ភ្នំពេញៈ កម្មវិធីការគ្រប់គ្រងធនធានទឹក និងការផ្លាស់ប្តូរកសិកម្មនៅកម្ពុជាហៅកាត់ថា (WAT4CAM) ជំហានទី១ បានបើកវគ្គបណ្តុះបណ្តាលមួយនៅថ្ងៃសុក្រ ទី ២៨ ខែមករា ស្តីពី ”គោលនយោបាយសុវត្ថិភាពសង្គម ការដោះស្រាយផលប៉ះពាល់ ការពិគ្រោះយោបល់ និងការស្ទង់មតិ” ដែលមានអ្នកចូលរួមមកពីខេត្តគោលដៅចំនួន ៥។
វគ្គបណ្តុះបណ្តាលនេះមានគោលបំណង ដើម្បី៖«ការពិគ្រោះយោបល់ និងធ្វើការសិក្សាអំពីសេដ្ឋកិច្ចសង្គម និងគោលនយោបាយសុវត្ថិភាពសង្គម និងការដោះស្រាយផលប៉ះពាល់ដោយបង្ហាញវិធីសាស្ត្រ»។ ការដោះស្រាយផលប៉ះពាល់ដោយបង្ហាញវិធីសាស្ត្រមានដូចជា៖បង្ហាញពីវិធីសាស្ត្រក្នុងការស្ទង់មតិ, បង្ហាញពីឧបករណ៍ស្ទង់មតិ និងការអនុវត្តនៅទីតាំងគម្រោងផ្ទាល់, បង្ហាញពីការវិភាគទិន្នន័យដែលប្រមូលបាន និងបង្ហាញពីលទ្ធផលក្រោយការស្ទង់មតិ។ នេះបើយោងតាមក្រសួងធនធានទឹក និងឧតុនិយម។
ការបើកវគ្គបណ្តុះបណ្តាលនេះត្រូវបានដឹកនាំដោយ លោក សែម សំណាង ប្រធានគ្រប់គ្រងកម្មវិធី ដែលតំណាងឱ្យលោកម៉ៅ ហាក់ នាយកកម្មវិធី WAT4CAM ហើយត្រូវបានរៀបចំឡើងដោយទីប្រឹក្សាបច្ចេកទេស TA-INFRA ដែលមានការចូលរួមពីមន្ត្រី PIU មកពីខេត្តគោលដៅដូចជា៖ ខេត្តបាត់ដំបង ខេត្តសៀមរាប ខេត្តព្រះវិហារ ខេត្តកំពង់ធំ និងខេត្តកណ្តាល ព្រមទាំងមន្ត្រី PMU ផងដែរ សរុបសិក្ខាកាមចូលរួមមានចំនួន ២០នាក់៕