ក្រុមការងារនៃអាជ្ញាធរជាតិអប្សរាកំពុងជួសជុលច្រាំងកសិន្ធុផ្នែកខាងជើងស្ពានហាលនៃប្រាសាទអង្គរវត្ត។ រូបថត អាជ្ញាធរជាតិអប្សរា
សៀមរាបៈ ច្រាំងកសិន្ធុផ្នែកខាងជើងស្ពានហាលនៃប្រាសាទអង្គរវត្តប្រវែង ២០ ម៉ែត្រទៀតនឹងបញ្ចប់ការជួសជុលនៅខែវិច្ឆិកា ឆ្នាំ ២០២២ ខណៈពលរដ្ឋខ្មែររស់នៅប្រទេសកាណាដា ក៏បានបរិច្ចាគថវិកាជួយជួសជុលចម្លាក់ទេវតាទាញព្រ័ត្រតួទី ៨ នៅខ្លោងទ្វារតាកាវផងដែរ។
ក្រុមការងាររបស់នាយកដ្ឋានអភិរក្សប្រាសាទ និងបុរាណវិទ្យានៃអាជ្ញាធរជាតិអប្សរាបានឱ្យដឹងថា គម្រោងជួសជុលច្រាំងកសិន្ធុផ្នែកខាងជើងស្ពានហាលនៃប្រាសាទអង្គរវត្តប្រវែង ២០ ម៉ែត្រថ្មីទៀតអាចនឹងបញ្ចប់នៅមុនការគ្រោងទុក។
បន្ទាប់ពីការងាររៀបកាំជណ្តើរថ្មបាយក្រៀមថ្មីបានរួចរាល់ ការងាររៀបឡើងវិញនូវកាំជណ្តើរថ្មភក់បុរាណត្រូវបានរៀបតាមលំនាំដើម មានដំណើរការឆាប់រហ័ស ដែលមកដល់ពេលនេះ នៅសល់តែកាំជណ្តើរថ្មភក់ផ្នែកខាងលើប្រហែល ២ ទៅ ៣ ដុំទៀតប៉ុណ្ណោះ នឹងត្រូវធ្វើបង្ហើយឆាប់ៗនេះ។
បុរាណវិទូនៃនាយកដ្ឋានអភិរក្សប្រាសាទ និងបុរាណវិទ្យារបស់អាជ្ញាធរជាតិអប្សរា និងជាប្រធានការដ្ឋានជួសជុលច្រាំងកសិន្ធុអង្គរវត្តជ្រុងខាងជើង លោកស្រី នង បូរ៉ាវី មានប្រសាសន៍ថា ការងារជួសជុលច្រាំងកសិន្ធុ ផ្នែកខាងជើងស្ពានហាលនៃប្រាសាទអង្គរវត្តអាចនឹងបញ្ចប់នៅអំឡុងខែវិច្ឆិកា ឆ្នាំ ២០២២ ដោយសារតែការរៀបកាំជណ្តើរថ្មភក់បុរាណត្រូវតាមលំនាំដើមមានដំណើរការរលូនល្អ មិនរើផ្គុំច្រើនលើកច្រើនសា។
លោកស្រី នង ប៉ូរ៉ាវី ឱ្យដឹងទៀតថា បច្ចុប្បន្ននេះ ការងារជួសជុលច្រាំងកសិន្ធុផ្នែកខាងជើងស្ពានហាលនៃប្រាសាទអង្គរវត្ត ដែលនៅសេសសល់ប្រហែល ១០ ភាគរយប៉ុណ្ណោះ ដូចជាការសម្អាត និងបំពេញថ្មភក់ថ្មីជំនួសថ្មភក់ចាស់ដែលបាត់បង់ ដើម្បីឱ្យកាំជណ្តើរមានលំនឹងឡើងវិញ។
គម្រោងជួសជុលច្រាំងកសិន្ធុផ្នែកខាងជើងស្ពានហាលនៃប្រាសាទអង្គរវត្ត បានចាប់ផ្ដើមឡើងតាំងពីអំឡុងខែមីនា ឆ្នាំ ២០២២ មក ដែលរហូតមកដល់ពេលនេះមានរយៈពេលប្រមាណ ៧ ខែមកហើយ។
ចាប់តាំងពីឆ្នាំ ២០១៣ រហូតមកដល់ឆ្នាំ ២០២២ អាជ្ញាធរជាតិអប្សរាបានអនុវត្តគម្រោងជួសជុលច្រាំងកសិន្ធុ អង្គរវត្ត ជ្រុងខាងជើងចំនួន ៧ ដំណាក់កាលរួចមកហើយ បើគិតជាប្រវែងសរុបចំនួនប្រមាណ ១៤៣ ម៉ែត្រ។
ជាមួយគ្នានេះ ប្រជាពលរដ្ឋខ្មែរមួយគ្រួសារដែលកំពុងរស់នៅប្រទេសកាណាដាបានរួមគ្នាបរិច្ចាគថវិកាមួយចំនួន ដើម្បីជួយដល់ដំណើរការជួសជុលរូបចម្លាក់ថ្មទេវតាទាញព្រ័ត្រចំនួនមួយនៅខ្លោងទ្វារតាកាវនៃក្រុងអង្គរធំ ជាមួយអាជ្ញាធរជាតិអប្សរា ដោយសារតែទឹកចិត្តស្រឡាញ់ មានបំណងចង់ចូលរួមអភិរក្សប្រាសាទបុរាណ និងជាសម្បត្តិបេតិកភណ្ឌដែលជាស្នាដៃដ៏មានតម្លៃរបស់បុព្វបុរសខ្មែរឱ្យស្ថិតនៅគង់វង្សជាបន្តទៀត សម្រាប់កូនខ្មែរជំនាន់ក្រោយ។
ស្ថាបត្យករ និងជាក្រុមការងារបច្ចេកទេសជួសជុលខ្លោងទ្វារតាកាវ កញ្ញា ម៉េង សុវណ្ណលីលីន បានសម្តែងការត្រេកអរ និងថ្លែងអំណរគុណ ចំពោះពលរដ្ឋខ្មែរ ដែលកំពុងរស់នៅប្រទេសកាណាដាបានជួយឧបត្ថម្ភចំពោះដំណើរការជួសជុល អភិរក្សនៅខ្លោងទ្វារតាកាវនេះ។
បច្ចុប្បន្ន ក្រុមការងារនៃអាជ្ញាធរជាតិអប្សរាកំពុងបន្តជួសជុលរូបចម្លាក់ទេវតាទាញព្រ័ត្រតួទី ៨ តាមរយៈជំនួយថវិកាពីសប្បុរសជនខ្មែរនៅប្រទេសកាណាដានេះ។
ប៉ុន្តែការងារជួសជុលរូបទេវតាទាញព្រ័ត្រនេះ មិនអាចធ្វើបន្តត្រឹមតែតួទី ៨ ប៉ុណ្ណោះទេ គឺចាំបាច់ទាមទារឱ្យមានការជួសជុលតួទី ៩ ស្របពេលជាមួយគ្នា ពីព្រោះតែរចនាសម្ព័ន្ធខ្លួននាគទី ៨ និងទី ៩ មានទំនាក់ទំនង និងគ្នា។
គម្រោងជួសជុលខ្លោងទ្វារតាកាវមាន ២ ផ្នែក គឺដំណាក់កាលទី ១ ក្រុមការងារបានជួសជុលពង្រឹងតួខ្លោងទ្វារ និងដំណាក់កាលទី ២ គឺជួសជុលចម្លាក់ទេវតា និងចម្លាក់អសុរាទាញព្រ័ត្រនៅអមសងខាងស្ពានហាលបានចំនួន ៧ តួរួចហើយ៕
