បុរសត្រូវខ្មាន់កាំភ្លើងបាញ់ស្លាប់នៅស្រុកខ្សាច់កណ្តាលពីថ្ងៃទី ២០ វិច្ឆិកា។ រូបថត សហការី
កណ្តាលៈ នគរបាលព្រហ្មទណ្ឌស្រុកខ្សាច់កណ្តាលកំពុងស្រាវជ្រាវកំណត់អត្តសញ្ញាណខ្មាន់កាំភ្លើងដែលបានបាញ់បុរសវ័យចំណាស់ម្នាក់ស្លាប់ កាលពីព្រលប់ថ្ងៃទី ២០ វិច្ឆិកា នៅភូមិថ្មី ឃុំសន្លុង ស្រុកខ្សាច់កណ្តាល នៅពេលដែលជនរងគ្រោះកំពុងជិះម៉ូតូម្នាក់ឯង។
លោក អ៊ុន យ៉ុង អធិការរងទទួលផែនការងារនគរបាលព្រហ្មទណ្ឌ ស្រុកខ្សាច់កណ្តាលឱ្យដឹងនៅថ្ងៃទី ២២ វិច្ឆិកាថា ជនរងគ្រោះឈ្មោះ ឆែម ឆា ភេទប្រុស អាយុ ៦៤ ឆ្នាំ ជាកសិករ មានលំនៅក្នុងភូមិថ្មី ឃុំសន្លុង ស្រុកខ្សាច់កណ្តាល។ ជនរងគ្រោះត្រូវបានជនដៃដល់បាញ់ត្រូវសៀតផ្កាចំនួន ២ គ្រាប់ ចំផ្ទៃមុខ ១ គ្រាប់ និងចំទ្រូង ១ គ្រាប់។ សំណុំរឿងនេះសមត្ថកិច្ចកំពុងធ្វើការស្រាវជ្រាវយ៉ាងសកម្ម ដើម្បីស្វែងរកជនសង្ស័យ។
លោកនិយាយថា៖ «រហូតមកដល់ថ្ងៃនេះ (២២ វិច្ឆិកា) សមត្ថកិច្ចយើងកំពុងដុតដៃដុតជើងមិនបានដាក់ដៃទេគឺសស្រោកសស្រាំខ្លាំងណាស់ ប៉ុន្តែយើងមិនទាន់អាចដាក់ការសន្និដ្ឋានរកមូលហេតុឃើញនៅឡើយទេ»។
លោក អ៊ុន យ៉ុង ប្រាប់តាមសម្តីសាក្សីនៅក្បែរកន្លែងកើតហេតុថាកាលពីវេលាម៉ោងជាង ៦ ល្ងាច ថ្ងៃទី ២២ វិច្ឆិកាគេបានឃើញជនរងគ្រោះជិះម៉ូតូម្នាក់ឯងម៉ាកវេវពណ៌ស ១ គ្រឿងចេញពីផ្លូវលំឡើងថ្នល់កៅស៊ូ សំដៅទៅផ្ទះ។ ប៉ុន្តែពេលជនរងគ្រោះកំពុងជិះម៉ូតូស្រាប់តែគេឮសំឡេងផ្ទុះគ្រាប់កាំភ្លើងហើយឃើញជនរងគ្រោះដួលស្លាប់នៅនឹងកន្លែងកើតហេតុ។
ភ្លាមៗក្រោយកើតហេតុប្រជាពលរដ្ឋបានរាយការណ៍ទៅនគរបាលស្រុកខ្សាច់កណ្តាល ហើយកម្លាំងនគរបាលបានចុះមកដល់ទីតាំងកើតហេតុ។ ពេលនោះនគរបាលជំនាញ ផ្នែកបច្ចេកទេសវិទ្យាសាស្ត្រនៃស្នងការដ្ឋាននគរបាលខេត្តរួមជាមួយគ្រូពេទ្យបានធ្វើកោសល្យវិច័យលើសាកសពជនរងគ្រោះ ដោយពិនិត្យឃើញថា ជនរងគ្រោះត្រូវជនល្មើសបាញ់ត្រូវ ៤ កន្លែង។
ចំសៀតផ្កា ២ គ្រាប់ ចំមុខ ១ គ្រាប់ និងចំទ្រូង ១ គ្រាប់។ ជនសង្ស័យប្រើកាំភ្លើងខ្លីបាញ់សម្លាប់ជនរងគ្រោះ។ ចំពោះសមត្ថកិច្ចដែលចូលរួមក្នុងកិច្ចការនេះ មានខាងនាយកដ្ឋានព្រហ្មទណ្ឌនៃអគ្គស្នងការដ្ឋាននគរបាលជាតិ ស្នងការដ្ឋាននគរបាលខេត្តកណ្តាល និងកម្លាំងនគរបាលស្រុកខ្សាច់កណ្តាល។
លោក សំ ទ្រី មេភូមិថ្មី ក្នុងឃុំសន្លុង ឱ្យដឹងថា ជនរងគ្រោះមានប្រពន្ធ និងមានកូន ៥ នាក់។ គាត់ជាមនុស្សស្លូតបូត មិនដែលបង្កទំនាស់ជាមួយអ្នកភូមិណាទេ។ នៅចំណុចតាមផ្លូវដែលគេបាញ់ជនរងគ្រោះមានមនុស្សធ្វើដំណើរទៅមកច្រើន។
លោកថា៖ «ខ្ញុំមិនបានឮសាច់ញាតិរបស់គាត់និយាយពីបញ្ហាទំនាស់ជាមួយអ្នកណាទេ។ តែយើងក៏មិនដឹងថា មាននរណាខ្លះស្អប់គាត់ដែរ»៕
