ភ្នំពេញៈ គណៈកម្មាធិការជាតិរៀបចំការបោះឆ្នោត (គជប) បង្ហាញលទ្ធផលបណ្តោះអាសន្នថ្ងៃទី ១ (គឺថ្ងៃ ១២ តុលា)នៃការចុះឈ្មោះបោះឆ្នោតថ្មីឆ្នាំ ២០២១ នៅទូទាំងប្រទេសមានចំនួន ១០ ៧៦៩ នាក់ ខណៈអ្នកដែលត្រូវលុបឈ្មោះចេញពីបញ្ជីបោះឆ្នោត មានចំនួន ៣ ២១០ នាក់។
តាមសេចក្តីប្រកាសព័ត៌មានរបស់ គ.ជ.ប កាលពីថ្ងៃទី ១៣ ខែតុលា ឱ្យដឹងថា ដោយឡែកសម្រាប់អ្នកដែលបានកែតម្រូវទិន្នន័យមានចំនួន ២ ១២៧ នាក់ និងអ្នកដែលបានផ្ទេរលំនៅចូលក្នុងឃុំ សង្កាត់ថ្មី មានចំនួន ២ ៦៣៣ នាក់។
លោក សោម សូរីដា អ្នកនាំពាក្យ គ.ជ.ប ប្រាប់ ភ្នំពេញ ប៉ុស្តិ៍ នៅថ្ងៃទី ១៤ តុលាថា ដំណើរការនៃការចុះឈ្មោះអ្នកបោះឆ្នោតថ្មី និងការពិនិត្យបញ្ជីឈ្មោះក្នុងរយៈពេល ១ ថ្ងៃ (គឺថ្ងៃ ១២ តុលា) នៅទូទាំង ១ ៦៤៦ ឃុំសង្កាត់ គឺមានស្ថានភាពល្អប្រសើរ និងប្រព្រឹត្តទៅដោយរលូន។
ទោះជាយ៉ាងណា លោកថា នៅក្នុងដំណើរការនៃការចុះឈ្មោះអ្នកបោះឆ្នោតថ្មី និងពិនិត្យបញ្ជីបោះឆ្នោត ក៏បានជួបញ្ហាប្រឈមមួយចំនួនដូចជា មានភ្លៀងធ្លាក់ច្រើន និងបញ្ហាជំងឺកូវីដ ១៩ ដែលធ្វើឱ្យចលនារបស់ប្រជាពលរដ្ឋដែលមកចុះឈ្មោះ និងពិនិត្យបញ្ជីឈ្មោះបោះឆ្នោតមិនសូវមានច្រើនកុះករនោះទេ។ ប៉ុន្តែ វាក៏មានភាពអំណោយផលដល់ដំណើរការនៃការចុះឈ្មោះបោះឆ្នោតផងដែរ។
បើតាម លោក សោម សូរីដា តួលេខដែលសម្រេចបានប្រមាណ ជាង ១ ម៉ឺននាក់ក្នុង ១ ថ្ងៃនេះ គឺអាចទទួលយកបាន ព្រោះវាស្ថិតនៅក្នុងពេលមានការរាតត្បាតនៃជំងឺកូវីដ ១៩ ខណៈដែលគ.ជ.ប មានផែនការចុះឈ្មោះអ្នកបោះឆ្នោតថ្មីឆ្នាំ ២០២១ មានចំនួន ១ លាន ៦ សែននាក់នៅទូទាំងប្រទេស។
លោកថា គ.ជ.ប នឹងរៀបចំចុះឈ្មោះអ្នកបោះឆ្នោតជូនពលរដ្ឋឱ្យបានគ្រប់គ្នា ស្របតាមច្បាប់កំណត់។
លោក កន សាវាង្ស អ្នកសម្របសម្រួលផ្នែកអង្កេត អង្គការ COMFREL បានថ្លែងថា ការរៀបចំចុះឈ្មោះ និងពិនិត្យបញ្ជីឈ្មោះបោះឆ្នោត នៅតាមគ្រប់ឃុំសង្កាត់ មានដំណើរការល្អ។ ប៉ុន្តែក៏មានបញ្ហាខ្លះដែរ ពាក់ព័ន្ធនឹងភ្លៀងធ្លាក់ដែលមិនអាចឱ្យពលរដ្ឋធ្វើដំណើរបាន និងជំងឺកូវីដ ១៩ ក៏បានធ្វើឱ្យពលរដ្ឋមិនអាចហ៊ានចេញច្រើនកុះករដែរ។
លោកបន្តថា ពាក់ព័ន្ធនឹងផែនការរបស់ គ.ជ.ប ដែលនឹងត្រៀមចុះឈ្មោះអ្នកបោះឆ្នោតថ្មីមានជាង ១ លាន ៦ សែននាក់ នោះ គឺមិនអាចសម្រេចតាមផែនការនោះទេ ព្រោះមានចំនួន ចុះឈ្មោះ ក្នុង ១ ថ្ងៃបានតែជាង ១ ម៉ឺននាក់ ដោយយ៉ាងហោចណាស់ត្រូវការចុះឈ្មោះថ្មី ឱ្យបានប្រមាណជាង ៣ ម៉ឺននាក់ក្នុង ១ ថ្ងៃ ទើបអាចសម្រេចបានតាមផែនការ។
លោកថ្លែងថា៖ «ប៉ុន្តែនេះ គ្រាន់តែជាថ្ងៃដំបូងទេ ចាំយើងនឹងពិនិត្យមើលនៅថ្ងៃទី ២ ឬ ទី ៣ បន្ទាប់ទៀត។ ប៉ុន្តែ សម្រាប់ខ្ញុំក៏វាមិនច្រើនលើសលប់គ្រប់ចំនួនទាំង ១ លាន ៦ សែនហ្នឹងទេ ព្រោះប្រជាពលរដ្ឋយើងសព្វថ្ងៃ មានការចំណាកស្រុកច្រើន បើទោះនៅក្នុងអំឡុងកូវីដ ១៩ មានប្រជាពលរដ្ឋវិលមកវិញក៏ដោយ និងនីតិវិធីមួយចំនួនមិនទាន់ត្រូវបានកែតម្រូវឱ្យពលរដ្ឋស្នាក់នៅក្រៅប្រទេសអាចុះឈ្មោះបាន»។
លោកបន្តទៀតថា មួយទៀត គឺប្រជាពលរដ្ឋបានចេញទៅធ្វើស្រែចម្ការ និងឯកសារពាក់ព័ន្ធមួយចំនួនទៀត ក៏ជាចំណុច សំខាន់ផងដែរនិងជាពិសេស គឺកត្តានយោបាយក៏ធ្វើឱ្យប្រជាពលរដ្ឋបាក់ទឹកចិត្តក្នុងការចូលរួមចុះឈ្មោះបោះឆ្នោត ពីព្រោះបើពួកគាត់ប្រើប្រាស់សិទ្ធិទៅចុះឈ្មោះបោះឆ្នោត ក៏មិនប្រកបដោយឆន្ទៈដែរ។
គ.ជ.ប បានរៀបចំពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ ២០២១ ប្រព្រឹត្តទៅចាប់ពីថ្ងៃទី ១២ ខែតុលា ដល់ថ្ងៃទី ៣០ ខែ វិច្ឆិកា ឆ្នាំ ២០២១ ក្នុងន័យឱ្យបញ្ជីបោះឆ្នោតឆ្នាំ ២០២១ មានភាពពេញលេញ និងបច្ចុប្បន្នភាព សម្រាប់យកទៅបម្រើការឱ្យការបោះឆ្នោត ក្នុងឆ្នាំ ២០២២៕