ពោធិ៍សាត់ៈ ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ លោក ស ខេង បានណែនាំដល់មេឃុំ និងមេប៉ុស្ដិ៍ ឱ្យជ្រើសរើសមន្រ្តី សម្រាប់បម្រើការងារនៅតាមឃុំ ឬប៉ុស្តិ៍ជាប្រជាពលរដ្ឋ ដែលរស់នៅក្នុងភូមិ ឬឃុំដែលពួកគាត់កំពុងបម្រើការងារផ្ទាល់ ដោយសារនៅចុងសប្ដាហ៍ ឬថ្ងៃឈប់សម្រាក ប៉ុស្ដិ៍បូលិសក្នុងមូលដ្ឋាននោះ នឹងមិនមានអ្នកធ្វើការឡើយ ព្រោះមន្ត្រីមូលដ្ឋានទាំងអស់នោះត្រឡប់ទៅលេងភូមិកំណើតអស់។
លោកថ្លែងដូចនេះ ក្នុងពិធីប្រកាសចូលកាន់មុខតំណែងអភិបាលខេត្តពោធិ៍សាត់ កាលពីថ្ងៃទី ២១ ខែវិច្ឆិកា។ លោកបញ្ជាក់ថា៖«ពេលប្រឡងសម្រាប់ជ្រើសរើស[មន្ត្រី] ឈ្មោះអ្នកប្រឡងនោះ វាមិនមែននៅភូមិហ្នឹងទេ...ភូមិស្ដៅ ភូមិអូរហ្នឹងទេ...វានៅឯណាឯណីនោះ ឬនៅផ្សារដើមថ្កូវ អីជាដើម។ ដល់អ៊ីចឹងមានប៉ូលិសឯណានៅធ្វើការនៅហ្នឹងទៀត វាមិននៅខ្វះដដែល»។
ទោះយ៉ាងណា លោក ស ខេង ក៏បានបញ្ជាក់អំពីនីតិវិធី នៃការជ្រើសរើស ដោយមានការធ្វើសម្ភាសន៍ ការណែនាំ ការធ្វើតេស្ដទឹកនោម ក៏ដូចជានីតិវិធីផ្សេងៗដែលច្បាប់បានតម្រូវ។
លោកថ្លែងថា៖ «រើសហើយធ្វើម៉េច? ធ្វើការណែនាំត្រូវតែមានលិខិតស្នាមណែនាំ របៀបម៉េចៗ សម្ភាសរបៀបម៉េច...រួចហើយត្រូវធ្វើតេស្ដទឹកនោមដូចខ្ញុំថាអ៊ីចឹង ប៉ុន្ដែមិនមែនឱ្យទៅធ្វើការភ្លាម បានក្របខ័ណ្ឌភ្លាមទេ ទៅរៀនសិន។ នេះគឺជាវិធានការថ្មី ដើម្បីពង្រឹងបរិមាណក្របខ័ណ្ឌឱ្យបានគ្រប់ និងមានគុណភាព»។
យោងតាមប្រសាសន៍របស់លោករដ្ឋមន្ត្រីក្រសួងមហាផ្ទៃ មេឃុំ និងមេប៉ុស្ដិ៍ ត្រូវខិតខំក្ដោបក្ដាប់គោលការណ៍នេះឱ្យបានជាប់ ប្រសិនបើមន្ត្រីបំពេញការងារនៅមូលដ្ឋានជាក្រុមគ្រួសារ ឪពុកម្ដាយ សាច់ញាតិ នៅក្នុងភូមិសាស្រ្តជាមួយគ្នាស្រាប់ ទើបធ្វើឱ្យប៉ុស្ដិ៍ប៉ូលិសរឹងមាំ និងអាចការពារសន្តិសុខនៅតាមភូមិឃុំបានល្អ លើកលែងតែបទល្មើលធំៗប៉ុណ្ណោះដែលពិបាកដោះស្រាយ។ ប៉ុន្តែសម្រាប់បទល្មើលកំប៉ិកកំប៉ុកនៅមូលដ្ឋាន ដូចជា ល្បែងស៊ីសង ចោរលួច និងចរាចរគ្រឿងញៀនជាដើម គឺវាងាយស្រួល។
ដោយឡែក សម្រាប់អង្គការសង្គមស៊ីវិលវិញ បានបង្ហាញជំហរគាំទ្រប្រសាសន៍របស់លោក ស ខេង ព្រោះវិធីសាស្រ្តនេះ អាចពង្រឹងសុវត្ថិភាពភូមិឃុំបានប្រសើរជាងមុន ប្រសិនបើមានមន្ត្រីប្រចាំការនៅមូលដ្ឋានជាប្រចាំ។
លោក ហេង គឹមហុង ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា (CYN) លើកឡើងថា៖«ខ្ញុំមានការពេញចិត្តនូវគោលបំណងដែលមានការជ្រើសរើសអាជ្ញាធរមូលដ្ឋាន ដែលអាចធ្វើឱ្យពួកគេបំពេញការងារបានល្អប្រសើរនៅមូលដ្ឋានរបស់ពួកគេ។ ជាពិសេស គឺអាចអន្តរាគមន៍បានទាន់ពេលវេលានៅពេលដែលមានបញ្ហាពេលយប់ព្រលប់»។
យ៉ាងណាក្ដី មន្ត្រីសង្គមស៊ីវិលរូបនេះបានបង្ហាញការព្រួយបារម្ភថា អាចនឹងបង្កឱ្យមានអំពើពុករលួយ បក្ខពួកនិយម ឬក៏ការជ្រើសរើសមនុស្សដែលមិនមានសមត្ថភាពពិតប្រាកដ។ ចំណែក អ្នកដែលមានសមត្ថភាពពិតប្រាកដនោះ អាចនឹងបាត់បង់ឱកាសចូលបម្រើការងារមន្ត្រីរាជការ។
លោកគឹមហុងថា៖«ជាអនុសាសន៍សម្រាប់ការជំរុញឱ្យការជ្រើសរើសនេះប្រកបដោយប្រសិទ្ធភាពនោះ គឺទី១ ការជ្រើសរើសប៉ូលិសអីហ្នឹង ត្រូវតែមានការប្រឡងដែលមានគណៈមេប្រយោគមកពីថ្នាក់ខេត្ត ឬក៏មកពីក្រសួងមហាផ្ទៃ ដើម្បីប្រឡងប្រកបដោយតម្លាភាព បន្ទាប់មកមានការធ្វើសម្ភាសន៍អីជាដើម។ ទី២ នោះ គឺត្រូវតែមានសេចក្ដីណែនាំ ឬនីតិវិធីបញ្ជាក់ជាក់លាក់ ដោយកំណត់ ដើម្បីធានាបានថា នឹងមិនមានអំពើពុករលួយ ឬក៏ទំនាស់ផលប្រយោជន៍ ធ្វើម៉េចកុំឱ្យមានការជ្រើសរើសតែបងប្អូន សាច់ឈាម ញាតិមិត្ត»។
មន្រ្តីសង្គមស៊ីវិល ក៏បានស្នើសុំឱ្យមានការបញ្ជូនមន្ត្រីថ្មីៗទាំងនោះទៅរៀនវគ្គបណ្ដុះបណ្ដាលផ្សេងៗអំពីការប្រើប្រាស់អាវុធ ច្បាប់ទម្លាប់ និងនីតិវិធីផ្សេងៗជាដើម។
លោក សឹង សែនករុណា មន្ត្រីអង្កេតជាន់ខ្ពស់នៃអង្គការការពារសិទ្ធិមនុស្ស អាដហុក ក៏យល់ស្របទៅនឹងការណែនាំរបស់លោកស ខេងផងដែរ ប៉ុន្តែលោកក៏មានការព្រួយបារម្ភដែរថា អំពើពុករលួយអាចនឹងកើតមានឡើង ដោយសារតែបណ្ដោយឱ្យមន្ត្រី មេឃុំ និងមេប៉ុស្តិ៍ ជ្រើសរើសសាច់ញាតិរបស់ខ្លួនឱ្យចូលបម្រើការងារដោយខ្លួនឯង។
លោកលើកឡើងថា៖ «វគ្គបណ្ដុះបណ្ដាលពាក់ព័ន្ធផ្សេងៗគួរតែត្រូវបានផ្ដល់ជូនមន្ត្រីដែលទើបនឹងជ្រើសរើសទាំងនោះ ដូចជាការសរសេររបាយការណ៍ និងការបំពេញមុខងារជាច្រើនទៀត ហើយដើម្បីធានានូវដំណើរការជ្រើសរើសនេះបានល្អទៅបាន ថ្នាក់លើរួមមានថ្នាក់ស្រុក ឬថ្នាក់ខេត្ត ឬថ្នាក់ជាតិ គួររៀបចំបង្កើតគណៈកម្មការ១ក្នុងការចុះត្រួតពិនិត្យនៅតាមមូលដ្ឋានជុំវិញការជ្រើសរើសមន្ត្រីឱ្យចូលបម្រើការងារនេះ»៕