.jpg)
មន្ត្រីជំនាញកម្ពុជា និងថៃក្នុងជំនួបពិភាក្សាការងារស្ដីពីការព្យាបាលស្តារនីតិសម្បទា អ្នកញៀនគ្រឿងញៀន ថ្ងៃទី ២៨ ខែមករា។ រូបភាពNACD
ភ្នំពេញៈ មន្ត្រីជំនាញកម្ពុជា និងថៃបានជួបជជែកពិភាក្សាគ្នាកាលពីថ្ងៃសុក្រ ទី ២៨ ខែមករានេះ ពីគម្រោងការផ្លាស់ប្តូរបទពិសោធន៍របស់យុវជនមកពីប្រទេសទាំង ៦ នៃមហាអនុតំបន់ទន្លេមេគង្គ ដែលគ្រោងនឹងធ្វើនៅខែកក្កដាខាងមុខនេះ។
កិច្ចពិភាក្សានេះត្រូវបានធ្វើឡើងនៅសាលប្រជុំអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន(NACD) ដែលដឹកនាំដោយលោកឧត្ដមសេនីយ៍ឯក ជ័យ បុប្ផា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា និងលោក ឆាវ៉ាលុត តុងឈីវ(Chavalut tongchiaw) ដែលជាទីប្រឹក្សាទទួលបន្ទុកគ្រឿងញៀនអមស្ថានទូតថៃប្រចាំនៅកម្ពុជា ដោយមានការញ្ជើញចូលរួមពីនាយកដ្ឋាននីតិកម្ម អប់រំ និងស្តារនីតិសម្បទា។
ក្នុងនាមថ្នាក់ដឹកនាំស្ថាប័នប្រយុទ្ធប្រឆាំងគ្រឿងញៀនយើងទាំងពីរ ប្រធានប្រតិភូកម្ពុជា-ថៃ បានសម្តែងនូវការស្វាគមន៍ទៅវិញទៅមកដោយបានបង្ហាញពីស្មារតីកិច្ចសហប្រតិបត្តិការជួយគ្នាទៅវិញទៅមកក្នុងការងារប្រយុទ្ធប្រឆាំងគ្រឿងញៀន ពិសេសលើការបង្ការទប់ស្កាត់បទល្មើសគ្រឿងញៀនឆ្លងកាត់ព្រំដែនប្រទេសទាំង ២ និងការងារព្យាបាល ស្តារនីតិសម្បទា បណ្តុះបណ្តាលវិជ្ជាជីវៈដល់អ្នកញៀនគ្រឿងញៀននៅកម្ពុជា។ នេះបើយោងតាម NACD។
ប្រធានប្រតិភូកម្ពុជា-ថៃបានជជែកពិភាក្សាពីគម្រោងការផ្លាស់ប្តូរបទពិសោធន៍របស់យុវជនមកពីប្រទេសទាំង ៦ នៃមហាអនុតំបន់ទន្លេមេគង្គមានកម្ពុជា ថៃ ចិន ឡាវ វៀតណាម មីយ៉ាន់ម៉ា លើការធ្វើទស្សនកិច្ចតំបន់ប្រឈមនឹងបញ្ហាគ្រឿងញៀនពីប្រទេសចិន ថៃ ឡាវ ដោយប្រើមធ្យោបាយធ្វើដំណើរតាមផ្លូវអាកាស ផ្លូវទឹក និងផ្លូវគោក ដែលគ្រោងធ្វើខែកក្កដា ឆ្នាំ ២០២២ខាងមុខ និងបានជជែកពិភាក្សាផងដែរពីការជួយដល់មជ្ឈមណ្ឌលជាតិព្យាបាល ស្តារនីតិសម្បទាដល់អ្នកញៀនគ្រឿងញៀនដោយស្ម័គ្រចិត្តនិងផ្អែកលើសហគមន៍ នៅខេត្តព្រះសីហនុ៕
