ភ្នំពេញៈ កម្ពុជា និងឡាវ បានបើកវគ្គហ្វឹកហ្វឺនស្តីពីការផ្លាស់ប្តូរបទពិសោធន៍ចំណេះដឹង លើការងារគ្រប់គ្រងកិច្ចប្រតិបត្តិការ រវាងអង្គភាពស៊ីម៉ាក់និងអង្គភាព UXO LAO ក្រោមគម្រោងសហប្រតិបត្តិការ ត្បូង-ត្បូង (South-South Cooperation) គាំទ្រដោយទីភ្នាក់ងារសហប្រតិបត្តិការអន្តរជាតិជប៉ុន (JICA)។
ពិធីនេះមានការចូលរួមពីលោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) លោកសោម៉ានី ម៉ានីវង្ស (Saomany Manivong) នាយកស្តីទីអង្គភាពបោសសម្អាតយុទ្ធភណ្ឌមិនទាន់ផ្ទុះនៃប្រទេសឡាវ និងលោក Hayashi Akihito ទីប្រឹក្សា JICA កាលពីថ្ងៃទី៩ ខែមករា ឆ្នាំ២០២៣។
លោក ហេង រតនា ដែលបានចូលរួមជាអធិបតីក្នុងពិធីបើកវគ្គហ្វឹកហ្វឺននេះ បានលើកឡើងថា វគ្គហ្វឹកហ្វឺននេះ មានរយៈពេល១ខែ ដោយក្នុងនោះ ការហ្វឹកហាត់រយៈពេល១៥ថ្ងៃ នឹងធ្វើឡើងក្នុងប្រទេសកម្ពុជា និង១៥ថ្ងៃទៀត នឹងធ្វើឡើងនៅប្រទេសឡាវ ដែលសិក្ខាកាមទាំងកម្ពុជា និងឡាវ មានចំនួន១០នាក់។
លោកមានប្រសាសន៍ថា ៖ «គោលបំណងនៃគម្រោងនេះ គឺធ្វើឡើងដើម្បីសម្រួលដល់ប្រទេសដែលទទួលរងនូវផលប៉ះពាល់ដោយសារគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទ ដោយមានការចែករំលែកចំណេះដឹងបទពិសោធន៍ និងបច្ចេកទេសក្នុងការដោះស្រាយបញ្ហាគ្រាប់មីន និងសំណល់ជាតិផ្ទុះពីសង្រ្គាម»។
បើតាម CMAC តាមរយៈគម្រោងកិច្ចសហប្រតិបត្តិការត្បូង-ត្បូង គិតត្រឹមឆ្នាំ២០២៣នេះ CMAC បានធ្វើការហ្វឹកហ្វឺន ចែករំលែកចំណេះនិងបទពិសោធន៍ ទាក់ទងនឹងវិស័យមីននេះ ទៅដល់ប្រទេសដែលទទួលរងនូវផលប៉ះពាល់ជាច្រើន ក្នុងនោះមាន ប្រទេសឡាវ, កូឡុំប៊ី,អង់ហ្គោឡានិងប្រទេសអ៊ីរ៉ាក់។
លោក ហេង រតនា បានបញ្ជាក់ឱ្យដឹងដែរថា តាមរយៈគម្រោងសហប្រតិបត្តិការត្បូង-ត្បូង ក្រោមការគាំទ្រដោយ JICA គិតចាប់ពីឆ្នាំ២០១២ មកដល់បច្ចុប្បន្ន បានអនុវត្តកម្មវិធីហ្វឹកហ្វឺននេះជា៣ដំណាក់កាល ដោយមានសិក្ខាកាមទាំងកម្ពុជា និងឡាវចំនួនសរុប២២៨នាក់៕