ភ្នំពេញៈ មន្ទីរពេទ្យព្រះអង្គដួងបានធ្វើការវះកាត់ ព្យាបាលជំងឺគថ្លង់ពីកំណើតឱ្យស្តាប់ឮ និងចេះនិយាយបានដោយជោគជ័យ ១០០% បានចំនួន ៤៩ ត្រចៀក ស្មើនឹងមនុស្ស ៣៦ នាក់គិតចាប់ពីឆ្នាំ ២០១៨ រហូតមកដល់ដើមឆ្នាំ ២០២៣នេះ។ នេះបើតាមលោកស្រីវេជ្ជបណ្ឌិត យស សុភ័ណ្ឌ អនុប្រធានទី១ ផ្នែកត្រចៀក ច្រមុះ បំពង់ក នៃមន្ទីរពេទ្យព្រះអង្គឌួង។
លោកស្រីបានឱ្យដឹងនៅថ្ងៃទី ១៧ ខែមករាថា ការវះកាត់ទទួលបានជោគជ័យក្នុងពេលកន្លងទៅចំនួន ៤៩ ត្រចៀកនេះ មានក្មេងអាយុទាបបំផុតត្រឹម ៣ ឆ្នាំ ហើយក្នុងនោះក៏មានមនុស្សចាស់មួយចំនួនផងដែរ។ ភាពជោគជ័យមានភាគរយខ្ពស់ទៅតាមក្មេង ក្នុងនោះមានក្មេងខ្លះដែលធ្លាប់ស្តាប់ឮខ្លះពីកំណើត នៅពេលដែលដាក់បញ្ចូលម៉ាស៊ីនភ្ញោចសំឡេង គឺអាចឆាប់និយាយបានច្រើនជាងក្មេងដែលមិនធ្លាប់បានស្តាប់ឮសោះ។
លោកស្រីថ្លែងថា៖ «ក្មេងភាគច្រើន គឺក្រោយពេលវះកាត់ហើយគាត់មករៀននិយាយនៅពេទ្យយើងទៀត។ អ៊ីចឹងគាត់អាចប្រាស្រ័យទាក់ទងជាមួយគ្រួសារគាត់បាន ទោះបីជាកាត់មិនចេះពាក្យបានច្រើន ប៉ុន្តែពាក្យសាមញ្ញក្នុងផ្ទះ គឺគាត់ចេះ គាត់ស្គាល់ឈ្មោះអ្នកផ្ទះ ចេះហៅឈ្មោះអ្នកផ្ទះ អ្វីដែលសាមញ្ញក្នុងជីវភាពរស់នៅប្រចាំថ្ងៃ គឺគាត់អាចប្រើបាន»។
លោកស្រីវេជ្ជបណ្ឌិតបន្តថា ជាទូទៅមុនការវះកាត់គ្រូពេទ្យតែងតែពន្យល់អាណាព្យាបាលក្មេងៗ អំពីស្ថានភាពជំងឺកូនៗ ឬសាច់ញាតិរបស់ពួកគាត់ ហើយនៅក្រោយការវះកាត់ត្រូវការប្រើម៉ាស៊ីនភ្ញោចឱ្យឮសំឡេង និងជួយថែរក្សាម៉ាស៊ីនដែលនៅក្នុងក្បាលអ្នកជំងឺ និងយកអ្នកជំងឺមកបង្រៀននិយាយនៅមន្ទីរពេទ្យ។
លោកស្រីបញ្ជាក់ថា៖ «ពួកខ្ញុំមានការសហការជាមួយកូរ៉េ យើងបង្កើតជាមជ្ឈមណ្ឌល ១ ដើម្បីជួយបង្រៀនក្មេងដែលវះកាត់ហើយឱ្យគាត់ចេះនិយាយ ព្រោះម៉ាស៊ីនជាផ្នែក ១ នៃវិទ្យាសាស្ត្រដែលយើងដាក់ទៅក្នុងត្រចៀកដើម្បីភ្ញោចសំឡេងពីក្រៅឱ្យគាត់ឮ អ៊ីចឹងនៅពេលគាត់ឮសំឡេងហើយយើងត្រូវការ ១ តង់ទៀត គឺបង្រៀនគាត់ឱ្យចេះនិយាយ»។
លោកស្រី យស សុភ័ណ្ឌ ប្រាប់ថា នៅមន្ទីរពេទ្យព្រះអង្គដួងមានឧបករណ៍បច្ចេកទេសគ្រប់គ្រាន់ ដែលអាចធ្វើតេស្តក្មេងតាំងពីទើបកើតង៉ាឱ្យដឹងថា គថ្លង់ឬអត់ ហើយឧបករណ៍ទំនើបសម្រាប់ធ្វើតេស្តក្មេងតូចៗដែលប្រទេសរីកចម្រើនគេមានក៏កម្ពុជាមានផងដែរ។ ហេតុនេះមន្ទីរពេទ្យអាចឆាប់ធ្វើការវិនិច្ឆ័យបាន ហើយក្មេងៗ ក៏ឆាប់បានទទួលការវះកាត់ព្យាបាលផងដែរ។ បច្ចុប្បន្ន មានក្មេងៗខ្លះឪពុកម្តាយនាំយកមកពិនិត្យធ្វើការព្យាបាលតាំងពីក្មេងៗនៅបីនឹងដៃក៏មាន។
លោក លូ លីឃាង នាយកមន្ទីរពេទ្យព្រះអង្គឌួង ឱ្យដឹងនៅថ្ងៃទី ១៧ ខែមករាថា ការវះកាត់ការគថ្លង់ពីកំណើតជារឿងសំខាន់ណាស់ ហើយនេះជាលើកដំបូងដែលកម្ពុជាធ្វើការវះកាត់បានដោយជោគជ័យ ចំពោះការគថ្លង់ឱ្យស្តាប់ឮ និងនិយាយបានវិញ។
ក្រោយពីបានវះកាត់ចំណុចល្អ គឺអាចស្តាប់បាន ដោយដាក់ម៉ាស៊ីនផ្សំចូលទៅក្នុងត្រចៀក ហើយនៅពេលអាចស្តាប់បានគេត្រូវចំណាយពេលរៀននិយាយតាមពេលវេលាជាក់ស្តែង និងទៅតាមស្ថានភាពនៃអ្នកដែលបានវះកាត់ យ៉ាងណា ការវះកាត់បានជោគជ័យភាគច្រើនបានចំពោះក្មេងៗ អាយុ ២ ឬ ៣ ឆ្នាំ។
លោកថ្លែងថា៖ «ក្មេងៗជោគជ័យលឿននៅក្នុងការរៀននិយាយ បើមនុស្សចាស់និយាយទៅបែរជាដំឡាន់ៗអត់ច្បាស់ គាត់ស្តាប់បាន ប៉ុន្តែគាត់និយាយដំឡាន់ៗនៅពេលគាត់ធំហើយ ប្រហែលពិបាកក្នុងការពត់អណ្តាត»។ បើតាមលោក លូ លីឃាង ចំនួន ៤៩ ត្រចៀកដែលបានវះកាត់ទទួលបានជោគជ័យនេះ គិតចំនួនមនុស្សមានចំនួន ៣៦ នាក់ មានន័យថា មានអ្នកខ្លះបានវះកាត់ដាក់ម៉ាស៊ីនភ្ញោចសំឡេងទាំងសងខាង និងខ្លះដាក់តែត្រចៀកម្ខាងប៉ុណ្ណោះ៕