.jpg)
កិច្ចពិភាក្សារបស់អ្នកសារព័ត៌មានទាក់ទងនឹងការចុះបញ្ជីជាផ្លូវការនៅថ្ងៃទី ១៤ តុលា។ រូបថត CCJ
ភ្នំពេញៈ រហូតមកទល់ពេលនេះ មានអង្គភាពសារព័ត៌មានជាង ២០០ បានចុះបញ្ជីនៅក្រសួងពាណិជ្ជកម្ម បន្ទាប់ពីក្រសួងពាណិជ្ជកម្ម និងក្រសួងព័ត៌មានបានអនុវត្តប្រកាសរួមក្នុងការចុះបញ្ជីអង្គភាពសារព័ត៌មានដែលធ្វើអាជីកម្មរកប្រាក់ចំណេញ។
លោក ឱម ដារាឫទ្ធិ ប្រធាននាយកដ្ឋានចុះបញ្ជីពាណិជ្ជកម្មនៃក្រសួងពាណិជ្ជកម្មបញ្ជាក់ថា៖ «តាំងពីយើងបានអនុវត្តប្រកាសរួមរវាងក្រសួងព័ត៌មាន និងក្រសួងពាណិជ្ជកម្មមក គឺមានសារព័ត៌មានជាង ២០០ ហើយដែលបានមកចុះបញ្ជីនៅក្រសួងពាណិជ្ជកម្ម។ ខ្លះចុះជាក្រុមហ៊ុន ខ្លះចុះជាសហគ្រាសប្រភេទតូចៗ»។
ការបញ្ជាក់របស់លោកធ្វើឡើងក្នុងកិច្ចពិភាក្សាសារព័ត៌មានស្តីការចុះបញ្ជីស្ថាប័ន និងអង្គការសារព័ត៌មាន ដែលរៀបចំដោយក្លិបអ្នកាសែតកម្ពុជាកាលពីថ្ងៃទី ១៤ តុលា។
កាលពីថ្ងៃទី ២៨ ខែ សីហា ឆ្នាំ ២០២០ ក្រសួងទាំង ២ បានចេញប្រកាសរួមស្តីពី «ការគ្រប់គ្រងការចុះបញ្ជីពាណិជ្ជកម្ម និងកិច្ចការពារម៉ាក និងពាណិជ្ជនាមសម្រាប់អាជ្ញាប័ណ្ណលើវិស័យព័ត៌មាន និងសោតទស្សន៍»។
ប្រកាសរួមនេះមានគោលបំណងដើម្បីធានាថា អត្តសញ្ញាណអង្គភាពសារព័ត៌មានមិនជាន់លើអត្តសញ្ញាណអង្គភាពសារព័ត៌មានដទៃទៀត និងដើម្បីការពារផលប្រយោជន៍របស់អ្នកស្នើសុំចុះបញ្ជីពាណិជ្ជកម្ម ព្រមទាំងមិនអនុញ្ញាតឲ្យប្រើប្រាស់ម៉ាក និងពាណិជ្ជនាម ដែលបណ្តាលឱ្យប៉ះពាល់ដល់សណ្តាប់ធ្នាប់ជាសាធារណៈ សីលធម៌សង្គម ឬប្រពៃណីល្អរបស់ជាតិ និងម៉ាកដែលមិនអាចចុះបញ្ជីបាន។
លោក ឱម ដារាឫទ្ធិ បញ្ជាក់ថា នេះគឺជាការចូលរួមចំណែករបស់អ្នកសារព័ត៌មានដែលបានយល់ដឹងអំពីកាតព្វកិច្ចដែលត្រូវចុះបញ្ជីពាណិជ្ជកម្ម ហើយអង្គភាពសារព័ត៌មានដែលមានគោលដៅធ្វើអាជីកម្មមានកាតព្វកិច្ចចុះបញ្ជី ១៥ ថ្ងៃ មុនចាប់ផ្តើមអាជីកម្ម។
លោកថ្លែងថា៖ «យើងមិនរឹតត្បិតទៅលើរបបសារព័ត៌មានទេ ក្រសួងពាណិជ្ជកម្មអត់មានភារកិច្ចទៅប៉ះពាល់អីទេ។ ក្រសួងព័ត៌មានគាត់អ្នកគ្រប់គ្រងអ៊ីចឹងទៅ តែក្រសួងពាណិជ្ជកម្មគឺគ្រប់គ្រងទៅលើពាណិជ្ជករដែលជាក្រុមហ៊ុន ឬរូបវន្តបុគ្គលដែលគាត់ធ្វើអាជីវកម្មដើម្បីរកប្រាក់ចំណេញ។ ហ្នឹង គឺត្រូវតែគោរពតាមច្បាប់ចុះបញ្ជីណាណិជ្ជកម្មហ្នឹងហើយ និងច្បាប់សហគ្រាស។ នេះជាគោលការណ៍ច្បាប់ដែលតម្រូវឱ្យយើងចុះបញ្ជី»។
ម៉ាក និងឈ្មោះសហគ្រាសសារព័ត៌មាននឹងត្រូវបានការពារដោយច្បាប់ បន្ទាប់ពីត្រូវបានចុះបញ្ជី គឺមិនអាចមានបុគ្គលណាយកឈ្មោះដូចគ្នាឬស្រដៀងគ្នានឹងអង្គភាពសារព័ត៌មានមួយទៀតទៅប្រើប្រាស់នោះទេ។ ការចុះបញ្ជីនេះមិនមានការលំបាក ហើយក៏មិនចំណាយថវិកាច្រើននោះដែរ ព្រោះធ្វើឡើងតាមប្រព័ន្ធអេឡិចត្រូនិក និងចុះបញ្ជីតែម្តងគត់ក្នុងមួយជីវិតនៃសហគ្រាសសារព័ត៌មាន។
លោកថ្លែងថា៖ «អ៊ីចឹងការបង់កម្រៃសេវាគឺវាឥឡូវនេះ បើសហគ្រាសតែ១៨ម៉ឺនរៀលទេហើយសម្រាប់រយៈពេល៩៩ឆ្នាំបង់តែម្តងទេ អត់មានត្រូវប្រកាសបង់អីបន្តទៀតទេ»។ អ្វីដែលសំខាន់គឺខាងអគ្គនាយកដ្ឋានពន្ធដារ គាត់បានបញ្ជាក់ហើយបញ្ជាក់ទៀតថា បើចំណេញ អាហ្នឹងគឺត្រូវបង់ពន្ធប្រាក់ចំណេញជូនរដ្ឋ ប៉ុន្តែពន្ធផ្សេងៗដែលត្រូវបង់មិនមែនសហគ្រាស [សារព័ត៌មាន] បង់ទេគឺយកពីអ្នកដែលត្រូវមានកាតព្វកិច្ចជំនួសពន្ធដារ ដោយបង់ថ្លៃផ្ទះគឺយកពីម្ចាស់ផ្ទះ ថ្លៃជួលផ្ទះ បង់ថ្លៃបុគ្គលិកគឺយកពីប្រាក់ខែបុគ្គលិក។
លោកបញ្ជាក់ថា៖ «អ៊ីចឹង ដូចគ្មានអីថា បន្ទុកធំសម្រាប់អាជីវកម្មដែរ។ ទាល់តែចំណេញ អាហ្នឹងបានយើងបង់ពន្ធជូនដ្ឋលើប្រាក់ចំណេញ»។
ឆ្លើយតបទៅនឹងសំណួរអ្នកសារព័ត៌ ដែលលើកឡើងថា លោកបានចំណាយប្រាក់ប្រមាណ ៤០០ ដុល្លារ ក្នុងការចុះបញ្ជីសហគ្រាសសារព័ត៌មានបន្ទាប់ពីឱ្យអ្នកផ្តល់សេវាខាងក្រៅជួយធ្វើការចុះបញ្ជីនេះ លោកដារាឫទ្ធិបានជំរុញឱ្យក្លិបអ្នកកាសែតកម្ពុជាធ្វើការរួមគ្នាជាមួយអង្គភាពសារព័ត៌មាន ដើម្បីចៀសវាងការទៅរកអ្នកផ្តល់សេវាខាងក្រៅមកជួយចុះបញ្ជីដែលអាចធ្វើឱ្យការចំណាយទៅលើការចុះបញ្ជីហួសពីការកំណត់របស់រដ្ឋ ព្រោះពាក់ព័ន្ធនឹងក្នុងការចុះបញ្ជីនេះ ក្រុមការងារក្រសួងពាណិជ្ជអាចជួយអ្នកសារព័ត៌មានបាន។
លោកថ្លែងថា៖ «ខាងខ្ញុំនឹងមានក្រុមជួយភ្លាមអត់អីទេចុះបញ្ជីពាណិជ្ជកម្មណា។ ក្រុមការងាររបស់ខ្ញុំចាំជួយដោយឥតគិតថ្លៃទេ បង់តែថ្លៃរដ្ឋទៅបានហើយ»។
លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន ថ្លែងក្នុងពិធីនេះ ថា រហូតមកដល់ពេលនេះ ក្រសួងព័ត៌មានមិនទាន់មានចំណាត់ការទៅលើអង្គភាពសារព័ត៌មានបែបអាជីវកម្មដែលបានចុះបញ្ជីរួចហើយនៅក្រសួងព័ត៌មាន តែមិនទាន់បានចុះបញ្ជីនៅក្រសួងពាណិជ្ជកម្មនៅឡើយទេ ដោយសារវិធានការចុះបញ្ជីនេះនឹងត្រូវបានប្រើប្រាស់រហូតដល់ដំណាច់ឆ្នាំ ២០២១៕
