ភ្នំពេញៈ ក្នុងរយៈពេល ៩ ខែ ឆ្នាំ ២០២១ ក្រសួងសាធារណការ និងដឹកជញ្ជូន បានរកឃើញយានយន្តដឹកលើសទម្ងន់ចំនួនជិត ៥៨ ម៉ឺនគ្រឿង ដែលក្នុងនោះត្រូវបានពិន័យមានជាង ២ ០០០ គ្រឿង អនុគ្រោះមានជាង ៥៧ ម៉ឺនគ្រឿង និងឃាត់ទុកមានជាង ២០០ គ្រឿង។
របាយការណ៍របស់ក្រសួងសាធារណការបានឱ្យដឹងនៅថ្ងៃទី ១៥ ខែតុលា ថា៖ «យានយន្តត្រួតពិនិត្យសរុបចំនួន ១ ៨៣០ ៦៣១ គ្រឿង យានយន្តលើសទម្ងន់កម្រិតកំណត់ចំនួន ៥៧៨ ១០៣ គ្រឿង ស្មើនឹង ៣១,៥៨% ដែលក្នុងនោះ យានយន្តផ្ទុកលើសក្នុងកម្រិតអនុគ្រោះចំនួន ៥៧៥ ៨៥៦ គ្រឿង និងយានយន្តលើសទម្ងន់ កម្រិតកំណត់ដែលបានពិន័យមានចំនួន ២ ២៤៧ គ្រឿងដែលរួមទាំងយានយន្តដែលឃាត់ទុកចំនួន ២២៩ គ្រឿង»។
របាយការណ៍បញ្ជាក់ថា៖ «យានយន្តចំនួន ២២៩ គ្រឿងដែលបានពិន័យ និងឃាត់ទុកទទួលបានការអនុគ្រោះពីលោកនាយករដ្ឋមន្ត្រី ហ៊ុន សែន និងបានប្រគល់ជូនម្ចាស់យានយន្តវិញ»។
ក្រសួងបញ្ជាក់ក្នុងហ្វេសប៊ុកនៅថ្ងៃទី ១៥ ខែតុលា ថា ក្រសួងនឹងបន្តផ្សព្វផ្សាយ និងពន្យល់ណែនាំដល់ម្ចាស់យានយន្ត ម្ចាស់អាជីវកម្មដឹកជញ្ជូន ដេប៉ូខ្សាច់ និងថ្ម និងសាធារណជនឱ្យបានយល់ដឹងកាន់តែទូលំទូលាយអំពីបទដ្ឋានច្បាប់នានាដែលពាក់ព័ន្ធការដឹកជញ្ជូនលើសទម្ងន់កម្រិតកំណត់ ជាពិសេសច្បាប់ស្តីពីផ្លូវថ្នល់។
ក្រសួងបញ្ជាក់ថា៖ «ក្រុមការងារនឹងបន្តអនុវត្តច្បាប់ និងទប់ស្កាត់ការដឹកជញ្ជូនលើសទម្ងន់កម្រិតកំណត់យ៉ាងតឹងរ៉ឹងបំផុត ដោយមិនមានការលើកលែងឡើយ»។
ក្រសួងបន្តថា ដោយសារហេដ្ឋារចនាសម្ព័ន្ធផ្លូវថ្នល់ក្នុងប្រទេសមានការអភិវឌ្ឍ និងរីកចម្រើនច្រើន និងតម្រូវការរបស់រដ្ឋបាលខេត្ត ក្រសួងនឹងរៀបចំដាក់ឱ្យប្រើប្រាស់ស្ថានីយជញ្ជីងថ្មី នៅខេត្តកែប និងខេត្តព្រះវិហារ ព្រមទាំងគ្រោងសាងសង់ស្ថានីយជញ្ជីងបន្ថែមទៀត នៅតាមខេត្តដែលមានតម្រូវការចាំបាច់៕