សមត្ថកិច្ចពិនិត្យសាកសពជនរងគ្រោះ បន្ទាប់ពីជីកចេញពីរណ្តៅកប់សពពីថ្ងៃទី ៣១ សីហា។ រូបថត សហការី
បាត់ដំបងៈ អធិការរងនគរបាលស្រុកគាស់ក្រឡម្នាក់ត្រូវបានតំណាងអយ្យការ ធ្វើការចោទប្រកាន់ នៅថ្ងៃទី ៧ វិច្ឆិកា ពាក់ព័ន្ធករណីសម្លាប់បុរសជាបងថ្លៃម្នាក់ ដែលមានជំងឺសរសៃប្រសាទ ប្រព្រឹត្តនៅភូមិបាស្រែ ឃុំដូនបា ស្រុកគាស់ក្រឡ ហើយបានយកសាកសពទៅកប់ចោល កាលពីអំឡុងខែសីហា ឆ្នាំ ២០២១។
លោក ដួង សាវ៉ន អ្នកនាំពាក្យអយ្យការអមសាលាដំបូងខេត្តបាត់ដំបងប្រាប់នៅរសៀលថ្ងៃទី ៧ វិច្ឆិកាថា ជនឈ្មោះ ដាក សុខា ត្រូវបានតំណាងអយ្យការចោទប្រកាន់ និងបញ្ជូនបន្តទៅចៅក្រមស៊ើបសួរហើយ។ លោកបញ្ជាក់ថា៖ «ករណីនេះ ត្រូវបានតំណាងអយ្យការ ធ្វើការចោទប្រកាន់ពីបទឃាតកម្មតាមមាត្រា ១៩៩ នៃក្រមព្រហ្មទណ្ឌ»។
លោក ចាន់ ពិសិដ្ឋ នាយប៉ុស្តិ៍ រដ្ឋបាលឃុំដូនបា ស្រុកគាស់ក្រឡ ប្រាប់ភ្នំពេញប៉ុស្តិ៍នៅរសៀលថ្ងៃទី ៧ វិច្ឆិកាថា បុរសរងគ្រោះក្នុងអំពើឃាតកម្មនេះឈ្មោះ យ៉ង សារ៉ាត់ ហៅសាក់ អាយុ ៤៥ ឆ្នាំ ជាជាងជួសជុលកង់ម៉ូតូរស់នៅភូមិបាស្រែ ឃុំ ដូនបា ស្រុកគាស់ក្រឡ។
លោកមិនដឹងថា ជនរងគ្រោះមានស្រុកកំណើតនៅទីណាទេ ប៉ុន្តែគាត់បានយកស្ត្រីម្នាក់ត្រូវជាបងស្រីបង្កើតរបស់លោកអធិការរង ដាក សុខា។
ប៉ុន្តែទាក់ទងនឹងមូលហេតុនៃការសម្លាប់នោះ សមត្ថកិច្ចមិនទាន់បានទទួលចម្លើយពីជនសង្ស័យទេ។ ជនរងគ្រោះមានរបរជាជាងជួសជុលកង់ម៉ូតូតែនៅក្នុងអំឡុងឆ្នាំ ២០១៨ គាត់ក៏មានជំងឺសរសៃប្រសាទ ប៉ុន្តែជនរងគ្រោះមិនបង្ករឿង ឬវាយតប់អ្នកណាទេ។
លោកបន្ថែមថា ជនរងគ្រោះបានបើកថ្នាំសរសៃប្រសាទពីអង្គការវលវីហ្សិនខេត្តបាត់ដំបងយកទៅលេបជាប្រចាំដែរ។ លុះនៅអំឡុងឆ្នាំ ២០១៩ ជនរងគ្រោះ បាននៅក្នុងផ្ទះថែមទាំងចាក់សោទ្វារបង្ខាំងប្រពន្ធកូនមិនឱ្យដើរចេញពីផ្ទះរយៈពេល ៣ ថ្ងៃ តែមិនបានធ្វើបាបប្រពន្ធកូនទេ។
លោក ពិសិដ្ឋ បញ្ជាក់ថា ក្រោយពីប្រជាពលរដ្ឋរាយការណ៍ប្រាប់ សមត្ថកិច្ចរបស់លោករួមនឹងនគរបាលស្រុកគាស់ក្រឡបានទៅគាស់សោទ្វារផ្ទះ រំដោះប្រពន្ធកូន រួមទាំងគាត់ (ជនរងគ្រោះ) ផងដែរ។
ចាប់តាំងពីពេលនោះមក ប្រពន្ធរបស់ជនរងគ្រោះបាននាំកូនចេញពីផ្ទះ ទៅរស់នៅធ្វើជាកម្មករកាត់ដេរ នៅរាជធានីភ្នំពេញអស់ទុកតែជនរងគ្រោះនៅផ្ទះម្នាក់ឯង។
ដោយសារតែប្រពន្ធកូនទៅចោលអស់បែបនេះ បុរសរងគ្រោះបានចាក់សោទ្វារផ្ទះចោល ហើយទៅធ្វើតូបតូចមួយ ដើម្បីប៉ះកង់ម៉ូតូនៅមុខវត្តក្បែរផ្សារគាស់ក្រឡ។ ប៉ុន្តែនៅថ្ងៃទី ២៦ ខែសីហា ឆ្នាំ ២០២១ អាជ្ញាធរស្រុកគាស់ក្រឡបានចុះរៀបចំសណ្តាប់ធ្នាប់ហើយនៅពេលនោះជនរងគ្រោះបានយកដែកស្បែង ទៅវាយសមត្ថកិច្ច ប៉ុន្តែដោយសារលោក ប៉ាង ហៀង អធិការស្រុកគាស់ក្រឡដឹងថា ជនរងគ្រោះជាមនុស្សមានសតិមិនល្អ ក៏យកគាត់ទៅអធិការដ្ឋានស្រុកគាស់ក្រឡ ដើម្បីធ្វើការអប់រំ។
បើតាមលោក ចាន់ ពិសិដ្ឋ នៅល្ងាចថ្ងៃទី ២៦ សីហាដដែលនោះ ស្រាប់តែលោកអធិការរង ដាក សុខា ធ្វើលិខិតសុំធានាថា យកជនរងគ្រោះទៅចាក់ថ្នាំសរសៃប្រសាទហើយក៏បាត់ដំណឹងរហូតចាប់តាំងពីពេលនោះមក។
ជនរងគ្រោះបានបាត់ខ្លួនតាំងពីថ្ងៃទី ២៦ រហូតដល់ថ្ងៃទី ៣១ សីហា ទើបរកឃើញសាកសព។ ការរកឃើញសពរបស់ជនរងគ្រោះដោយសារបុរសម្នាក់បានទៅភ្ជួរដី។ នៅពេលនោះគាត់បានចូលទៅក្នុងដីឡូត៍ ១ កន្លែងដើម្បីកាច់មែកឈើ។ ចៃដន្យគាត់ឃើញសត្វអណ្តើកវារចូលព្រៃហើយគាត់តាមចាប់សត្វអណ្តើកនោះ ក៏ប្រទះឃើញដៃជនរងគ្រោះ ទើបរាយការណ៍ប្រាប់សមត្ថកិច្ចតែម្តង។
លោកឱ្យដឹងថា ក្រោយពីសមត្ថកិច្ចធ្វើកោសល្យវិច័យពិនិត្យឃើញថា ក្បាលរបស់ជនរងគ្រោះរងការវាយពីក្រោយខាងស្តាំ ១ កន្លែង និងថ្ងាសខាងឆ្វេង ១ កន្លែង។ លោក ពិសិដ្ឋ បាននិយាយថា៖ «ករណីនេះ កម្លាំងជំនាញខេត្ត និងនគរបាលស្រុក នគរបាលប៉ុស្តិ៍ ប្រើពេលស្រាវជ្រាវអស់ ២ ខែ ៤ ថ្ងៃ ទើបវែកមុខឃាតករឃើញ»៕
វីដេអូ៖
