ភ្នំពេញៈ ក្រសួងទេសចរណ៍ព្រមានថា អ្នកដែលប្រកបអាជីវកម្មទេសចរណ៍ក្នុងករណីនៅតែបន្តសកម្មភាពអាជីវកម្មទេសចរណ៍ដោយគ្មានអាជ្ញាបណ្ណទេសចរណ៍ទៀត នឹងត្រូវប្រឈមនឹងវិធានការផ្លូវច្បាប់។
ក្រសួងទេសចរណ៍បានសង្កេតឃើញថា មានការលេចទ្បើងវិញផងដែរនូវការប្រកបអាជីវកម្មទេសចរណ៍ដែលគ្មានអាជ្ញាបណ្ណទេសចរណ៍ ដែលទាមទារការយកចិត្តទុកដាក់ខ្ពស់ពីម្ចាស់អាជីវកម្មទេសចរណ៍ និងទេសចរជាតិ អន្តរជាតិក្នុងកិច្ចសហការប្រកបអាជីវកម្មជាមួយអាជីវកម្មទេសចរណ៍ទាំងនោះ។
ក្រសួងទេសចរណ៍បញ្ជាក់ក្នុងសេចក្តីណែនាំនាថ្ងៃទី ២៥ ខែវិច្ឆិកាថា មុននឹងប្រើប្រាស់សេវាកម្ម ឬផ្គត់ផ្គង់សេវាកម្មទេសចរណ៍ ប្រតិបត្តិករទេសចរណ៍ និងទេសចរជាតិ អន្តរជាតិទាំងអស់ត្រូវសួររកអាជ្ញាបណ្ណទេសចរណ៍ ដោយធ្វើការស្គេន QR Code នៅលើសន្លឹកអាជ្ញាបណ្ណទេសចរណ៍ ដើម្បីបញ្ជាក់ពីភាពត្រឹមត្រូវជាមុនសិន។
សេចក្តីណែនាំបញ្ជាក់ថា៖ «ម្ចាស់ ឬអ្នកគ្រប់គ្រងសណ្ឋាគារ ផ្ទះស្នាក់ ភោជនីយដ្ឋាន រមណីយដ្ឋានទេសចរណ៍ ក្រុមហ៊ុនដឹកជញ្ជូនទេសចរណ៍ ក្រុមហ៊ុនគ្រប់គ្រងប្រព័ន្ធកក់សំបុត្រយន្តហោះ (Ground Distribution System) និងមគ្គុទ្ទេសក៍ទេសចរណ៍ទាំងអស់មិនត្រូវចុះហត្ថលេខា ឬផ្តល់កិច្ចសហការផ្គត់ផ្គង់សេវាកម្ម ទេសចរណ៍ ឬអនុញ្ញាតផ្តល់ប្រព័ន្ធកក់សំបុត្រដល់ការីទេសចរណ៍និងភ្នាក់ងារទេសចរណ៍ណា ឬ បុគ្គលណាម្នាក់ដែលប្រកបអាជីវកម្មទេសចរណ៍ដោយគ្មានអាជ្ញាបណ្ណទេសចរណ៍នោះឡើយ»។
សេចក្តីណែនាំបន្តថា ការីទេសចរណ៍ និងភ្នាក់ងារទេសចរណ៍ ក្រុមហ៊ុនគ្រប់គ្រងប្រព័ន្ធកក់សំបុត្រយន្តហោះត្រូវទទួលខុសត្រូវចំពោះការខាតបង់ ឬហានិភ័យផ្សេងៗ ក្នុងករណីផ្តល់កិច្ចសហការជាមួយដៃគូផ្គត់ផ្គង់សេវាកម្មទេសចរណ៍ ឬបុគ្គលណាដែលប្រកបអាជីវកម្មទេសចរណ៍ ដោយគ្មានអាជ្ញាបណ្ណទេសចរណ៍។
ក្រសួងណែនាំដល់អ្នកដែលកំពុងធ្វើអាជីវកម្មជាការីទេសចរណ៍ ឬភ្នាក់ងារទេសចរណ៍ដោយ គ្មានអាជ្ញាបណ្ណទេសចរណ៍ ហើយកំពុងមានសកម្មភាពផ្សព្វផ្សាយតាមរយៈបណ្តាញសង្គមនានា ត្រូវមកដាក់ពាក្យស្នើសុំអាជ្ញាបណ្ណទេសចរណ៍នៅក្រសួងទេសចរណ៍ ឬតាមរយៈមន្ទីរទេសចរណ៍ រាជធានី-ខេត្ត ឬអាចស្នើសុំដោយផ្ទាល់តាមថ្នាលបច្ចេកវិទ្យាព័ត៌មាន។
សេចក្តីណែនាំបញ្ជាក់ថា៖ «ក្នុងករណីនៅតែបន្តសកម្មភាពអាជីវកម្មទេសចរណ៍ដោយគ្មានអាជ្ញាបណ្ណទេសចរណ៍ទៀត លោក-លោកស្រីនឹងត្រូវប្រឈមនឹងវិធានការផ្លូវច្បាប់ជាធរមាន»៕