ភ្នំពេញៈ ក្រសួងសុខាភិបាលកម្ពុជាប្រកាសរកឃើញអ្នកឆ្លងជំងឺកូវីដ ១៩ ចំនួន ៣ នាក់បន្ថែមទៀត ខណៈអ្នកទើបជាសះស្បើយថ្មីមាន ២ នាក់ ប៉ុន្តែមិនមានអ្នកស្លាប់ដោយសារជំងឺនេះទេ។
សេចក្តីប្រកាសព័ត៌មានរបស់ក្រសួងសុខាភិបាលនៅថ្ងៃទី ១៨ ខែមករា ឆ្នាំ ២០២៣ បានឱ្យដឹងថា ក្រសួងរកឃើញអ្នកមានជំងឺកូវីដ ១៩ ចំនួន ៣ នាក់បន្ថែមទៀត សុទ្ធតែប្រភេទអូមីក្រុងទាំងអស់។ ទាំង ៣ នាក់នោះ មាន ២ នាក់ ត្រូវបានរកឃើញមានកូវីដ ១៩ ក្នុងករណីស្នើសុំវិញ្ញាបនបត្រចេញទៅក្រៅប្រទេស។ ក្រសួងបញ្ជាក់ថា របាយការណ៍ថ្ងៃនេះ មានអ្នកជាសះស្បើយថ្មី ២ នាក់ និងគ្មានអ្នកស្លាប់ឡើយ។
បើតាមក្រសួងសុខាភិបាល គិតត្រឹមថ្ងៃទី ១៨ ខែ មករានេះ ចំនួនករណីឆ្លងជំងឺកូវីដ ១៩ សរុបកើនដល់ចំនួន ១៣៨ ៦៦៨ នាក់ ចំណែកករណីជាសះស្បើយសរុប ១៣៥ ៦០០ នាក់ និងករណីស្លាប់សរុប ៣ ០៥៦ នាក់។ រីឯករណីនាំចូលពីក្រៅប្រទេសសរុបមានចំនួន ២១ ២៤១ នាក់ និងករណីអូមីក្រុងឆ្លងក្នុងសហគមន៍កើនដល់ ១៦ ៨៤៣ នាក់៕