.jpg)
លោកនាយករដ្ឋមន្ត្រី ហ៊ុន សែន និងលិខិតរបស់លោក គង់ គាំ ផ្ញើទៅកាន់ហ្វ្រេសញូវ។ រូបថត SPM
ភ្នំពេញៈ លោកនាយករដ្ឋមន្រ្តី ហ៊ុន សែន បានបញ្ជាក់ថា លោកទទួលស្គាល់ពីអ្វីដែលលោក គង់ គាំ ដែលជាឧត្តមទីប្រឹក្សាគណបក្សភ្លើងទៀនលើកឡើង តាមរយៈលិខិតមួយច្បាប់ចុះថ្ងៃទី ១១ ខែមករា ទាក់ទងនឹងកន្លែងស្នាក់នៅសព្វថ្ងៃនេះ ដែលជាកម្មសិទ្ធិរបស់ក្រសួងការបរទេស និងសហប្រតិបត្តិការអន្តរជាតិ។
លោក ហ៊ុន សែន បានសរសេរនៅលើបណ្តាញសង្គមនារសៀលថ្ងៃទី ១១ ខែមករា ថា លោកបានទទួលព័ត៌មានតាមហ្រ្វេសញូវអំពីលិខិតរបស់លោក គង់ គាំ បំភ្លឺពីដំណើររឿងទាក់ទងនឹងដី និងផ្ទះដែលជាកម្មសិទ្ធិរបស់ក្រសួងការបរទេស។
លោកបានបញ្ជាក់ថា ៖ «ខ្ញុំទទួលស្គាល់ថា អ្វីដែលលោក គង់ គាំ បានរៀបរាប់ក្នុងលិខិតនោះ ភាគច្រើន ជាការពិត ពិសេសត្រង់ចំណុចចុងក្រោយក្នុងលិខិតដែលលោក គង់ គាំ បញ្ជាក់យ៉ាងច្បាស់ថា លោក (គង់ គាំ)ចាំថា ពេលសម្រេចចិត្តចូលមករស់នៅក្នុងផ្ទះនេះ លោក ពិតជាបានជូនព័ត៌មានចំពោះលោករដ្ឋមន្រ្តី ដោយមិនអាចខ្វះការគួរសមនោះឡើយ ហើយលោករដ្ឋមន្រ្តីក៏បានយោគយល់រហូតមក»។
លោកនាយករដ្ឋមន្រ្តី បានសង្កត់ធ្ងន់ថា ៖ «ខ្ញុំពិតជាមានការយោគយល់ចំពោះការស្នាក់នៅផ្ទះរបស់ក្រសួងការបរទេស ប៉ុន្តែខ្ញុំពុំដែលបានសម្រេចប្រគល់ផ្ទះ និងដីនោះឱ្យលោក គង់ គាំ ធ្វើជាកម្មសិទ្ធិឯកជននោះទេ ហើយផ្ទះ និងដីនោះ នៅតែជាកម្មសិទ្ធិរបស់ក្រសួងការបរទេសដដែល»។
លោកហ៊ុន សែនថ្លែងបន្តថា រាល់ការរៀបចំឯកសារនានារបស់លោក គង់ គាំ ដើម្បីធ្វើបណ្ណកម្មសិទ្ធិ លើដីនេះ គឺជាការក្លែងបន្លំយកដី និងផ្ទះរបស់រដ្ឋ ធ្វើជាកម្មសិទ្ធិឯកជន។ ខ្លឹមសារដែលលោក គង់ គាំ បានរៀបរាប់ក្នុងលិខិតរបស់ខ្លួន ដើម្បីផ្សព្វផ្សាយ គឺជាភ័ស្តុតាង មិនអាចប្រកែកបាន ដែលលោក គង់ គាំ បានទទួលស្គាល់ចំពោះរឿងនេះ។
លោក ហ៊ុន សែន បញ្ជាក់ថា ៖ «ដូចនេះ តាមផ្លូវច្បាប់ ផ្ទះ និងដីនេះ នៅតែជាកម្មសិទ្ធិរបស់ក្រសួងការបរទេស ហើយវាដល់ពេលដែលក្រសួងការបរទេស មានតម្រូវការយកផ្ទះ និងដីនេះ ត្រឡប់មកវិញ ដើម្បីចាត់ចែងប្រើប្រាស់បម្រើឱ្យកិច្ចការរបស់ក្រសួង»។
លោក គង់ គាំ បានសរសេរលិខិតមួយច្បាប់ទៅលោក លឹម ជាវុត្ថា អគ្គនាយកសារព័ត៌មានហ្វ្រេសញូវបន្ទាប់ពីលោកបានស្តាប់បទសម្ភាសន៍ពិសេសរវាងសារព័ត៌មាននេះ ជាមួយនឹងលោកឧបនាយករដ្ឋមន្ត្រី ហោ ណាំហុង នៅថ្ងៃទី១០ ខែមករាឆ្នាំ២០២៣ ជុំវិញបញ្ហាផ្ទះលេខ ៧១ ផ្លូវសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
លោកបានលើកឡើងថា លោកបានស្នាក់នៅទីតាំងនេះចាប់តាំងពីត្រឡប់ពីធ្វើជាឯកអគ្គរដ្ឋទូតក្នុងឆ្នាំ១៩៨២ ហើយនៅឆ្នាំ១៩៩០ មានវិញ្ញាបនបត្រសម្គាល់ម្ចាស់អចលនវត្ថុ លេខ៤៤១ របស់គណៈកម្មាធិការប្រជាជនរដ្ឋធានីភ្នំពេញ ចុះថ្ងៃទី៤ ខែមេសា ឆ្នាំ១៩៩០ ចុះហត្ថលេខាដោយប្រធានមន្ទីររៀបចំក្រុង និងសំណង់ លោក ស៊ិន សុខ និងមានការយល់ព្រមពីប្រធានគណៈកម្មាធិការប្រជាជនរដ្ឋធានីភ្នំពេញ លោក ហេ កាន់ និងនៅឆ្នាំ២០១៥ មានវិញ្ញាបនបត្រសម្គាល់ម្ចាស់អចលនវត្ថុលេខ១២០១០១០៥០១១៣។
លោក គង់ គាំ បានបន្តថា មុនលោកទៅបំពេញភារកិច្ចជាឯកអគ្គរដ្ឋទូត នៅទីក្រុងហាណូយ ប្រទេសវៀតណាម លោក និងគ្រួសារ បានរស់នៅក្នុងផ្ទះមួយដែលមានគ្រួសារច្រើនស្នាក់នៅ។
ពេលត្រឡប់ពីធ្វើជាឯកអគ្គរដ្ឋទូតវិញ ក្នុងតួនាទីជាអនុរដ្ឋមន្ត្រីក្រសួងការបរទេស លោកបានទៅស្នាក់នៅផ្ទះមួយក្នុងបរិវេណផ្ទះភ្ញៀវក្រសួងការបរទេស ដែលស្ថិត នៅលើផ្លូវសម្តេចប៉ាន។
លោកបានបញ្ជាក់ថា ៖ «ខ្ញុំចាំថា ពេលសម្រេចចិត្តចូលមករស់នៅក្នុងផ្ទះនេះ ខ្ញុំពិតជាបានជូនព័ត៌មានចំពោះលោករដ្ឋមន្តី ដោយមិនអាចខ្វះការគួរសមនោះឡើយ ហើយលោករដ្ឋមន្ត្រីក៏បានយោគយល់រហូតមក»។
លោក ជុំ សុន្ទរី អ្នកនាំពាក្យក្រសួងការបរទេស មិនអាចសុំការបញ្ជាក់បាននៅឡើយទេ កាលពីល្ងាចថ្ងៃទី១១ ខែមករា ថាតើក្រសួងនឹងមានតម្រូវការយកផ្ទះ និងដីនេះ ត្រឡប់មកវិញ ដើម្បីចាត់ចែងប្រើប្រាស់បម្រើឱ្យកិច្ចការរបស់ក្រសួងវិញឬយ៉ាងណានោះទេ។
លោកឧបនាយករដ្ឋមន្ត្រី ហោ ណាំហុង បានថ្លែងក្នុងបទសម្ភាសន៍កាលពីថ្ងៃទី១០ ខែមករា ថា លោកដឹងច្បាស់ថា ផ្ទះដែលលោកគង់ គាំ ស្នាក់នៅនេះ ជាផ្ទះរបស់ក្រសួងការបរទេស ដោយសារលោកជាអ្នកដែលទាមទារពីរុស្ស៊ីមក។
លោកថា ៖ «អត់មានការអនុញ្ញាត អត់មានការយល់ព្រម ពីក្រសួងការបរទេសទេ មានន័យថា គាត់យកដោយចិត្តឯង យកផ្ទះរបស់ក្រសួងនៅ ដោយចិត្តឯងតែម្តង រហូតដល់ឆ្នាំ២០១៥ បានមានចេញលិខិតបញ្ជាក់កម្មវត្ថុ លិខិតស្នាក់នៅឱ្យគង់ គាំ»។
សូមរំឭកផងដែរថា ក្នុងពិធីបើកការដ្ឋានពង្រីកផ្លូវជាតិលេខ៧ ក្នុងខេត្តកំពង់ចាម នាព្រឹកថ្ងៃទី៩ ខែមករាលោក ហ៊ុន សែន បានព្រមានចាត់វិធានការផ្លូវច្បាប់ និងប្ដឹងរឹបអូសទ្រព្យសម្បត្តិ លោក គង់ គាំ បើមិនបញ្ឈប់ការរិះគន់មកលើគណបក្សប្រជាជនកម្ពុជា៕
