.jpg)
ពិធីបញ្ចុះបឋមសិលា បើកការដ្ឋានសាងសង់មជ្ឈមណ្ឌលផលិតផែនទី នៅនាយកដ្ឋានភូមិសាស្ត្រ ក្រសួងការពារជាតិ កាលពីថ្ងៃទី១៤ ខែតុលា ឆ្នាំ ២០២១។ រូបថត សហការី
មជ្ឈមណ្ឌលផលិតផែនទីនៃក្រសួងការពារជាតិ លើកដំបូងនៃប្រទេសកម្ពុជា ត្រូវបានបើកការដ្ឋានសាងសង់ កាលពីថ្ងៃទី១៤ ខែតុលា ឆ្នាំ ២០២១ ជាជំនួយឧបត្ថម្ភរបស់ក្រសួងការពារជាតិសាធារណរដ្ឋប្រជាមានិតចិន ដែលសំណង់នៃមជ្ឈមណ្ឌលផលិតផែនទីនេះ ត្រូវចាប់ផ្តើមដំណើរការសាងសង់តាំងពីឆ្នាំ ២០២០ កន្លងមក ប៉ុន្តែដោយបញ្ហាវិបត្តិសកលនៃជំងឺកូវីដ១៩ ធ្វើឱ្យការសាងសង់ត្រូវបានពន្យាររហូតដល់ពេលនេះ។
ពិធីនេះមានការចូលរួមក្រោមអធិបតីភាព លោក ឯល វ៉ាន់សារ៉ាត រដ្ឋលេខាធិការ ក្រសួងការពារជាតិ និងលោក ចាង ជៀន ( CHANG JIAN ) ទីប្រឹក្សាអមស្ថានឯកអគ្គរដ្ឋទូត នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា។
នាឱកាសនៃការប្រារព្ធពិធីបញ្ចុះបឋមសិលា បើកការដ្ឋានសាងសង់មជ្ឈមណ្ឌលផលិតផែនទី នៅនាយកដ្ឋានភូមិសាស្ត្រ ក្រសួងការពារជាតិ លោក ទេព ចម្រើន នាយកនាយកដ្ឋានភូមិសាស្ត្រ ក្រសួងការពារជាតិ បានថ្លែងថា នេះជាសមិទ្ធផលថ្មីមួយទៀតដែលក្រសួងការពារជាតិ នៃព្រះរាជាណាចក្រកម្ពុជា ទទួលបានពីជំនួយឧបត្ថម្ភដ៏ថ្លៃថ្លារបស់ក្រសួងការពារជាតិ សាធារណរដ្ឋប្រជាមានិតចិន អនុវត្តតាមកិច្ចព្រមព្រៀងវាស់វែងគូរផែនទី និងសេវានាំផ្លូវរវាងក្រសួងការពារជាតិកម្ពុជា និងក្រសួងការពារជាតិ សារធារណរដ្ឋប្រជាមានិតចិន ពីឆ្នាំ ២០១៨ កន្លងមក។
ជាមួយគ្នានោះ លោក ឯល វ៉ាន់សារ៉ាត បានមានប្រសាសន៍ថា ៖ «នេះជាមោទនភាពបំផុតរបស់នាយកដ្ឋានភូមិសាស្ត្រ ក្រសួងការពារជាតិកម្ពុជា ដែលទទួលបាននូវមជ្ឈមណ្ឌលផលិតផែនទី ដែលជាយូរយារណាស់មកហើយ កងយោធពលខេមរភូមិន្ទពុំធ្លាប់មាន»។
លោកបានបញ្ជាក់ថា ពេលស្ថិតក្រោមអាណានិគមបារាំង ឆ្នាំ ១៨៩៩ រដ្ឋាភិបាលបារាំង បានបង្កើតក្រុមភូមិសាស្ត្រមួយសម្រាប់ឥណ្ឌូចិន ហើយឱ្យឈ្មោះថា សេវាភូមិសាស្ត្រឥណ្ឌូចិន ដែលស្ថិតនៅទីក្រុងដាឡាត់ អតីតវៀតណាមខាងត្បូង និងមានរោងពុម្ពនៅទីនោះ។
លោក ឯល វ៉ាន់សារ៉ាត បានបន្ថែមថា លុះដល់ឆ្នាំ ១៩៥៥ ក្រោយពីប្រទេសកម្ពុជា ទទួលឯករាជ្យថ្ងៃទី០៩ ខែវិច្ឆិកា ឆ្នាំ ១៩៥៣ ក្រុមភូមិសាស្ត្រឥណ្ឌូចិន ក៏បានរំលាយខ្លួន ហើយប្រទេសនីមួយៗបង្កើតស្ថាប័នភូមិសាស្ត្ររៀងៗខ្លួន ដោយឡែកកម្ពុជាស្ថិតក្រោមការដឹកនាំ របស់រដ្ឋមន្ត្រី ក្រសួងសេដ្ឋកិច្ចជាតិ ឈ្មោះថា ក្រុមភូមិសាស្ត្រខ្មែរ។ លុះដល់ខែមិថុនា ឆ្នាំ ១៩៥៦ នាយកដ្ឋានភូមិសាស្ត្រ ផ្ទេរឱ្យក្រសួងការពារជាតិគ្រប់គ្រងវិញឈ្មោះថា នាយកដ្ឋានភូមិសាស្ត្រ នៃកងយោធពលខេមរភូមិន្ទ ប៉ុន្តែមិនទាន់មានរោងពុម្ពផលិតផែនទីផ្ទាល់ខ្លួននៅឡើយទេ។
លោក ឯល វ៉ាន់សារ៉ាត បានផ្ដាំផ្ញើដល់ក្រុមវិស្វករ អ្នកបច្ចេកទេស ជំនាញ ត្រូវយកចិត្តទុកដាក់ធ្វើយ៉ាងណា សាងសង់អគារនេះប្រកបដោយគុណភាពរឹងមាំ អាចប្រើប្រាស់យូរអង្វែង និងសហការឱ្យបានល្អជាមួយនាយកដ្ឋានភូមិសាស្ត្រ ក្រសួងការពារជាតិ ធានាបានលទ្ធផលល្អ តាមការកំណត់នៃគម្រោងផែនការសាងសង់។
គួរបញ្ជាក់ថា អគារមជ្ឈមណ្ឌល ផលិតផែនទីនេះ សង់ឡើងអំពីថ្ម ដែលមាន ៣ជាន់ តាមគម្រោងផែនការនឹងបញ្ចប់ការសាងសង់ នៅពាក់កណ្តាលឆ្នាំ ២០២២ ខាងមុខនេះ៕
