.jpg)
ទិដ្ឋភាពការដ្ឋាននៃគម្រោងស្តារឡើងវិញកំណាត់ផ្លូវជាតិលេខ ៥ ក្នុងភូមិសាស្ត្រខេត្តពោធិ៍សាត់ ក្នុងអំឡុងខែតុលានេះ។ រូបភាព រដ្ឋបាលខេត្តពោធិ៍សាត់
ពោធិ៍សាត់ៈ លោក ជាវ តាយ អភិបាលនៃគណៈអភិបាលខេត្តពោធិ៍សាត់ នាថ្ងៃទី ២១ ខែតុលា បានស្នើឱ្យក្រុមការងារគណៈកម្មការអន្តរក្រសួង ពិនិត្យ និងពិភាក្សា ដើម្បីជួយពន្លឿនការស្ថាបនាផ្លូវជាតិលេខ ៥ ក្នុងភូមិសាស្ត្រខេត្តពោធិ៍សាត់ ខណៈដែលដំណើរការស្ថាបនាផ្លូវនេះ នៅចំណុចខ្លះមានការយឺតយ៉ាវ។
លោក ជាវ តាយ បានលើកឡើងបែបនេះ ក្នុងកិច្ចប្រជុំពិភាក្សាការងារ ជុំវិញការដោះស្រាយផលប៉ះពាល់ ការស្ថាបនាស្ថានីយថ្លឹងយានយន្តលើសទម្ងន់នៃគម្រោងស្តារឡើងវិញកំណាត់ផ្លូវជាតិលេខ ៥ ក្នុងភូមិសាស្ត្រខេត្តពោធិ៍សាត់ ដោយមានការចូលរួមពីមន្ត្រីពាក់ព័ន្ធក្នុងខេត្ត ស្រុក និងក្រុមការងារគណៈកម្មការអន្តរក្រសួងមួយចំនួនទៀត។
បន្ទាប់ពីក្រុមការងារអន្តរក្រសួង បានជម្រាបជូនពីលទ្ធផលសម្រេចបាន និងបញ្ហាប្រឈមចំពោះការយឺតយ៉ាវក្នុងការស្ថាបនាផ្លូវជាតិលេខ ៥ ការស្ថាបនាផ្លូវវាងក្រុង ការស្ថាបនាស្ពានអាកាស ការស្ថាបនាស្ថានីយថ្លឹងយានយន្តលើសទម្ងន់ និងទីតាំងសង់រង្វង់មូលថ្មីនៃគម្រោងស្តារឡើងវិញកំណាត់ផ្លូវជាតិលេខ ៥ ក្នុងភូមិសាស្ត្រខេត្តពោធិ៍សាត់នោះរួចមក លោក ជាវ តាយ បានថ្លែងការកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់មន្ត្រីពាក់ព័ន្ធ។
លោកបញ្ជាក់ថា៖«ការខំប្រឹងប្រែងទាំងកម្លាំងកាយ និងកម្លាំងចិត្តពីគ្រប់ភាគីពាក់ព័ន្ធ ជុំវិញការដោះស្រាយផលប៉ះពាល់ និងការខិតខំសម្របសម្រួលជាមួយប្រជាពលរដ្ឋឱ្យចូលរួមអភិវឌ្ឍជាមួយរាជរដ្ឋាភិបាលមកលើគម្រោងខាងលើ ទើបទទួលបានជោគជ័យគួរជាទីមោទនៈ»។
ប៉ុន្តែលោកបានលើកឡើងថា ក្រៅពីផ្លូវមួយចំនួននៃគម្រោងខាងលើនេះ បានស្ថាបនារួចខ្លះហើយនោះ ក៏នៅមានកន្លែងមួយចំនួនទៀត ក៏មានការលំបាក ជាក់ស្តែងដូចនៅព្រំប្រទល់នៃខេត្តពោធិ៍សាត់ និងខេត្តកំពង់ឆ្នាំង គឺមានការលំបាក ដែលធ្វើឱ្យរថយន្តតូចធំគ្រប់ប្រភេទពិបាកក្នុងការធ្វើដំណើរឆ្លងកាត់។
លោកបានទទួលស្គាល់ និងចោទសួរថា៖«ជាការពិតណាស់ថា រដូវវស្សាពិបាកក្នុងការស្ថាបនា តែការយឺតយ៉ាវនេះ អាចមកពីក្រុមហ៊ុនខ្វះខាតធនធានមនុស្ស ឬខ្វះខាតគ្រឿងចក្រ? ត្រង់ចំណុចនេះសូមឱ្យក្រុមហ៊ុន និងក្រុមការងារអន្តរក្រសួងជួយបន្ថែមគ្រឿងចក្រ និងជំរុញពន្លឿនការស្ថាបនាគម្រោងនេះ ឱ្យបានឆាប់រហ័ស ឬអាចធ្វើដំណើរបានក្នុងគន្លងណាមួយក៏បាន នៅដំណាច់ឆ្នាំ ២០២១ ឬដើមឆ្នាំ ២០២២»។
ជុំវិញការស្ថាបនារង្វង់មូលផ្លូវវាងក្រុង លោក ជីវ តាយ បានជំរុញឱ្យមន្ត្រីជំនាញ ត្រូវពិនិត្យ និងកំណត់ទីតាំងឱ្យបានច្បាស់លាស់ ដើម្បីជាសោភណ្ឌភាព និងភាពទាក់ទាញ ចៀសវាងស្ថាបនារួចហើយ រថយន្តធ្វើដំណើរទៅផុតៗ ដោយពុំបានឈប់សំចត ដោយសារតែពុំមានភាពទាក់ទាញ ដែលនឹងនាំឱ្យខាតបង់នូវសេដ្ឋកិច្ច និងប្រាក់ចំណូលរបស់ប្រជាពលរដ្ឋ។
ចំណែកទីតាំងស្ថាបនាស្ថានីយថ្លឹងយានយន្តលើសទម្ងន់ អនុគណៈកម្មការខេត្តដែលដឹកនាំដោយលោក ខូយ រីដា ត្រូវសហការជាមួយក្រុមការងារអន្តរក្រសួង ធ្វើយ៉ាងណាកំណត់សម្រេចឱ្យបានជាលទ្ធផលផ្លែផ្កា។
លោកអភិបាលខេត្ត ក៏សូមឱ្យមន្ត្រីពាក់ព័ន្ធ បន្តបំពេញភារកិច្ចនៃការទាំងនេះឱ្យបានខ្លាំងក្លាបន្ថែមទៀត ដើម្បីឱ្យគម្រោងស្តារឡើងវិញផ្លូវជាតិលេខ ៥ នេះ ឈានដល់កម្រិតមួយដ៏ល្អ អាចស្រូបយកភ្ញៀវទេសចរ និងបង្កើនសេដ្ឋកិច្ចសម្រាប់ខេត្ត។
បើតាមរដ្ឋបាលខេត្តពោធិ៍សាត់ គម្រោងកែលម្អផ្លូវជាតិលេខ ៥ មានប្រវែងសរុប ៣៦៦ គីឡូម៉ែត្រ លើផ្លូវចាស់ពីព្រែកក្តាមទៅដល់ក្រុងប៉ោយប៉ែត។
គម្រោងផ្លូវនេះ ជាប្រភេទផ្លូវបេតុងកៅស៊ូ AC ដោយការសាងសង់ចែកចេញជា ៣ ផ្នែក ក្នុងនោះ ផ្នែកខាងជើង ចាប់ពីបាត់ដំបង ដល់ប៉ោយប៉ែត (រួចរាល់) មានប្រវែង ៨៤,៧២ គីឡូម៉ែត្រ។ ផ្នែកកណ្តាលចាប់ពីធ្លាម្អម ដល់បាត់ដំបង មានប្រវែងសរុប ១៤៦,០៤ គីឡូម៉ែត្រ ទទឹងប្រវែង ២៣ ម៉ែត្រ ចែកជា ២ គន្លង ទៅ ៤ គន្លង និងផ្នែកផ្លូវភាគខាងត្បូង ចាប់ពីព្រែកក្តាម ខេត្តកណ្តាល ដល់ធ្លាម្អម ខេត្តពោធិ៍សាត់ មានប្រវែងសរុប ១៣៥,២៤ គីឡូម៉ែត្រ ចែកជា ២ គន្លង ទៅ ២ គន្លងមក។
គម្រោងផ្លូវនេះ ជាចំណែកមួយនៃផ្លូវអាស៊ានហាយវ៉េលេខ ១ ដែលតភ្ជាប់ពីប្រទេសចិន មកមីយ៉ាន់ម៉ា ថៃ កម្ពុជា និងវៀតណាម និងជាផ្លូវសេដ្ឋកិច្ចយ៉ាងសំខាន់ សម្រាប់ការដឹកជញ្ជូនផលិតផលកសិកម្ម និងជាពិសេសជាសរសៃឈាមដ៏ធំមួយ ក្នុងការធ្វើឱ្យសេដ្ឋកិច្ចជាតិកាន់តែមានការអភិវឌ្ឍថែមទៀត៕
វីដេអូ៖
