លោក វេង សុខុន និងមន្ត្រី ចុះពិនិត្យកសិដ្ឋានគោ។ រូបថត ក្រសួងកសិកម្ម
ភ្នំពេញៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានប្រាប់ទៅរដ្ឋបាល ខេត្តកំពង់ធំ ខេត្តសៀមរាប និងខេត្តព្រះវិហារ ឱ្យបញ្ឈប់ធ្វើអាជីវកម្មយកកម្រៃសេវានាំសត្វ និងផលិតផលមានដើមកំណើតពីសត្វចតុប្បាទ គោ ក្របី ជ្រូក ឆ្លងកាត់ និងចេញក្រៅខេត្ត។
យោងតាមរយៈលិខិតផ្ញើទៅកាន់អភិបាលខេត្តទាំង ៣ នេះ កាលពីថ្ងៃទី៥ ខែសីហា លោក វេង សាខុន បញ្ជាក់ថា ក្រសួងកសិកម្ម រុក្ខាប្រមាញ់ និងនេសាទបានពិនិត្យឃើញថា នាពេលកន្លងមក រដ្ឋបាលខេត្តកំពង់ធំ ខេត្តសៀមរាប និងខេត្តព្រះវិហារបានផ្តល់គោលការណ៍អនុញ្ញាតឱ្យក្រុមហ៊ុនឯកជនធ្វើអាជីវកម្មយកកម្រៃសេវានាំសត្វ និងផលិតផលមានដើមកំណើតពីសត្វចតុប្បាទ គោ ក្របី ជ្រូក ឆ្លងកាត់ និងចេញក្រៅខេត្តសាមីនីមួយៗ។
លោកបន្តថា ការអនុវត្ត បែបនេះគឺផ្ទុយទៅនឹងច្បាប់ លិខិតបទដ្ឋានគតិយុត្តនានាពាក់ព័ន្ធនឹងការផ្តល់សេវា និងការប្រមូលចំណូលមិនមែន សារពើពន្ធនៅរដ្ឋបាលថ្នាក់ក្រោមជាតិ ព្រមទាំងបង្កឱ្យមានផលប៉ះពាល់ដល់បរិយាកាសនៃការធ្វើអាជីវកម្មសត្វ និងផលិតផលមានដើមកំណើតពីសត្វរបស់វិស័យឯកជនផងដែរ។
លិខិតដដែលនេះបញ្ជាក់ថា ពាក់ព័ន្ធនឹងករណីនេះ ក្រសួងកសិកម្ម រុក្ខាប្រមាញ់ និងនេសាទស្នើឱ្យ រដ្ឋបាលខេត្តកំពង់ធំ ខេត្តសៀមរាប និងខេត្តព្រះវិហារ ត្រូវ៖ ១- និរាករណ៍នូវរាល់គោលការណ៍អនុញ្ញាតទាំងអស់ ដែលរដ្ឋបាលខេត្តសាមីនីមួយៗបានផ្តល់ជូនទៅ រូបវន្តបុគ្គល ឬនីតិបុគ្គលឱ្យធ្វើអាជីវកម្មប្រមូលកម្រៃសេវានាំសត្វ និងផលិតផលមានដើមកំណើតពីសត្វចតុប្បាទ គោ ក្របី ជ្រូក ឆ្លងកាត់ និងចេញក្រៅខេត្ត ដែលបាននិងកំពុងអនុវត្តនាពេលបច្ចុប្បន្ន។ ២- ជំរុញ និងណែនាំឱ្យប្រជាពលរដ្ឋ និងអ្នកពាក់ព័ន្ធដាក់ពាក្យស្នើសុំសេវានៅអង្គភាពច្រកចេញចូលតែ ១ និងបង់កម្រៃសេវាតាមការកំណត់នៅក្នុងលិខិតបទដ្ឋានគតិយុត្តដែលមានជាធរមាន។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ប្រាប់ភ្នំពេញប៉ុស្តិ៍នៅថ្ងៃទី៨ ខែសីហាថា ការយកកម្រៃសេវានាំសត្វរបស់រដ្ឋបាលខេត្តសៀមរាប ចាប់តាំងពីអភិបាលខេត្តមុនៗមកម្ល៉េះ ប៉ុន្តែ បច្ចុប្បន្ននេះ ក្រោមការគ្រប់គ្រងរបស់ លោក ទៀ សីហា អភិបាលខេត្តសៀមរាបបច្ចុប្បន្នមិនមានគោលការណ៍ឱ្យយកកម្រៃនេះទៀតទេ។
លោកថ្លែងថា៖ «ការយកភាស៊ីលើក្បាលសត្វដូចជាមិនមានទេ ជំនាន់ឯកឧត្តម ទៀ សីហានេះ»។
លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ ប្រាប់ភ្នំពេញប៉ុស្តិ៍នៅថ្ងៃទី៨ ខែសីហាថា រដ្ឋបាលខេត្ត នឹងអនុវត្តទៅតាមការណែនាំនេះ ព្រោះចាប់តាំងពីជំនាន់អភិបាលខេត្តមុនៗ ឱ្យអាជីវករនាំចេញសត្វបង់កម្រៃសេវាដើម្បីបានចំណូលយកមកអភិវឌ្ឍខេត្ត។
លោកថ្លែងថា៖ «ក្រោយមានបញ្ហាអ៊ីចឹង អន្តរក្រសួង គឺក្រសួងសេដ្ឋកិច្ច និងហិរញ្ញវត្ថុ និងក្រសួងកសិកម្មឱ្យបញ្ឈប់ យើងក៏និរាករណ៍ចោលតាមហ្នឹងទៅ។ អត់មានអីទេ»។
លោកស្រី នួន វល័ក្ខ នាយិករង និងអ្នកជាអ្នកនាំពាក្យរដ្ឋបាលខេត្តព្រះវិហារប្រាប់ ភ្នំពេញ ប៉ុស្តិ៍ នៅថ្ងៃទី ៨ ខែសីហាថា ការយកកម្រៃនីមួយៗ គឺអនុវត្តទៅតាមការកំណត់របស់ក្រសួងស្ថាប័នជាតិ ហើយករណីដែលក្រសួងកសិកម្មឱ្យបញ្ឈប់យកកម្រៃពីអាជីវកម្មនេះវិញរដ្ឋបាលខេត្តព្រះវិហារនឹងអនុវត្តទៅតាមការណែនាំនេះ។
លោកស្រីបន្តថា ការនាំសត្វចេញនៅក្នុងមូលដ្ឋានខេត្តព្រះវិហារមិនដែលមានក្រុមហ៊ុនធំៗនោះទេ ភាគច្រើនគឺជាក្រុមហ៊ុនតូចៗ តែប៉ុណ្ណោះ ដោយឡែកការយកកម្រៃលើការនាំចេញមាន់ គឺរដ្ឋបាលខេត្តមិនដែលយកទេ រដ្ឋបាលខេត្តយកតែការនាំចេញជ្រូក និងគោជាដើម។
លោកស្រីថ្លែងថា៖ «និយាយទៅបើក្រសួងកំណត់ថា បញ្ឈប់ឱ្យយកកម្រៃ យើងនឹងអនុវត្តទៅតាមថ្នាក់លើហើយ»។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទប្រាប់ ភ្នំពេញ ប៉ុស្តិ៍ នៅថ្ងៃទី ៨ ខែសីហាថា បើខេត្តទាំង៣នេះ មិនអនុវត្តតាមសេចក្តីណែនាំនេះទេ និងត្រូវទទួលរងពិន័យទៅតាមច្បាប់ ព្រោះរឿងនេះ មិនមែនជារឿងធម្មតាទេ ពីព្រោះទទួលបានការវាយតម្លៃពីអន្តរក្រសួង បន្ទាប់ពីមានការត្អូញត្អែរពីមហាជន។
លោកថ្លែងថា៖ «ខេត្តទាំង៣នេះ អនុវត្តផ្ទុយពីច្បាប់ជាធរមាន»។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាប្រាប់ ភ្នំពេញ ប៉ុស្តិ៍ នៅថ្ងៃទី ៨ ខែសីហា ស្វាគមន៍ចំពោះចំណាត់ការទាន់ពេលវេលា និងការគិតគូរខ្ពស់របស់រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ លើវិស័យចិញ្ចឹមសត្វនៅកម្ពុជា ទាំងការដឹកញ្ជូន និងការចិញ្ចឹម។
លោកបន្តថា ខេត្តទាំង ៣ នេះ អនុវត្តផ្ទុយទៅនឹងគោលការណ៍ណែនាំរបស់ក្រសួង និងរាជរដ្ឋាភិបាល ខណៈខេត្តផ្សេងទៀត មិនបានយកកម្រៃដូចខេត្តទាំង ៣ នេះទេ។
លោកថ្លែងថា៖ «បិទទាំង ៣ ខេត្តនេះ ដូចបិទនៅទូទាំងប្រទេសដែរ យើងខ្ញុំសូមស្វាគមន៍ចំណាត់ការដ៏ត្រឹមត្រូវនេះ»៕
