.jpg)
លោក យ៉ង សាំងកុមារ (ឆ្វេង) លោក ឡឹក សុធារ (ស្ដាំ) ដែលត្រូវបានព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់តែងតាំងមុខតំណែងក្នុងជួររាជរដ្ឋាភិបាល កាលពីថ្ងៃទី ២៩ ខែវិច្ឆិកា។ រូបថត SPM
ភ្នពេញៈ ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់តែងតាំងមុខតំណែងក្នុងជួររាជរដ្ឋាភិបាលដល់បុគ្គលអ្នកនយោបាយនានាដែលបានផ្ដាច់ខ្លួនចេញពីគណបក្សប្រឆាំងចូលរួមជាមួយគណបក្សប្រជាជនកម្ពុជានាពេលថ្មីៗកន្លងមកនេះ។
លោក យ៉ង សាំងកុមារ ប្រធានគណៈកម្មាធិការនាយកនៃគណបក្សប្រជាធិបតេយ្យមូលដ្ឋាន (គបម) ត្រូវបានត្រាស់បង្គាប់តែងតាំងមុខតំណែងជារដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការនៃក្រសួងកសិកម្ម និងលោក ឡឹក សុធារ អ្នកនាំពាក្យគណបក្សនេះត្រូវបានតែងតាំងជាអនុរដ្ឋលេខាធិការក្រសួងកសិកម្ម។ នេះបើយោងតាមព្រះរាជក្រឹត្យចុះថ្ងៃទី ២៩ ខែវិច្ឆិកា ឆ្នាំ ២០២២។
ខណៈព័ត៌មានក្រៅផ្លូវការបានឱ្យដឹងទៀតថា នឹងមានអតីតតំណាងរាស្ត្រគណបក្សសង្គ្រោះជាតិ និងសមាជិកបក្សផ្សេងទៀតបន្តស្នើសុំចូលជីវភាពនយោបាយជាមួយ CPP។ ការតែងតាំងនេះត្រូវបានធ្វើឡើងបន្ទាប់ពីមានសំណើទូលថ្វាយរបស់លោកនាយករដ្ឋ មន្ត្រី ហ៊ុន សែន ជូនព្រះមហាក្សត្រ បន្ទាប់ពីអតីតមន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន (គបម) បានចុះចូលជាមួយ CPP ដើម្បីចូលរួម អភិវឌ្ឍវិស័យកសិកម្ម ជាពិសេសវិស័យស្រូវអង្ករ។
ជាមួយគ្នានេះដែរ លោក ខាត់ សុធី ប្រធានប្រតិបត្តិគណបក្សប្រជាធិបតេយ្យមូលដ្ឋានរាជធានីភ្នំពេញ និងជាសមាជិកគណៈកម្មាធិការនាយកនៃគណបក្សប្រជាធិបតេយ្យមូលដ្ឋានបានសម្រេចលាលែងពីគណបក្សនេះ ដើម្បីចូលរួមជីវភាពនយោបាយជាមួយគណបក្សប្រជាជនកម្ពុជា។
ក្នុងលិខិតសំណើទៅកាន់លោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា នៅថ្ងៃទី ២៩ ខែវិច្ឆិកា ឆ្នាំ ២០២២ នេះ លោក ខាត់ សុធី បានរៀបរាប់ថា លោកបានប្រឡូកក្នុងនយោបាយជាមួយគណបក្សប្រជាធិបតេយ្យមូលដ្ឋាន តាំងពីឆ្នាំ ២០១៥ មក ជាមួយក្រុមបញ្ញវន្តខ្មែរ ក្នុងចេតនាកសាងប្រជាធិបតេយ្យឱ្យកាន់តែរស់រវើក និងមានឱកាសចូលរួមជាមួយ លោក យ៉ង សាំងកុមារ ដែលជាបញ្ញវន្តខ្មែរ ១ រូប មានជំនាញច្បាស់លាស់ លើវិស័យសេដ្ឋកិច្ចជនបទ និងកសិកម្ម ដោយរំពឹងថានឹងបានរួមចំណែកកសាងសង្គមជាតិ ដោយលើកស្ទួយជីវភាពកសិករខ្មែរដែលមានចំនួនដ៏ច្រើនលើសលប់ ឱ្យមានជីវភាពកាន់តែប្រសើរឡើង។
លោកបន្តថា ប៉ុន្តែមកដល់ពេលនេះ ក្រោមការដឹកនាំដ៏ឈ្លាសវៃរបស់រាជរដ្ឋាភិបាលកម្ពុជា លទ្ធិប្រជាធិបតេយ្យកំពុង តែរស់រវើក ប្រជាពលរដ្ឋខ្មែរ រស់នៅក្រោមដំបូលសន្តិភាព ដ៏ត្រជាក់ ក៏ញ៉ាំងឱ្យពលរដ្ឋគ្រប់រូប ផ្ដល់ការគាំទ្រដល់គណបក្សប្រជាជនកម្ពុជា បន្តដឹកនាំនាវាកម្ពុជាជានិរន្តរ៍តទៅមុខទៀតដោយភាពកក់ក្ដៅជាទីបំផុត។
លោក សុធី បានបន្តថា៖ «ម្យ៉ាងវិញទៀត ខ្ញុំបាទបានកត់សម្គាល់ឃើញកាន់តែច្បាស់ពីអត្តចរិតនៃក្រុមអ្នកប្រឆាំងដែលអះអាងថា ជាអ្នកប្រជាធិបតេយ្យនូវភាពគ្មានសណ្តាប់ធ្នាប់ គ្មានវិន័យ អំនួត តួឯក ចេះតែដាក់បន្ទុក ប្រឆាំងជាន់ពន្លិច កេងចំណេញទំនុកចិត្តរបស់ប្រជាពលរដ្ឋ ....។ តាមរយៈលទ្ធផលបោះឆ្នោតឃុំ-សង្កាត់ ២០២២ កន្លងទៅនេះ ខ្ញុំយល់ថា ពលរដ្ឋលែងត្រូវការបក្សប្រឆាំងរបៀបដូចសព្វថ្ងៃនេះទៀតហើយ។ ដូច្នេះ មានតែការចូលរួមជាមួយគណបក្សប្រជាជនកម្ពុជា តែប៉ុណ្ណោះ ទើបមានឱកាសបានបម្រើជាតិមាតុភូមិឱ្យកាន់តែរីកចម្រើនថែមទៀត»។
ដោយឡែកអតីតអ្នកតំណាងរាស្ត្រគណបក្សសង្គ្រោះជាតិមណ្ឌលភ្នំពេញលោក ដាំ សិទ្ធិបានដាក់លិខិតផ្លូវការកាលពីថ្ងៃទី ២៨ ខែវិច្ឆិកាជូនទៅនាយករដ្ឋមន្ត្រី ហ៊ុន សែន ដើម្បីស្នើសុំចុះចូលជាមួយ CPP។ ក្នុងលិខិតបានលើកឡើងថា ការស្នើសុំចុះចូលនេះ បន្ទាប់ពីបានមើលឃើញ គោលនយោបាយដ៏ល្អ ត្រឹមត្រូវ ក្រោមការដឹកនាំដ៏ល្អរបស់គណបក្សប្រជាជនកម្ពុជា។
តាមរយៈលិខិតនេះ លោក ដាំ សិទ្ធិ បានគូសបញ្ជាក់ថា៖ «ខ្ញុំបាទ សូមចូលរួមជីវភាពនយោបាយជាមួយគណបក្សប្រជាជនកម្ពុជា ចាប់ពីថ្ងៃចុះហត្ថលេខានេះតទៅ ដោយស្ម័គ្រស្មោះគ្មានការគំរាមកំហែង និងបង្ខិតបង្ខំ»។
លោក ដាំ សិទ្ធិ ជានិពន្ធនាយកកាសែតមនសិការខ្មែរ ដែលកាសែតមួយនេះត្រូវបានគេមើលឃើញថា តែងតែងចុះផ្សាយអត្ថបទរិះគន់ទៅលើការដឹកនាំរដ្ឋាភិបាល។ លោក សិទ្ធិ ធ្លាប់ជាប់ពន្ធនាគារជាង ១ សប្ដាហ៍ កាលពីឆ្នាំ ២០០៨ ដោយសារចុះផ្សាយអត្ថបទមួយដែលអតីតមេកើយលោក គឺលោក សម រង្ស៊ី បាននិយាយថា ឯកឧត្តម ហោ ណាំហុងអតីតរដ្ឋមន្ត្រីការបរទេស ជាអតីតប្រធានគុកបឹងត្របែកសម័យខ្មែរក្រហម។
អ្នកវិភាគនយោបាយលោក ឯម សុវណ្ណារ៉ា បានថ្លែងថា ការដើរចេញពីគណបក្សមួយទៅគណបក្សមួយ ដោយសារបុគ្គលនោះមើលឃើញពីឱកាស និងលទ្ធភាពដែលអាចទទួលបាននូវតួនាទី ឋានៈ តំណែង ឬលាភសក្ការៈនៅពេលចូលរួមជីវភាពជាមួយគណបក្សនោះ ដើម្បីអាចសម្រេចនិងបំពេញនូវឆន្ទៈរបស់ខ្លួន។
លោកថា៖ «ហើយគណបក្សកាន់អំណាចគឺជាគណបក្សដែលមានឥទ្ធិពល និងទាក់ទាញ ដូច្នេះគេអាចផ្តល់អត្ថប្រយោជន៍ច្រើន អ៊ីចឹងគាត់អាចងាកមករកអត្ថប្រយោជន៍ច្រើនជាងដើម្បីជួយបំពេញការងារខ្លួនឯងផង»៕
