ពលរដ្ឋកំពុងឡើងជិះរថយន្តក្រុងនៅចំណតក្នុងខណ្ឌឫស្សីកែវ កាលពីខែមិថុនា ឆ្នាំ ២០២២។ ហេង ជីវ័ន
ភ្នំពេញៈ រដ្ឋាករស្វយ័តដឹកជញ្ជូនសាធារណៈ (City Bus) មានថ្នាក់ដឹកនាំថ្មី គឺលោក កែវ ចាន់ណារិទ្ធ ដែលបានឡើងមកកាន់តំណែងនេះជំនួសលោក អ៊ាង សុខឃីម។ ពិធីផ្ទេរតំណែងត្រូវបានធ្វើឡើងកាលពីថ្ងៃទី ០៧ ខែកញ្ញា នៅទីស្នាក់ការរដ្ឋាករស្វយ័តដឹកជញ្ជូនសាធារណៈរថយន្តក្រុង ក្រោមអធិបតីភាពលោក កើត ឆែ អភិបាលរងរាជធានីភ្នំពេញ។
នៅក្នុងពិធីនោះ អភិបាលរងរាជធានីភ្នំពេញ លោក កើត ឆែ បានថ្លែងផ្ដែផ្ដាំលោក កែវ ចាន់ណារិទ្ធ ដែលជាអភិបាលរដ្ឋាករស្វយ័តដឹកជញ្ជូនសាធារណៈថ្មី ឱ្យបន្តនិរន្តរភាពក្នុងការផ្តល់សេវាដឹកជញ្ជូនសាធារណៈរថយន្តក្រុង (City Bus) ការផ្តល់សេវាដឹកជញ្ជូនតាមកាណូតសាធារណៈ (Taxi Boat) និងថែរក្សាសមិទ្ធផលនានារបស់រដ្ឋាករ។
លោកសង្កត់ធ្ងន់ថា ក្នុងនាមជាអភិបាលរដ្ឋាករស្វយ័តដឹកជញ្ជូនសាធារណៈថ្មី លោក កែវ ចាន់ណារិទ្ធ ត្រូវដឹកនាំបម្រើសេវាដឹកជញ្ជូនសាធារណៈជូនប្រជាពលរដ្ឋឱ្យកាន់តែប្រសើរ ប្រកបដោយស្មារតីទទួលខុសត្រូវ ប្រសិទ្ធភាព និងគុណភាព។
សូមបញ្ជាក់ថា កម្ពុជាបានបង្កើតឱ្យមានរដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) នៅរាជធានីភ្នំពេញក្នុងឆ្នាំ ២០១៥ ក្នុងគោលបំណងផ្តល់ផលប្រយោជន៍ដល់ប្រជាពលរដ្ឋ ធ្វើយ៉ាងណាបង្កភាពងាយស្រួលក្នុងការធ្វើដំណើរធានាសុវត្ថិភាព ផាសុកភាព សន្សំសំចៃពេលវេលា កាត់បន្ថយការកកស្ទះចរាចរណ៍ ការប្រើប្រាស់ថាមពលខ្ជះខ្ជាយ ឧស្ម័នបំពុលបរិស្ថាន និងផលប៉ះពាល់សុខុមាលភាពប្រជាពលរដ្ឋក្នុងរាជធានីភ្នំពេញ។
រថយន្តក្រុងសាធារណៈដែលដំណើរការនៅកម្ពុជាសព្វថ្ងៃ បានទទួលជំនួយពីប្រទេសចិន និងជប៉ុន ដែលមានចំនួនជាង ២០០ គ្រឿង ដែលបានផ្តល់សេវាដឹកជញ្ជូនសាធារណៈមានចំនួន ១៣ ខ្សែ ជូនប្រជាពលរដ្ឋនៅក្នុងរាជធានីភ្នំពេញ។
ថ្មីៗនេះ ក្រោមជំនួយរបស់ប្រទេសកូរ៉េខាងត្បូង កម្ពុជាបានទទួលរថយន្ដក្រុងសាធារណៈថ្មីចំនួន ២០០ គ្រឿងទៀត ដែលរថយន្តក្រុងថ្មីពីកូរ៉េខាងត្បូងនេះ អាជ្ញាធរក្រុងបញ្ជាក់ប្រាប់ថា កំពុងសិក្សានិងរៀបចំផែនការដាក់ឱ្យដំណើរការនាពេលខាងមុខ៕
