កំពង់ស្ពឺៈ រដ្ឋបាលស្រុកបសេដ្ឋ បានសម្រេចផ្អាកជាបន្ទាន់នូវសកម្មភាពធ្វើការទិញលក់ដីដោយខុសច្បាប់ និងសកម្មភាពបើកទឹកបង្គោកអាងទំនប់តានួន និងអាងទំនប់តាដែង ក្នុងឃុំពោធិ៍ម្រាល ស្រុកបសេដ្ឋ ខេត្តកំពង់ស្ពឺ បន្ទាប់ពីត្រូវបានព្រមានដោយអង្គភាពប្រឆាំងអំពើពុករលួយ (អបព) ។
លោក សៅ រិទ្ធ អភិបាលរង និងជាអ្នកនាំពាក្យរដ្ឋបាលស្រុកបសេដ្ឋ បានឱ្យដឹងនៅថ្ងៃទី១៨ ខែមករាថា បន្ទាប់ពីទទួលបានលិខិតពី អបព កាលពីរសៀលថ្ងៃទី ១៦ ខែមករា រដ្ឋបាលស្រុកបានធ្វើការកោះប្រជុំនៅព្រឹកថ្ងៃទី ១៧ ខែមករា ដើម្បីចេញលិខិតផ្លូវការសម្រេចផ្អាកសកម្មភាពទាំង២ករណីតាមអ្វីដែល អបព បានស្នើសុំ។
លោកបន្តថា ក្នុងនោះរដ្ឋបាលស្រុកបានជូនលិខិតទៅ លោកស្រី វន់ ឈើវិនគី អានសាយណាវ ឱ្យបញ្ឈប់ជាបន្ទាន់ការប្រមូលទិញដីដោយខុសច្បាប់ ដោយមានលោក ស៊ិន សារុន នាយករដ្ឋបាលស្រុក ជាអ្នករៀបចំយកដីរបស់រដ្ឋក្រោមការគ្រប់គ្រងរបស់មន្ទីរបរិស្ថានខេត្តលក់ឱ្យឈ្មួញ។ លិខិត១ទៀតរបស់រដ្ឋបាលស្រុកបានជូនដំណឹងទៅលោក លោក ស៊ិន សារុន ឱ្យបញ្ឈប់ជាបន្ទាន់ នូវការបើកបង្គោកទឹកក្នុងអាងទំនប់ទឹកទាំង២នោះ។
អ្នកនាំពាក្យរដ្ឋបាលស្រុកបសេដ្ឋបានឱ្យដឹងថា ថ្នាក់ដឹកនាំស្រុកមិនបានដឹងថា មានករណីលួចចូលទិញដីដោយខុសច្បាប់នេះមានចំនួនប៉ុន្មានហិកតានោះទេ ប៉ុន្តែបើតាមមើលដីនៅក្នុងអាងទឹកមានប្រហែល ១៦០ ហិកតា ក្នុងនោះមានគេបោះពង្គោលពង្រីកយកដីពិតប្រាកដមែន។
លោកថ្លែងថា៖«អាងហ្នឹងយើងមើលទៅឃើញមានករណីបោះបង្គោលពង្រីកដើម្បីយកដីរដ្ឋលក់ យើងមើលទៅឃើញមានមែន ហើយបោះបង្គោលហ្នឹង យើងក៏មិនមែនឱ្យដកទើបតែថ្ងៃហ្នឹងទេ យើងបានឱ្យដកចេញមួយសារួចមកហើយប៉ុន្តែនៅតែមានទៀត ហើយរឿង ថា គេឃុបឃិតយ៉ាងណានោះ គណៈអភិបាលស្រុកអត់បានដឹងទេ»។
លោក សៅ រិទ្ធ ប្រាប់ថា អាងទឹកទាំង២នោះ ទី១ គឺអាងទំនប់តានួន មានទីតាំងនៅភូមិតានួន ឃុំពោធិ៍ម្រាល និងអាងទី២ គឺអាងទំនប់តាដែង ស្ថិតក្នុងភូមិតាដែង ឃុំពោធិ៍ម្រាល នៃស្រុកបសេដ្ឋ។ អាងទាំងនេះ ប្រជាជនបានអាស្រ័យផលប្រើប្រាស់សម្រាប់នេសាទត្រី ដកព្រលឹត យកទឹកធ្វើស្រែប្រាំង និងយកទឹកប្រើប្រាស់ផ្សេងៗ។
លោក សយ ច័ន្ទវិចិត្ត អ្នកនាំពាក្យអង្គភាពប្រឆាំងអំពើពុករលួយ បានឱ្យដឹងថា អបព កំពុងធ្វើការស្រាវជ្រាវពាក់ព័ន្ធករណីនៃការលក់ដូរដី ដែលអាចជាដីសាធារណៈរបស់រដ្ឋ ហេតុនេះដើម្បីកុំឱ្យប៉ះពាល់ដល់ការងាររបស់អង្គភាព ទើបអង្គភាព ធ្វើការជូនដំណឹងទៅគណៈអភិបាលស្រុកបសេដ្ឋ ក៏ដូចជានាយករដ្ឋបាលស្រុក ឱ្យបញ្ឈប់សកម្មភាពនោះ។
លោកថ្លែងថា៖«យើងមិនទាន់សរុបពីការងារហ្នឹងទាំងអស់ទេ ឥឡូវនេះវានៅក្នុងដំណាក់កាលស៊ើបអង្គេត អ៊ីចឹងអត់ឱ្យមានរឿង មកប៉ះពាល់ទេ បើគាត់នៅធ្វើរឿងហ្នឹងទៀត វាធ្វើឱ្យការស៊ីបអង្គេតកាន់តែស្មុកស្មាញជាងហ្នឹង»។
អ្នកនាំពាក្យ អបព បញ្ជាក់ថា ដោយសារ អបព កំពុងបន្តការងារស៊ើបអង្គេត ហេតុនេះមិនទាន់អាចប្រាប់អំពីទំហំដី ទីតាំង រឿងវ៉ាវជុំវិញការលួចលក់ដីរដ្ឋនេះឱ្យច្បាស់លម្អិតបានទេ។
ភ្នំពេញប៉ុស្តិ៍មិនអាចទំនាក់ទំនងសុំការបំភ្លឺពីលោក ស៊ិន សារុន នាយករដ្ឋបាលស្រុកបសេដ្ឋបានទេ នៅរសៀលថ្ងៃទី ១៨ ខែមករា ដោយសារទូរស័ព្ទចូលតែមិនមានអ្នកទទួល។ ចំណែកលោកស្រី វន់ ឈើវិន គីអានសាយណាវ មិនអាចស្វែងរកប្រភពទំនាក់ទំនងបានទេ។
តាមលិខិតរបស់ អបព ជម្រាបជូនអភិបាលស្រុកបសេដ្ឋកាលពីថ្ងៃទី ១៦ មករា បានឱ្យដឹងថា អបព បានស្នើសុំផ្អាកសកម្មភាពអនុញ្ញាតឱ្យលោកស្រី វន់ ឈើវិន គីអានសាយណាវ ក្នុងការប្រមូលទិញដីដោយខុសច្បាប់ និងសុំឱ្យ លោក ស៊ិន សារុន នាយករដ្ឋបាលស្រុក បញ្ឈប់សកម្មភាពបើកទឹកបង្គោកអាង ដើម្បីធ្វើការវាស់វែងយកដីលក់។ អបព បានព្រមានថា ក្នុងករណីលោកអភិបាលស្រុកមិនព្រមបញ្ឈប់នូវសកម្មភាពទាំងនេះ អបព នឹងស្នើអាជ្ញាធរ តាមឋានានុក្រមពាក់ព័ន្ធផ្អាកជាបណ្តោះអាសន្ននូវមុខងារបស់លោកអភិបាលស្រុក៕