.jpg)
វិទ្យាល័យចំណេះទូទៅ និងបច្ចេកទេស តេជោសែន កោះកុង រៀបចំត្រៀមបើកដំណើរឡើងវិញ។ រូបថត ហ្វេសប៊ុក
កោះកុងៈ វិទ្យាល័យចំណេះទូទៅ និងបច្ចេកទេស តេជោសែន កោះកុង នឹងបើកឱ្យសិស្សចូលរៀនឡើងវិញចាប់ពីថ្ងៃទី ១៨ ខែតុលា ដោយសិស្សខ្លះតម្រូវឱ្យរៀននៅសាលាផ្ទាល់ និងសិស្សខ្លះទៀតរៀនតាមអនឡាញ។
សេចក្តីជូនដំណឹងរបស់សាលារៀននេះបញ្ជាក់នៅថ្ងៃទី ១៦ ខែតុលាថា សិស្សថ្នាក់ទី៩ និងថ្នាក់ទី១២ ត្រូវមករៀនផ្ទាល់ទាំងអស់គ្នា។ ស្សិសថ្នាក់ទី១២ រៀនពេលព្រឹកចាប់ពីម៉ោង ៧ ព្រឹកដល់ ១០ ព្រឹក រីឯសិស្សថ្នាក់ទី៩រៀនពេលរសៀលចាប់ពីម៉ោង ២ រសៀល ដល់ ៥ ល្ងាច។
សេចក្តីជូនដំណឹងបន្តថា សម្រាប់សិស្សថ្នាក់ទី៧ ទី៨ ទី១០ និងទី១១ ត្រូវរៀនតាមប្រព័ន្ធអនឡាញជាធម្មតាចំពោះសិស្សដែលមានទូរស័ព្ទ ឬឧបករណ៍វៃឆ្លាត (Smart Phone) តែចំពោះសិស្សដែលមិនមាន Smart Phone នឹងមករៀនដោយផ្ទាល់នៅសាលារៀន។
សម្រាប់ថ្នាក់បច្ចេកទេស មេកានិច និងអគ្គិសនី វិញ សិស្សតម្រូវឱ្យមកអនុវត្តដោយផ្ទាល់នៅសាលារៀន ពេលព្រឹកចាប់ពីម៉ោង៧ព្រឹកដល់ម៉ោង ១១ ព្រឹក និងពេលរសៀលចាប់ពីម៉ោង ២ រសៀលដល់ម៉ោង ៥ ល្ងាច៕
