សៀមរាបៈ ប្រទេសជាមិត្ត និងដៃគូអភិវឌ្ឍន៍ទាំងអស់បានដើរតួនាទី១ ផ្នែកយ៉ាងសំខាន់ក្នុងការចូលរួមកសាងកម្ពុជាសម្រាប់អនាគតថ្មី និងសេចក្តីសង្ឃឹមថ្មីសម្រាប់វិស័យមីន ដែលរាជរដ្ឋាភិបាលកម្ពុជាបានដាក់ចេញនូវគោលដៅកម្ពុជាអស់មីនត្រឹមឆ្នាំ ២០២៥។
កម្ពុជាក៏បានបង្កើតនូវប្រវត្តិសាស្ត្រយ៉ាងច្រើនក្នុងការបញ្ចប់សង្គ្រាមរ៉ាំរ៉ៃនៅកម្ពុជា និងឈានទៅទទួលបានសុខសន្តិភាពពេញលេញទូទាំងប្រទេសតាមរយៈនយោបាយឈ្នះ ឈ្នះ របស់លោកនាយករដ្ឋមន្ត្រីហ៊ុន សែនផងដែរ។
នេះជាការថ្លែងឡើងរបស់លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន នៅខេត្តសៀមរាប នាថ្ងៃទី ១៦ មករា ក្នុងកិច្ចប្រជុំគណៈកម្មាធិការដឹកនាំគម្រោងបោសសម្អាតមីនរបស់ទីភ្នាក់ងារស្វ៊ីសសម្រាប់ការអភិវឌ្ឍន៍ និងកិច្ចសហប្រតិបត្តិការ (SDC Project Steering Committee Meeting)។
កិច្ចប្រជុំនេះ រៀបចំឡើងដោយអង្គការ HALO Trust ប្រចាំកម្ពុជា នៅទីស្នាក់ការខេត្តសៀមរាប ដោយមានការចូលរួមពីមន្ត្រីស្ថានទូតសំខាន់ៗ មួយចំនួនផងដែរ។
លោកលី ធុជ បានថ្លែងថា៖ «នាកិច្ចប្រជុំនោះខ្ញុំបានលើកឡើងជម្រាបប្រាប់ដៃគូអភិវឌ្ឍន៍អំពីផែនការបោសសម្អាតមីនរបស់រាជរដ្ឋាភិបាលដើម្បីបញ្ចប់ការងារបោសសម្អាតមីនដែលនៅសល់ចំនួន ៦៤៨ គីឡូម៉ែត្រការ៉េ និងប្រកាសកម្ពុជាគ្មានមីនឆ្នាំ ២០២៥ ហើយរាជរដ្ឋាភិបាលកម្ពុជា តាមរយៈអាជ្ញាធរមីនដែលជាសេនាធិការបានដាក់ចេញនូវផែនការបោសសម្អាតមីនយ៉ាងច្បាស់លាស់ ដោយសហការជាមួយដៃគូអភិវឌ្ឍន៍ ប្រតិបត្តិករបោសសម្អាតមីនជាតិអន្តរជាតិ និងគ្រប់ភាគីពាក់ព័ន្ធ»។
បើតាម លោក លី ធុជ នៅចុងឆ្នាំ ២០២៣ តំបន់ដែលមិនទាន់បោសសម្អាតមីន ចំនួន ២៣៧ គីឡូម៉ែត្រការ៉េនឹងត្រូវសម្អាតដែលតាមការប៉ាន់ស្មានថា ប្រតិបត្តិការនេះត្រូវការថវិការហូតដល់ ៧០ លានដុល្លារ។
លោកបានបញ្ជាក់ថា៖ «វាច្បាស់ណាស់ថា ឆ្នាំ ២០២២ គឺជាឆ្នាំដ៏ធំមួយ។សកម្មភាពមីនមនុស្សធម៌រយៈពេល ៣០ ឆ្នាំបានដោះស្រាយបញ្ហាប្រឈមសំខាន់ៗ និងទទួលបានសមិទ្ធផលគួរឱ្យភ្ញាក់ផ្អើលដែលកើតចេញពីការច្នៃប្រឌិត ការប្តេជ្ញាចិត្ត និងការអនុវត្តមេរៀនដែលបានរៀន»។
លោក លី ធុជ បានបន្ថែមទៀតថា ក្រុមការងារនឹងបន្តរៀន និងអនុវត្ត វាមិនត្រឹមតែការអនុវត្តនៅក្នុងប្រទេសប៉ុណ្ណោះទេ ប៉ុន្តែក៏អនុវត្តឆ្លងកាត់ព្រំដែន និងប្រទេស ឆ្លងមហាសមុទ្រផងដែរដោយកម្ពុជាចែករំលែកបទពិសោធន៍របស់ខ្លួននៅទូទាំងពិភពលោក។
សូមរំឭកដែរថា រយៈពេល ៣០ ឆ្នាំសហគមន៍អន្តរជាតិបានធ្វើការរួមគ្នាជាមួយនឹងប្រទេសកម្ពុជា ដោយបានបោសសម្អាតដីដែលមានមីន និងយុទ្ធភណ្ឌមិនទាន់ផ្ទុះ បានប្រមាណ ២ ៥៥៤ គីឡូម៉ែត្រការ៉េ ចាប់ពីឆ្នាំ ១៩៩២ ដល់ខែធ្នូ ឆ្នាំ ២០២២។ រីឯដីដែលរំដោះបានទាំងនោះត្រូវបានប្រគល់ជូនសហគមន៍វិញដើម្បីប្រើប្រាស់ក្នុងគោលដៅផ្សេងៗដូចជា កសិកម្ម ការតាំងលំនៅថ្មី ផ្លូវថ្នល់ សាលារៀន និងហេដ្ឋារចនាសម្ព័ន្ធសង្គមផ្សេងៗទៀត។
សូមបញ្ជាក់ថា កិច្ចប្រជុំគណៈកម្មាធិការដឹកនាំគម្រោងបោសសម្អាតមីនរបស់ទីភ្នាក់ងារស្វ៊ីសសម្រាប់ការអភិវឌ្ឍន៍និងកិច្ចសហប្រតិបត្តិការក៏មានការចូលរួមពីលោក Stefan Messerer ឯកអគ្គរដ្ឋទូតអាល្លឺម៉ង់ប្រចាំកម្ពុជា, លោក Dominic Williams ឯកអគ្គរដ្ឋទូតចក្រភពអង់គ្លេសប្រចាំកម្ពុជា,លោក Markus Buerliនាយកទីភ្នាក់ងារស្វ៊ីសសម្រាប់ការអភិវឌ្ឍន៍និងកិច្ចសហប្រតិបត្តិការ,លោកស្រី ប៊ុត រតនា តំណាង HD R& D និងលោក Miles Hawthorn នាយកអង្គការ HALO Trust ប្រចាំកម្ពុជាផងដែរ៕