កំពង់ចាមៈ កំណាត់ផ្លូវដែលមានប្រវែង ៤៥,៤៨៩ គីឡូម៉ែត្រ នៃផ្លូវជាតិលេខ ៧ ដែលត្រូវបានប្រកាសបើកការដ្ឋាន ពង្រីកពី ២ គន្លង ទៅ ៤ គន្លង ចាប់ពីរង្វង់មូលស្គន់ ទៅដល់ស្ពានគីហ្សូណា ទីរួមខេត្តកំពង់ចាម នឹងត្រូវបញ្ចប់ក្នុងឆ្នាំ ២០២៦ ហើយការដ្ឋាន នេះគ្រោងចំណាយថវិកាសរុបប្រមាណជាង ១១៧ លានដុល្លារអាមេរិក។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនថ្លែងក្នុងពិធីបើកការដ្ឋាន នាព្រឹកថ្ងៃទី ៩ មករាថា គម្រោង នេះត្រូវអនុវត្ដការសាងសង់ដោយក្រុមហ៊ុនសាជីវកម្មស្ពាននិងថ្នល់ចិន (CRBC) និងត្រួតពិនិត្យបច្ចេកទេស ដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន។
លោកថា ការដ្ឋានពង្រីកផ្លូវនេះ នឹងប្រើប្រាស់រយៈពេលសាងសង់ចំនួន ៤០ ខែ ដោយគ្រោងបញ្ចប់ក្នុងឆ្នាំ ២០២៦ ហើយថវិកាដែលបានចំណាយនេះ ជាឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតគ្រាប់មីន យុទ្ធភណ្ឌមិនទាន់ផ្ទុះ និងពន្ធអាករផ្សេងៗ។
លោកថ្លែងថា៖ «ក្រោយបញ្ចប់ការសាងសង់ កំណាត់ផ្លូវនេះនឹងក្លាយជាផ្លូវ ១ ដ៏រឹងមាំ ធំទូលាយ និងដើរតួយ៉ាងសំខាន់ក្នុងការជួយសម្រួលដល់ការធ្វើដំណើរ និងការដឹកជញ្ជូនផលិតផលកសិកម្ម កសិឧស្សាហកម្ម ព្រមទាំងលើកកម្ពស់ការអភិវឌ្ឍសកម្មភាពសេដ្ឋកិច្ច សង្គម នៅភូមិសាស្ត្រខេត្តកំពង់ចាម និងបណ្តាខេត្តជាប់ព្រំប្រទល់ ក្នុងការផ្លាស់ប្តូរពាណិជ្ជកម្ម លើទំនិញ និងកសិផលសំខាន់ៗមួយចំនួនផងដែរ»។
គម្រោងនេះ នឹងរួមបញ្ចូលនូវការសាងសង់ ស្ពានថ្មី ចំនួន ១ កន្លែង ប្រវែង ៤០ ម៉ែត្រ ស្ពានថ្មីចំនួន ៦ កន្លែងផ្សេងទៀត ប្រវែងសរុប ១០៦ ម៉ែត្រ ពង្រីកបន្ថែមស្ពានចាស់ដែលមានស្រាប់ចំនួន ១ កន្លែង ដាក់លូគ្រប់ប្រភេទចំនួន ៣៣០ កន្លែង បំពាក់កាមេរ៉ាត្រួតពិនិត្យល្បឿនរថយន្ត ២ កន្លែង។ បំពាក់ស្ថានីយជញ្ជីងថ្លឹងរថយន្តដឹកជញ្ជូន លើសទម្ងន់កម្រិតកំណត់វៃឆ្លាត និងត្រួតពិនិត្យដោយស្វ័យប្រវត្តិ ចំនួន ២ កន្លែង និង បំពាក់ស្លាកសញ្ញាចរាចរណ៍ គំនូសចរាចរណ៍ បង្គោលគីឡូម៉ែត្រ និងបង្គោលសុវត្ថិភាពទៅ តាមបទដ្ឋានបច្ចេកទេសផ្លូវថ្នល់ផងដែរ។
នាឱកាសនោះ លោកនាយករដ្ឋមន្ត្រី ហ៊ុន សែន បានថ្លែងដែរថា ក្រោយសម័យសង្គ្រាម ការស្ថាបនាផ្លូវថ្នល់មានទំហំត្រឹមតែ ៥-៧ ម៉ែត្រប៉ុណ្ណោះ។ ប៉ុន្តែដោយសារ កត្តាសន្តិភាព បានផ្តល់ឱកាសក្នុងការអភិវឌ្ឍ លើគ្រប់វិស័យ ដែលបច្ចុប្បន្ន ទោះបីជាផ្លូវដែលមានទំហំដល់ទៅ ១២ ម៉ែត្រ ក៏ហាក់នៅតែមិនទាន់គ្រប់គ្រាន់។
លោកបន្តថា ផ្លូវជាតិលេខ ៧ នេះ គឺពិតជាសំខាន់ណាស់ ដែលមានការចាំបាច់តម្រូវឱ្យមានការពង្រីក និងលើកកម្រិតគុណភាព ដើម្បីឆ្លើយតបទៅនឹងការរីកចម្រើនរបស់ប្រទេសជាតិនាពេលបច្ចុប្បន្ន ជាពិសេសទំហំចរាចរណ៍ និងកំណើននៃការដឹកជញ្ជូនដែលមានការកើនឡើងយ៉ាងគំហុកពី ១ ថ្ងៃទៅ ១ ថ្ងៃ។
លោក ហ៊ុន សែន មានប្រសាសន៍ថា៖ «គ្មានផ្លូវ គ្មានស្ពាន គ្មានការអភិវឌ្ឍនោះទេ ហើយការអភិវឌ្ឍលើវិស័យហេដ្ឋារចនាសម្ព័ន្ធផ្លូវថ្នល់ និងធនធានមនុស្ស គឺនៅតែជាអាទិភាពដែលរាជរដ្ឋាភិបាលយកចិត្តទុកដាក់។ រាជរដ្ឋាភិបាលនៅតែបន្តជំហរការអភិវឌ្ឍប្រទេសជាតិតាមទម្រង់ជំហានគីង្គក់ បើទោះបោះជំហានមួយៗ តែមិនឈប់ឈរនោះទេ»។
លោក វ៉ាង វិនធាន ឯកអគ្គរដ្ឋទូតនៃសាធារណរដ្ឋប្រជាមានិតចិន ប្រចាំកម្ពុជា ក៏បានសាទរចំពោះប្រជាពលរដ្ឋនៅខេត្តកំពង់ចាម ក៏ដូចជាចំពោះកម្ពុជាដែលទទួលបានសមិទ្ធផលហេដ្ឋារចនាសម្ព័ន្ធថ្មីៗជាបន្តបន្ទាប់។
លោកបញ្ជាក់ថា ចិននៅតែបន្តជួយដល់កម្ពុជា ជាបន្តបន្ទាប់ទៀតទៅលើការអភិវឌ្ឍហេដ្ឋារចនាសម្ព័ន្ធនៅកម្ពុជា និងវិស័យផ្សេងៗជាច្រើនទៀតទៅតាមលទ្ធភាពដែលអាចជួយទៅបាន តាមរយៈកិច្ចសហប្រតិបត្តិការដ៏ល្អ រវាងប្រទេសទាំង ២។
តាមរយៈសមិទ្ធផលកំណាត់ផ្លូវជាតិលេខ ៧ នេះ នឹងរួមចំណែកធ្វើឱ្យការធ្វើដំណើររបស់ប្រជាពលរដ្ឋកាន់តែមានភាពល្អប្រសើរងាយស្រួល ព្រោះផ្លូវនេះត្រូវបានពង្រីកឱ្យធំទូលាយជាមុន។
លោក វ៉ាង វិនធាន បានថ្លែងថា៖ «រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា បានប្រកាន់ខ្ជាប់នូវគោលនយោបាយមិត្តភាពជាមួយប្រទេសចិន គឺស្របតាមផលប្រយោជន៍ ជាមូលដ្ឋានរបស់ប្រទេស និងប្រជាជនទាំង ២»។
លោកបន្តថា ជាច្រើនឆ្នាំកន្លងមក ប្រទេសចិនបានជួយកម្ពុជាក្នុងការសាងសង់ស្ថានីយវារីអគ្គិសនី រោងចក្រអគ្គិសនី ផ្លូវថ្នល់ ស្ពាន និងមន្ទីរពេទ្យដែលបានធ្វើឱ្យ ប្រជាជនកម្ពុជា ទទួលបានផលប្រយោជន៍យ៉ាងពិតប្រាកដនៃចំណងមិត្តភាពចិន និងកម្ពុជា។
លោក វ៉ាង វិនធាន បន្ថែមថា៖« ការដែលចិនធ្វើដូច្នេះ គឺជាការទទួលផលសម្រាប់គោលនយោបាយគណបក្សប្រជាជនកម្ពុជា ដែលមានមិត្តភាពជាមួយប្រទេសចិន»។
សូមរំឭកផងដែរថា នៅចុងឆ្នាំ ២០២២ និងដើមឆ្នាំ ២០២៣ នេះ ប្រមុខរាជរដ្ឋាភិបាលកម្ពុជា លោកហ៊ុន សែន និងឯកអគ្គរដ្ឋទូតចិនប្រចាំកម្ពុជា លោក វ៉ាង វិនធាន បានរួមគ្នាបើកការដ្ឋានសាងសង់ផ្លូវ និងស្ពានចំនួន ៤ គម្រោង ដែលគម្រោងទាំង ៤ នោះ រួមមាន ការដ្ឋានសាងសង់ផ្លូវជាតិលេខ ៤១ ផ្លូវជាតិលេខ ៣១ និងលេខ ៣៣ ស្ពានឆ្លងទន្លេមេគង្គ នៅ ខេត្តក្រចេះ និងកំណាត់ផ្លូវជាតិលេខ ៧ ពីស្គន់ ទៅដល់ក្រុងកំពង់ចាម៕