្រាម និងសង្កាត់សាលាកំរើក ក្រុងសៀមរាប។
តាមរយៈគម្រោងនេះក៏អនុវត្តសកម្មភាពលើកកម្ពស់ការយល់ដឹងដល់ប្រជាពលរដ្ឋនៅក្រុងសៀមរាប ស្តីអំពីសារៈសំខាន់នៃទឹកស្អាត និងទម្លាប់នៃការលាងសម្អាតដៃដើម្បីការពារជំងឺកូវីដ ១៩។ គម្រោងនេះគឺជាផ្នែកមួយនៃការគាំទ្រក្នុងគ្រាអាសន្នពីរដ្ឋាភិបាលប្រទេសជប៉ុន ដើម្បីឆ្លើយតបទៅនឹងសំណើផ្លូវការរបស់រាជរដ្ឋាភិបាលកម្ពុជា ដែលនឹងត្រូវបញ្ចប់ នៅចុងខែកក្កដា ឆ្នាំ ២០២២។
JICA ថ្លែងក្នុងសេចក្តីប្រកាសព័ត៌មាននៅថ្ងៃទី ១១ តុលា ថា៖ «យើងរំពឹងថាប្រជាពលរដ្ឋដែលរស់នៅក្នុងតំបន់គ្របដណ្តប់របស់គម្រោងខាងលើ និងតំបន់ដែលស្ថិតក្នុងការផ្គត់ផ្គង់របស់រដ្ឋាករទឹកស្វយ័តសៀមរាបប្រមាណ ៩៣ ៤២៦ នាក់នឹងទទួលបានអត្ថប្រយោជន៍»។
JICA បញ្ជាក់ថា ការគាំទ្រនេះក៏នឹងរួមចំណែកដល់រដ្ឋាករទឹកស្វយ័តសៀមរាបក្នុងការទ្រទ្រង់ប្រតិបត្តិការផ្គត់ផ្គង់ទឹករបស់ខ្លួនក្នុងគ្រា ដែលរដ្ឋាករទឹកស្វយ័តសៀមរាបកំពុងតែជួបការលំបាកជាច្រើន ដោយសារការរាតត្បាតនៃជំងឺកូវីដ ១៩។ ក្នុងវិស័យទឹកស្អាត និងអនាម័យ JICA គឺជាដៃគូអភិវឌ្ឍន៍ក្នុងការកសាងហេដ្ឋារចនាសម្ព័ន្ធ ទាំងផ្នែករឹង និងផ្នែកទន់។
មកដល់បច្ចុប្បន្ន គម្រោងសហប្រតិបត្តិការបច្ចេកទេសជាច្រើនត្រូវបានអនុវត្តជាមួយក្រសួងឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍ រួមទាំងរដ្ឋាករទឹកតាមបណ្តាខេត្តនានា រដ្ឋាករទឹកស្វយ័តក្រុងភ្នំពេញ និងរដ្ឋាករទឹកស្វយ័តសៀមរាប។
រោងចក្រប្រព្រឹត្តិកម្មទឹកស្អាតជាច្រើនត្រូវបានសាងសង់នៅតាមបណ្តាខេត្តជាច្រើននៃប្រទេសកម្ពុជា ដោយជំនួយឥតសំណងរបស់ប្រទេសជប៉ុន។ នៅខេត្តសៀមរាប JICA បានផ្តល់ជំនួយឥតសំណង ដើម្បីសាងសង់រោងចក្រប្រព្រឹត្តិកម្មទឹកស្អាត ដែលមានសមត្ថភាពចំនួន ៨ ០០០ ម៉ែត្រត្រីគុណក្នុង ១ ថ្ងៃ និងដំឡើងបំពង់ប្រវែង ៣៦ គីឡូម៉ែត្រ ក្នុងឆ្នាំ ២០០៦។
បច្ចុប្បន្ន JICA កំពុងផ្តល់ហិរញ្ញប្បទានដល់រដ្ឋាករទឹកស្វយ័តសៀមរាប ដើម្បីពង្រីកប្រព័ន្ធផ្គត់ផ្គង់ ទឹកស្អាត តាមរយៈការសាងសង់រោងចក្រប្រព្រឹត្តិកម្មទឹកស្អាត ដែលមានសមត្ថភាព ៦០ ០០០ ម៉ែត្រត្រីគុណ ក្នុង ១ ថ្ងៃ និងដំឡើងបំពង់មេ និងបំពង់ចែកចាយទឹកស្អាត ប្រវែងប្រហែល ២៧០ គីឡូម៉ែត្រ។
JICA បញ្ជាក់ក្នុងសេចក្តីប្រកាសថា៖ «គម្រោងនេះឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលកម្ពុជា និងរាជរដ្ឋាភិបាលជប៉ុនក្នុងការពង្រីកកិច្ចសហប្រតិបត្តិការរួមឱ្យកាន់តែស៊ីជម្រៅ និងទូលំទូលាយជាងមុន ជាពិសេសក្នុងគ្រាជួបការលំបាក»៕