ភ្នំពេញៈ ក្រសួងព័ត៌មានបានស្នើ និងណែនាំទៅដល់គ្រប់អ្នកសារព័ត៌មានទាំងអស់ដែលទទួលបានការឯកភាពសម្រេចចូលរួមពិធីជួបជុំជាមួយនឹងលោកនាយករដ្ឋមន្ត្រី ហ៊ុន សែន នាថ្ងៃទី ១៤ ខែមករា ខាងមុខនេះ ត្រូវធ្វើតេស្តរហ័សរកមេរោគកូវីដ ១៩ នាទីស្តីការក្រសួងផងដែរ។
នៅថ្ងៃទី១៤ ខែមករា ខាងមុខនេះ ប្រមុខរាជរដ្ឋាភិបាលកម្ពុជាលោកនាយករដ្ឋមន្ត្រី ហ៊ុន សែន នឹងជួបជាមួយអ្នកសារព័ត៌មានដោយផ្ទាល់ដែលជាជំនួបលើកទី៥ ឆ្នាំ២០២៣ ដែលនឹងធ្វើឡើងនាមជ្ឈមណ្ឌលសន្និបាត និងពិព័រណ៍កោះពេជ្រ។
ក្រសួងព័ត៌មាន នៅថ្ងៃទី១១ ខែមករា បានជូនដំណឹងពីស្ដីពី ការចូលរួមពិធីជួបជុំរវាងនាយករដ្ឋមន្ត្រី និងអ្នកសារព័ត៌មាន ដោយស្នើឱ្យម្ចាស់អង្គភាពប្រព័ន្ធផ្សព្វផ្សាយ និងអ្នកសារព័ត៌មានទាំងអស់ ត្រូវអនុវត្តនូវការណែនាំមួយចំនួនពីក្រសួងដើម្បីរក្សាបាននូវសណ្តាប់ធ្នាប់ របៀបរៀបរយ និងធានាបាននូវសុខុមាលភាពសាធារណៈ។
ក្រសួងព័ត៌មានបានបញ្ជាក់ថា ៖ «អ្នកសារព័ត៌មានទាំងអស់ត្រូវមកធ្វើតេស្ដរហ័សជំងឺកូវីដ១៩ នៅថ្ងៃទី១៣ ខែមករា នាទីស្តីការក្រសួងព័ត៌មាន អគារថ្មីអគ្គនាយកដ្ឋានព័ត៌មាន និងសោតទស្សន៍ ដោយឡែក សម្រាប់ថ្នាក់ដឹកនាំក្រសួង ស្ថាប័ន អ្នកនាំពាក្យ រដ្ឋបាលរាជធានីខេត្ត អាចម្ចាស់ការធ្វើតេស្តដោយខ្លួនឯង និងបង្ហាញលទ្ធផលដល់អនុគណៈកម្មការសន្តិសុខ សណ្តាប់ធ្នាប់ សង្គ្រោះបឋម និងបញ្ហាជំងឺកូវីដ១៩ ពេលទៅដល់ទីតាំងកម្មវិធី»។
អង្គភាពដែលទទួលបានការឯកភាពសម្រេចចូលរួមពិធីនេះ ត្រូវមកទទួលបណ្ណចូលរួមចាប់ពីថ្ងៃទី១២ ខែមករា នៅការិយាល័យច្រក-ចូលតែមួយនៃអគ្គនាយកដ្ឋានព័ត៌មាន និងសោតទស្សន៍ជាន់ទី១នៅរៀងរាល់ម៉ោងធ្វើការ ហើយអ្នកសារព័ត៌មានត្រូវមកដល់ទីតាំងប្រារព្ធពិធីនៅម៉ោង ១៤:០០ នាទីរសៀល ដើម្បីស្កេនបណ្ណ ពិនិត្យលទ្ធផលតេស្តរហ័សជំងឺកូវីដ១៩ និងស្កេនកម្ដៅ។
ក្រសួងព័ត៌មានបានហាមអ្នកសារព័ត៌មានដែលនឹងចូលរួមកម្មវិធី មិនឱ្យយកម៉ាស៊ីនថត ដងសែលហ្វ៊ី កាបូបស្ពាយក្រោយ (Bag pack) ចូលក្នុងកម្មវិធីឡើយ។
ប្រភពដដែលបានបន្តថា បណ្ណសម្គាល់អត្តសញ្ញាណ ត្រូវពាក់គ្រប់ពេលវេលាក្នុងអំឡុងកម្មវិធី និងត្រូវទុកជាមោឃៈ ប្រសិនបើមានការផ្លាស់ប្ដូរ ដោយគ្មានការអនុញ្ញាតពីគណៈគ្រប់គ្រងកម្មវិធី។
ទាក់ទងនឹងជំនួបនេះដែរ ប្រមុខរាជរដ្ឋាភិបាលកម្ពុជា លោក ហ៊ុន សែន បានប្រកាសកាលពីដើមសប្តាហ៍នេះថា លោកស្វាគមន៍ការផ្ដល់ឱកាសឱ្យអ្នកកាសែតសួរសំណួរទៅកាន់លោកក្នុងកម្មវិធីជួបជុំគ្នានេះដែរ។
រដ្ឋមន្ត្រីក្រសួងព័ត៌មាន លោកខៀវ កាញារីទ្ធ ធ្លាប់លើកឡើងថា ជំនួបរវាងលោកនាយករដ្ឋមន្ត្រី និងអ្នកសារព័ត៌មាន ធ្វើឡើងដើម្បីជំរុញការលើកកម្ពស់វិស័យព័ត៌មានឱ្យកាន់តែរីកចម្រើន តាមរយៈការបង្កើនទំនាក់ទំនង រវាងអ្នកសារព័ត៌មាន និងអ្នកនាំពាក្យមកពីគ្រប់ក្រសួង ស្ថាប័ន រាជធានី-ខេត្ដ។
សូមរំឭកផងដែរថា លោកនាយករដ្ឋមន្ត្រី ហ៊ុន សែន បានកំណត់យកថ្ងៃទី១៤ ខែមករា ជារៀងរាល់ឆ្នាំ ដើម្បីជួបជុំជាមួយអ្នកសារព័ត៌មាន ក្រោយការខកខានរយៈពេល២ឆ្នាំ ដោយសារវិបត្តិកូវីដ១៩ ហើយថ្ងៃទី១៤ មករា ឆ្នាំនេះទៀតសោត ជាខួបរំឭកដល់ថ្ងៃដែលលោកបានឡើងជានាយករដ្ឋមន្ត្រីកាលពីជិត៤០ឆ្នាំមុន ពោលគឺនៅថ្ងៃទី១៤ ខែមករា ឆ្នាំ១៩៨៤៕