ភ្នំពេញៈ ក្រសួងសាធារណការ និងដឹកជញ្ជូនប្រកាសហាមឃាត់ការអនុញ្ញាតឱ្យរថយន្តចូលត្រួតពិនិត្យលក្ខណៈបច្ចេកទេស ឬចុះបញ្ជីផ្តល់បណ្ណសម្គាល់ និងបំពាក់ស្លាកលេខសម្គាល់យានជំនិះកែច្នៃដំឡើងម៉ូដែលរថយន្ត ដោយមិនត្រឹមត្រូវតាមលក្ខណៈបច្ចេកទេស ហើយក៏ព្រមានបិទយានដ្ឋាន កែច្នៃរថយន្ត ដែលដំឡើងខុសបច្ចេកទេសនោះទៀតផង។
លិខិតជូនដំណឹងរបស់ក្រសួងសាធារណការ និងដឹកជញ្ជូនស្តីពីការកែច្នៃដំឡើងម៉ូដែលរថយន្ត ដោយគ្មានការអនុញ្ញាតដែលភ្នំពេញប៉ុស្តិ៍ទទួលបាននៅថ្ងៃទី ៩ មេសា ឱ្យដឹងថា កន្លងមកក្រសួងសាធារណការ និងដឹកជញ្ជូនសង្កេតឃើញថា មានរថយន្តគ្រួសារមួយចំនួនបានកែច្នៃដំឡើងម៉ូដែលរថយន្ត ដោយមិនត្រឹមត្រូវតាមលក្ខណៈបច្ចេកទេស។ គ្មានការអនុញ្ញាតពីក្រសួងសាធារណការ និងដឹកជញ្ជូន ដែលបានបណ្តាលឱ្យប៉ះពាល់ដល់ផ្នែកសុវត្ថិភាពរបស់យាន និងបានធ្វើឱ្យប្រែប្រួលអត្តសញ្ញាណសម្គាល់របស់រថយន្ត។
ក្រសួងបញ្ជាក់ថា សកម្មភាពនេះ ផ្ទុយពីមាត្រា ១៩ នៃអនុក្រឹត្យលេខ ១៨០ អនក្រ.បក ចុះថ្ងៃទី ៣ ខែវិច្ឆិកា ឆ្នាំ ២០០៨ ស្តីពីការគ្រប់គ្រងយានដ្ឋានជួសជុល និងយានដ្ឋានកែច្នៃដំឡើងយានយន្ត។ ហេតុដូចនេះ ដើម្បីធានានូវសន្តិសុខសណ្តាប់ធ្នាប់ សុវត្ថិភាព និង ការគ្រប់គ្រងយានយន្តធ្វើចរាចរណ៍នៅលើផ្លូវថ្នល់ ក្រសួងសាធារណការ និងដឹកជញ្ជូន ជម្រាបជូនដល់ម្ចាស់រថយន្តទាំងអស់ដែលដំឡើងម៉ូដែលរថយន្តខុសបច្ចេកទេស គឺមិនអនុញ្ញាតឱ្យចេញបណ្ណសម្គាល់យានយន្តឡើយ។
លិខិតសរសេរថា៖ «រថយន្តដែលបានកែច្នៃដំឡើងម៉ូដែលរថយន្ត ដែលប៉ះពាល់ដល់ផ្នែកសុវត្ថិភាពរបស់យាន ដូចជា ប្រព័ន្ធចង្កូត ប្រព័ន្ធទ្រសាក់ស៊ី និងគ្រោងតួ និងគ្មានការអនុញ្ញាតពីក្រសួងសាធារណការ និងដឹកជញ្ជូន គឺមិនអនុញ្ញាតឱ្យចូលត្រួតពិនិត្យលក្ខណៈបច្ចេកទេស ឬចុះបញ្ជីផ្តល់បណ្ណសម្គាល់ និងបំពាក់ស្លាកលេខសម្គាល់យានជំនិះឡើយ»។
ជាមួយគ្នានោះ ក្រសួងសាធារណការក៏បានណែនាំដល់ម្ចាស់យានដ្ឋានកែច្នៃដំឡើងរថយន្តគ្រប់ ប្រភេទ កុំដំឡើងកែច្នៃយានយន្ត ខុសបច្ចេកទេស។ បើមិនដូច្នោះទេ ក្រសួងនឹងបិទផ្អាកសកម្មភាពនៃការធ្វើអាជីវកម្មនៅនឹងកន្លែង។
ក្រសួងបញ្ជាក់ថា៖ «យានដ្ឋានកែច្នៃដំឡើងរថយន្តដែលធ្វើសកម្មភាពកែច្នៃដំឡើងម៉ូដែលរថយន្ត ដែលប៉ះពាល់ដល់ផ្នែកសុវត្ថិភាពរបស់យាន និងមិនបានស្នើសុំការអនុញ្ញាតកែច្នៃដំឡើង ក្រសួងសាធារណការ និងដឹកជញ្ជូន នឹងចាត់វិធានការចុះបិទផ្អាកសកម្មភាពធ្វើអាជីវកម្មនៅទីតាំងយានដ្ឋាននោះ»។
តាមរយៈលិខិតជូនដំណឹង ក្រសួងសាធារណការ និងដឹកជញ្ជូនសង្ឃឹម និងជឿជាក់ថា ម្ចាស់រថយន្តទាំងអស់ និងម្ចាស់យានដ្ឋានកែច្នៃដំឡើងរថយន្តគ្រប់ប្រភេទចូលរួមអនុវត្តបទប្បញ្ញត្តិច្បាប់ និងលិខិតបទដ្ឋានគតិយុត្តជាធរមាន ប្រកបដោយស្មារតីទទួលខុសត្រូវខ្ពស់ទាំងអស់គ្នា។
លោក គឹម បញ្ញា នាយកអង្គការមូលនិធិបង្ការរបួសអាស៊ីថ្លែងនៅថ្ងៃទី ១០ ខែមេសាថា បញ្ហាកែច្នៃយានយន្តនេះពាក់ព័ន្ធនឹងការគោរពច្បាប់ប្រៀបដូចពាក្យមួយនិយាយថា ប្រទេស មានច្បាប់ គ្រួសារមានវិន័យ។ ហេតុនេះច្បាប់ គឺបានហាមប្រាម ចំពោះការកែច្នៃ ការឡើងស៊េរីផ្សេងៗខុសលក្ខណៈបច្ចេកទេសដែលប្រជាពលរដ្ឋមួយចំនួន ក៏ដូចជាយានដ្ឋានមួយចំនួន ចេះតែកែច្នៃឡើងស៊េរី ដោយមិនផ្អែកលើច្បាប់ ប៉ុន្តែបែរជាផ្អែកលើតម្រូវការរបស់បុគ្គលខ្លួនឯងនោះមិនត្រឹមត្រូវទេ។
លោកថ្លែងថា៖ «ប្រជាពលរដ្ឋ និងម្ចាស់យានដ្ឋាន មុនពេលធ្វើអ្វីដែលខុសពីលក្ខណៈបច្ចេកទេសដើម ខុសពីម៉ូដរបស់គេនោះ សូមសួរនាំទៅកាន់មន្ត្រីជំនាញសាធារណការ ដែលមានតេឡេក្រាមហ្វេសប៊ុកអីជាដើមហ្នឹង ផ្ញើសារសួរគេទៅថា ខ្ញុំកែយ៉ាងនេះយ៉ាងនោះ តើផ្ទុយនឹងច្បាប់ឬអត់។ អ៊ីចឹងមន្ត្រីជំនាញគេនឹងពិនិត្យមើលផ្លូវច្បាប់ ហើយគេអាចឆ្លើយតបវិញ»។
លោក គឹម បញ្ញា បានបញ្ជាក់ដែរថា ការដែលប្រជាពលរដ្ឋ និងម្ចាស់យានដ្ឋានធ្វើការកែច្នៃតាមចិត្តចង់របស់ខ្លួន ដោយមិនពិភាក្សាជាមួយមន្ត្រីជំនាញនឹងអាចពាក់ព័ន្ធនឹងបញ្ហាផ្លូវច្បាប់។ បើសិនជាច្បាប់មិនអនុញ្ញាត នោះគឺជារឿង ដែលមិនអាចទទួលយកបានឡើយ ហេតុនេះមន្ត្រីដែលកាន់ការងារផ្នែកច្បាប់នោះ នឹងត្រូវអនុវត្តច្បាប់មិនខាន៕
វីដេអូ៖