មណ្ឌលគិរីៈ សហគមន៍ជនជាតិដើមភាគតិចប្រមាណ ៥០០ នាក់ដែលរស់នៅក្នុងភូមិដាច់ស្រយាល ស្ថិតនៅក្នុង និងក្បែរដែនជម្រកសត្វព្រៃកែវសីមាក្នុងខេត្តមណ្ឌលគិរីបានទទួលសេវាថែទាំសុខភាពពីគ្លីនិកសុខភាពចល័តដែលត្រូវបានបង្កើតឡើងដោយប្រើប្រាស់ថវិការបស់មូលនិធិបែងចែកផលប្រយោជន៍នៃគម្រោងរេដបូកកែវសីមា និងមានការសម្របសម្រួលពីអង្គការ CIAI សហការជាមួយមន្ទីរសុខាភិបាលខេត្តមណ្ឌលគិរី។
យោងតាមកម្មវិធីរេដបូកកែវសីមា (KeoSeima REDD+ Project) បានលើកឡើងក្នុងបណ្តាញសង្គមហ្វេសប៊ុករបស់ខ្លួនថា សហគមន៍ជនជាតិដើមភាគតិចប្រមាណ ៥០០ នាក់ រួមមាន កុមារ ស្ត្រី និងមនុស្សចាស់រស់នៅក្នុងភូមិដាច់ស្រយាលចំនួន ៥ បានទទួលសេវាថែទាំសុខភាពទៀងទាត់យ៉ាងតិច ២ ដងក្នុង ០១ នាក់ ក្នុងរយៈពេល ៥ ខែកន្លងមក បន្ទាប់ពីគ្លីនិកសុខភាពចល័តបានដាក់ឱ្យដំណើរការកាលពីខែសីហា ឆ្នាំ ២០២១ កន្លងមក។ គ្លីនិកសុខភាពចល័តនេះបានបង្កើតឡើងដោយប្រើប្រាស់ថវិការបស់មូលនិធិបែងចែកផលប្រយោជន៍នៃគម្រោងរេដបូកកែវសីមា និងមានការសម្របសម្រួលពីអង្គការ CIAI សហការជាមួយមន្ទីរសុខាភិបាលខេត្តមណ្ឌលគិរី។
កម្មវិធីរេដបូកកែវសីមា បានលើកឡើងថា៖ «គ្លីនិកនេះបង្កើតឡើងក្នុងគោលបំណងដោះស្រាយបញ្ហាប្រឈមផ្នែកសុខភាពរបស់សហគមន៍មូលដ្ឋានដែលពួកគាត់ពុំមានលទ្ធភាពទៅទទួលយកសេវាថែទាំសុខភាពសាធារណៈនៅឆ្ងាយពីតំបន់ដែលពួកគាត់រស់នៅ ក៏ដូចជាក្នុងគោលបំណងលើកកម្ពស់ផ្នែកសុខភាព និងអនាម័យ និងសុខុមាលភាពរបស់ពួកគាត់ផងដែរ»។
ជនជាតិដើមភាគតិចដែលទទួលបានសេវាព្យាបាល និងថែទាំសុខភាពនេះមកពីភូមិដាច់ស្រយាលចំនួន ៥ ក្នុងនោះមាន ភូមិពូតាំង ភូមិពូកេះ ភូមិហ្គាទី ភូមិពូចា និងភូមិពូញ៉ាវ។ គ្លីនិកចល័តនេះមានវេជ្ជបណ្ឌិតមួយរូប ឆ្មបមួយរូប និងគិលានុបដ្ឋាយិកាមួយរូប និងបានដាក់កម្មវិធីចុះពិគ្រោះយោបល់ និងពិនិត្យសុខភាពជូនប្រជាសហគមន៍តាមភូមិនីមួយៗក្នុងមួយខែម្តង។ ក្នុងករណី ពិនិត្យឃើញមានអ្នកជំងឺឈឺធ្ងន់ ក្រុមគ្រូពេទ្យនឹងបញ្ជូនអ្នកជំងឺនោះទៅទទួលការព្យាបាលនៅមណ្ឌលសុខភាព។ ក្រៅពីការពិនិត្យសុខភាព ក្រុមគ្រូពេទ្យក៏បានផ្តល់វគ្គបណ្តុះបណ្តាលដល់សហគមន៍ទាក់ទងនឹងការថែទាំសុខភាព និងអនាម័យផងដែរ។ ជាលទ្ធផលក្រោយការបណ្តុះបណ្តាលមានស្ត្រីមានផ្ទៃពោះកាន់តែច្រើនឡើងបានប្រើប្រាស់សេវាមណ្ឌលសុខភាពដើម្បីពិនិត្យតាមដានផ្ទៃពោះ និងពុំមានស្ត្រីសម្រាលកូននៅតាមផ្ទះដូចពីមុនទៀតនោះទេ។
លោក ប៊ុន សួរ ប្រធានមន្ទីរសុខាភិបាលខេត្តមណ្ឌលគិរីបានប្រាប់ភ្នំពេញប៉ុស្តិ៍ម្សិលមិញថា លោកមិនទាន់ដឹងពីកម្មវិធីនេះនៅឡើយទេ។
លោក គ្រើង តុលា ជាជនជាតិភាគតិចព្នងបានថ្លែងគាំទ្រនូវកម្មវិធីផ្តល់សេវាព្យាបាល និងថែទាំសុខភាព និងការបង្កើតគ្លីនិកសុខភាពចល័តនេះ សម្រាប់ជនជាតិដើមភាគតិចដែលនៅឆ្ងាយ និងមិនមានលទ្ធភាពក្នុងការធ្វើដំណើរទៅកាន់មន្ទីរពេទ្យ ឬមណ្ឌលសុខភាព។
លោកថា៖ «វាជាការល្អដែលមានសេវានេះសម្រាប់បងប្អូនជនជាតិដើមភាគតិច ប៉ុន្តែអ្វីដែលខ្ញុំបារម្ភផងដែរនោះគឺគ្រូពេទ្យជំនាញនៅមានកម្រិត ហើយមួយទៀតខ្ញុំចង់ឱ្យការផ្តល់សេវានេះមានភាពទូលាយទៅដល់បងប្អូនជនជាតិដើមភាគតិចផ្សេងៗទៀតផងដែរ កុំផ្តល់តែសម្រាប់អ្នកនៅក្នុង និងក្បែរដែនជម្រកសត្វព្រៃកែវសីមានេះ»។
លោកថា លោកចង់ឱ្យសេវានេះផ្តល់ទៅដល់អ្នកដែលខ្វះខាត និងពិបាកក្នុងការទទួលបានសេវាថែទាំសុខភាព ដោយសារពួកគាត់មួយចំនួនពេលឈឺតិចតួច មិនចង់ទៅព្យាបាលនៅមន្ទីរពេទ្យ ឬមណ្ឌលសុខភាព ឬពេទ្យឯកជនឡើយ ដោយសារជីវភាពខ្វះខាត។ «បងប្អូនយើងខ្លះមិនមានមធ្យោបាយក្នុងការធ្វើដំណើរមករកសេវាព្យាបាលជាដើម។ ខ្ញុំចង់ឱ្យការផ្តល់សេវាថែទាំសុខភាពពីគ្លីនិកសុខភាពចល័តនេះ ពង្រីកទៅដល់តំបន់ឆ្ងាយៗបន្ថែមទៀតសម្រាប់ប្រជាពលរដ្ឋរបស់យើង»៕