ភ្នំពេញៈ លោកនាយករដ្ឋមន្ត្រី ហ៊ុន សែន និងប្រធានរដ្ឋសភាវៀតណាមឯកភាពគ្នាជំរុញកិច្ចសហប្រតិបត្តិការឱ្យកាន់តែស៊ីជម្រៅថែមទៀត រវាងប្រទេសទាំង ២ ឱ្យបានគ្រប់វិស័យ។
ការឯកភាពនេះធ្វើឡើងក្នុងជំនួបរវាងលោក ហ៊ុន សែន និងលោក វឿង ឌីញហ្វេ (VuongDinh Hue) ប្រធានរដ្ឋសភាវៀតណាម នាថ្ងៃទី ២០ ខែវិច្ឆិកា ក្នុងឱកាសលោកមកបំពេញទស្សនកិច្ចនៅកម្ពុជារយៈពេល៥ថ្ងៃចាប់ពីថ្ងៃទី ១៩ ដល់ថ្ងៃទី ២៣ ខែវិច្ឆិកា។
លោក អ៊ាង សុផល្លែត ជំនួយការផ្ទាល់លោកហ៊ុន សែនប្រាប់អ្នកសារព័ត៌មានក្រោយជំនួបនេះថា លោកឌីញហ្វេបានសម្ដែងការរីករាយ ចំពោះទំនាក់ទំនងរវាងប្រទេសទាំង ២ ជាពិសេសក្នុងខួប ៥០ ឆ្នាំ នៃទំនាក់ទំនងការទូតរវាងប្រទេសទាំង ២ ដែលមានកម្មវិធីជាច្រើន បានរៀបចំឡើងក៏ដូចជាការផ្លាស់ប្ដូរទស្សនកិច្ចទាំងថ្នាក់ដឹកនាំ ទាំងរវាងប្រជាជន និងយុវជន។
លោក អ៊ាង សុផល្លែត បញ្ជាក់ថា លោកឌីញហ្វេក៏បានសម្ដែងនូវការសាទរចំពោះលោកហ៊ុន សែនដែលបានគ្រប់គ្រងជំងឺកូវីដ ១៩ បានយ៉ាងជោគជ័យ បានបើកប្រទេសឡើងវិញ និងបើកសេដ្ឋកិច្ចឡើងវិញ។
លោក ឌីញហ្វេថា កម្ពុជាមានការអភិវឌ្ឍយ៉ាងឆាប់រហ័ស និងបានដឹកនាំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធទទួលបានជោគជ័យយ៉ាងធំធេងហើយលោកបានអបអរសាទរ។
បើតាមលោក អ៊ាង សុផល្លែត លោកឌីញហ្វេបានសម្តែងសេចក្តីរីករាយចំពោះកិច្ចសហប្រតិបត្តិការរវាងប្រទេសទាំង២ ជាពិសេសកិច្ចសហប្រតិបត្តិការលើវិស័យពាណិជ្ជកម្ម និងអះអាងថា ទំហំពាណិជ្ជកម្មរវាងប្រទេសទាំង ២ បានកើនឡើងដល់ ១០ ពាន់លានដុល្លារ នៅក្នុងឆ្នាំនេះ។
លោក អ៊ាង សុផល្លែត បញ្ជាក់ថា៖ «ឯកឧត្តម [លោកឌីញហ្វេ] ក៏បានឆ្លៀតឱកាសនេះ ស្នើសុំឱ្យមានកិច្ចសហប្រតិបត្តិការកាន់តែស៊ីជម្រៅថែមទៀតរវាងប្រទេសទាំង ២ និងឱ្យបានគ្រប់វិស័យ។
លោក ហ៊ុន សែន ថ្លែងអំណរគុណដល់លោក ឌីញហ្វេ ចំពោះការវាយតម្លៃនៃទំនាក់ទំនងរវាងប្រទេសទាំង ២ ផង និងលទ្ធផលនៃកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធផង។
លោក អ៊ាង សុផល្លែត បញ្ជាក់ថា៖ «សម្ដេចតេជោបានឯកភាពជាមួយសំណើរបស់ឯកឧត្តមប្រធានសភាវៀតណាម ក្នុងការជំរុញកិច្ចសហប្រតិបត្តិការឱ្យកាន់តែស៊ីជម្រៅថែមទៀត។ សម្ដេចតេជោ ហ៊ុន សែន បានមានប្រសាសន៍ថា ដៃគូសេដ្ឋកិច្ចល្អគឺនាំទៅដល់ការលើកកម្ពស់ទំនាក់ទំនងទាំងផ្នែកនយោបាយនិងវិស័យដទៃទៀត»។
កាលពីថ្ងៃទី ១៩ ខែវិច្ឆិកាលោក ហេង សំរិន ប្រធានរដ្ឋសភាកម្ពុជានិងលោកឌីញហ្វេ បានធ្វើជាអធិបតីក្នុងពិធីចុះហត្ថលេខាលើអនុស្សរណៈយោគយល់គ្នារ (MoU) រវាងអគ្គលេខាធិការដ្ឋានរដ្ឋសភាកម្ពុជា និងខុទ្ទកាល័យរដ្ឋសភាវៀតណាម នៅក្នុងការពង្រឹងពង្រីកកិច្ចសហប្រតិបត្តិការឱ្យកាន់តែស៊ីជម្រៅ ទូលំទូលាយ ឆ្លើយតបតាមបរិបទជាក់ស្ដែង។
MoU នេះមានគោលបំណងដើម្បីបន្តពង្រឹងកិច្ចសហប្រតិបត្តិការគ្រប់កម្រិតតាមរយៈការផ្លាស់ប្តូរទស្សនកិច្ច នៃថ្នាក់ដឹកនាំជាន់ខ្ពស់ ការផ្លាស់ប្ដូរបទពិសោធន៍រវាងគណៈកម្មការជំនាញ និងមន្ត្រីជំនាញ ការចែករំលែកព័ត៌មាន និងការគាំទ្រគ្នាទៅវិញទៅមក នៅក្នុងវេទិកាអន្តរសភា ក្នុងតំបន់ និងអន្តរជាតិ។
លោក យ៉ង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព ប្រាប់ភ្នំពេញប៉ុស្តិ៍ថា កិច្ចសហការរវាងប្រទេសមួយទៅប្រទេសមួយ ដោយឈរលើគោលការណ៍ស្មើភាព និងមានផលប្រយោជន៍ទៅវិញទៅមកគឺជារឿងប្រសើរ ព្រោះវាអាចជួយឱ្យមានសន្តិភាព ស្ថិរភាព និងការរីកចម្រើនខាងសេដ្ឋកិច្ច។
ប៉ុន្តែ ក៏ត្រូវតែមានការពិចារណាឱ្យបានស៊ីជម្រៅ ថែមទៀតផងដែរ អំពីកិច្ចសហការទាំងឡាយណាដែលអាចធ្វើឱ្យប៉ះពាល់ដល់ផលប្រយោជន៍ ឬក៏អារម្មណ៍របស់ប្រជាពលរដ្ឋ។
លោកថ្លែងថា៖ «កិច្ចសហការខ្លះក៏វាអាចនឹងមានការមន្ទិលពីប្រជាពលរដ្ឋ ក៏ត្រូវតែមានការបកស្រាយដែរ ពីព្រោះថា បញ្ហាប្រវត្តិសាស្ត្រ បញ្ហាទំនាក់ទំនងពីអតីតកាល អីហូរហែ ក៏វាធ្វើឱ្យប្រជាពលរដ្ឋខ្លះអាចនឹងមានការមិនទាន់យល់ច្បាស់ ឬក៏មានការប្រពេចស្រពិល ក៏គួរ មានការបញ្ជាក់បន្ថែមឱ្យគាត់បានយល់ឱ្យគាត់បានដឹង ដើម្បីងាយស្រួលនៅក្នុងការជំរុញ កិច្ចសហការនោះខិតទៅមុខកាន់តែប្រសើរ ហើយនិងធ្វើឱ្យមានការវិវឌ្ឍរីកចម្រើនសម្រាប់ប្រទេសទាំង ២ ដែរ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា ថ្លែងថា ក្នុងការបង្ហាញជំហរចំពោះគ្នាទៅវិញទៅមក មេដឹកនាំនៃប្រទេសទាំង ២ តែងតែលើកឡើងពីការប្តេជ្ញាចិត្តក្នុងការពង្រឹង ពង្រីក និងលើកកម្ពស់ទំនាក់ទំនងរវាងប្រទេសទាំង ២ ឱ្យឈានដល់កម្រិតថ្មីមួយ ដែលនាំមកនូវលទ្ធផលជាផ្លែផ្កា និងផលប្រយោជន៍ពិតប្រាកដដល់ប្រជាជននៃប្រទេសទាំង ២ ព្រមទាំងការរួមចំណែកជាវិជ្ជមានដល់សន្តិភាព ស្ថិរភាព កិច្ចសហប្រតិបត្តិការ និងវិបុលភាពក្នុងតំបន់ និងពិភពលោក។
លោកប្រាប់ភ្នំពេញប៉ុស្តិ៍នាថ្ងៃទី ២០ ខែវិច្ឆិកាថា ផ្អែកលើទិដ្ឋភាពប្រវត្តិសាស្ត្រ ភូមិសាស្ត្រ និងនយោបាយ ការពង្រឹងទំនាក់ទំនង និងកិច្ចសហប្រតិបត្តិការរវាងប្រទេសទាំង ២ ពិតជាមិនអាចខ្វះបានឡើយ។
លោក ភា ថ្លែងថា៖ «ដូច្នេះ ប្រទេសទាំង ២ ចាំបាច់ត្រូវបន្តរួមរស់ជាមួយគ្នាដោយសុខសន្តិភាព គោរពគ្នាទៅវិញទៅមកចំពោះអធិបតេយ្យភាព ឯករាជ្យភាព និងបូរណភាពទឹកដី មិនជ្រៀតជ្រែកកិច្ចការផ្ទៃក្នុងរវាងគ្នា ដោះស្រាយបញ្ហាដោយសន្តិវិធី និងសហប្រតិបត្តិការលើគ្រប់វិស័យដែលផ្តល់ផលប្រយោជន៍ទៅវិញទៅមក ដែលស្របទៅនឹងបាវចនានៃទំនាក់ទំនងដែលបានអនុម័តដោយប្រទេសទាំង ២ គឺភាពជាអ្នកជិតខាងល្អ មិត្តភាពជាប្រពៃណី និងកិច្ចសហប្រតិបត្តិការគ្រប់ជ្រុងជ្រោយ ប្រកបដោយនិរន្តរភាព និងយូរអង្វែង រវាងប្រទេសទាំង ២ នាពេលអនាគត»។