កោះកុងៈ ទីលានវិមានសពយុទ្ធជន ដែលបានពលីជីវិតនាសម័យសង្គ្រាម ក្នុងក្រុងខេមរភូមិន្ទ ខេត្តកោះកុង នឹងរៀបចំធ្វើពិធីបុណ្យឆ្លងតាមបែបព្រះពុទ្ធសាសនា និងប្រកាសសម្ពោធ នៅថ្ងៃទី ១៦ និងទី១៧ ខែមករា ក្រោមអធិបតីភាព លោក ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដែលពិធីនេះធ្វើឡើងដើម្បីឧទ្ទិសកុសលដល់វិញ្ញាណក្ខន្ធកម្មាភិបាល យុទ្ធជន ជាង ៤០០នាក់។
លោក យន្ត មីន រដ្ឋលេខាធិការក្រសួងការពារជាតិ និងជាប្រធានគណៈកម្មការសាងសង់ កាលពីថ្ងៃទី ១១ ខែមករា បានឱ្យដឹងថា កម្មាភិបាល យុទ្ធជន ដែលបានពលីជីវិតក្នុងសម័យសង្គ្រាម មានចំនួន ៤៤៧ នាក់ និងមន្រ្តីអគ្គិសនី ១ ផ្នូរផងដែរ។
លោកថ្លែងថា៖ «គំនិតផ្តួចផ្តើមដែលយើងធ្វើនេះ គឺដើម្បីឧទ្ទិសកុលសផលបុណ្យ និងការតបស្នងសងគុណដល់ការលះបង់របស់បងប្អូនយើង ដែលបានលះបង់ជីវិតដើម្បីជាតិ ដើម្បីការពារសុខសន្តិភាពជូនដល់ប្រជាពលរដ្ឋរបស់យើង ហើយនៅពេលដែលពួកគាត់ស្លាប់នោះ គឺមិនមានការធ្វើបុណ្យឱ្យសមស្របនោះដែរ»។
នៅពេលដែលប្រទេសជាតិមានសុខសន្តិភាព មានការរីកចម្រើនហើយ ទើបប្រមុខដឹកនាំនៃប្រទេសកម្ពុជា និងរដ្ឋមន្រ្តីក្រសួងការពារជាតិ លោកទៀ បាញ់ សម្រេចឱ្យមានការរៀបចំទីលានសពយុទ្ធជន និងពិធីសាសនានេះឡើង។ នេះបើតាមលោកយន្ត មីន។
លោកយន្ត មីន បញ្ជាក់ថា៖«យើងប្រកាសពីពិធីដែលនឹងធ្វើឡើងពីថ្ងៃទី១៦ និងទី១៧ ខាងមុខនេះ គឺចាត់ទុកជា[ការអញ្ជើញ]ដល់គ្រួសារសព ដែលបានដឹងថា មានបងប្អូន កូនចៅ កប់សពនៅទីនោះ អាចចូលរួមបាន ដោយយើងបានធ្វើការតបស្នងដល់ពួកគាត់ តាមទិសស្លោកថា ផឹកទឹកនឹកដល់ប្រភព ជ្រកម្លប់នឹកឃើញដល់អ្នកដាំ»។
ក្នុងចំណោមសពចំនួន៤៤៧ ក្នុងនោះមានពី១៨រាជធានី-ខេត្ត រួមមាន ខេត្តកោះកុងចំនួន២៨២សព ខេត្តកែប២សព ខេត្តតាកែវ១៨សព ខេត្តកំពង់ស្ពឺ៣៤សព ខេត្តសៀមរាប១សព ខេត្តព្រះសីហនុ៨សព ខេត្តកណ្តាល៣០សព ខេត្តរតនគិរី១សព រាជធានីភ្នំពេញ៤សព ខេត្តពោធិ៍សាត់២សព ខេត្តព្រៃវែង៣សព ខេត្តស្វាយរៀង ៨សព ខេត្តបាត់ដំបង១សព ខេត្តកំពង់ធំ១សព ខេត្តក្រចេះ១សព ខេត្តកំពត៤២សព ខេត្តកំពង់ចាម៥សព និងខេត្តកំពង់ឆ្នាំង៤សព។
ទីលានផ្នូរសពអតីតយុទ្ធជននៅខេត្តកោះកុងនេះ ត្រូវបានសាងសង់ឡើងតាមរចនាប័ទ្មខ្មែរសុទ្ធសាធទាំងកូនកាត់បែបបុរាណ និងសម័យ ហើយក្រុមការងារជំនាញបានកែលម្អបន្ថែមទៀតនូវរចនាប័ទ្មអង្គរ។ ប្រវត្តិទីតាំងនេះបានដាក់សាកសពយុទ្ធពល ដែលពលីជីវិត ដើម្បីបូរណភាពទឹកដីនេះ តាំងពីខែកក្កដា ឆ្នាំ១៩៧៩មកម្ល៉េះ។ នេះបើតាមការបញ្ជាក់ពីលោកយន្ត មីន៕