ភ្នំពេញៈ មន្រ្តីជាន់ខ្ពស់ក្រសួងសុខាភិបាល បានលើកឡើងពីអត្ថប្រយោជន៍នៃការធ្វើតេស្តរហ័សរកមេរោគកូវីដ ១៩ ដោយខ្លួនឯង ក្នុងករណីសង្ស័យថា ឆ្លងវីរុសកូវីដ ដែលការធ្វើតេស្តបែបនេះ គឺជាការជួយសង្គ្រោះ និងមានការថែទាំព្យាបាលខ្លួនឯងឱ្យបានទាន់ពេលវេលា។
លោកស្រីឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងជំងឺកូវីដ១៩ ក្នុងក្របខ័ណ្ឌទូទាំងប្រទេស(គ.វ.ក-១៩) បានលើកឡើង កាលពីថ្ងៃទី១៨ ខែមករា ថា បច្ចុប្បន្ន វីរុសកូវីដ១៩ មិនទាន់ទៅណាឆ្ងាយទេ ហើយពពួកអូមីក្រុងបំប្លែងខ្លួនថ្មីៗ ក៏កំពុងតែចរាចរនៅលើសកលលោក និងនៅក្នុងតំបន់ផងដែរ។
លោកស្រីថ្លែងថា៖«ដើម្បីជួយដល់ការថែទាំសុខភាព និងព្យាបាលបានទាន់ពេលវេលា ព្រមទាំងការពារផលប៉ះពាល់សុខភាពធ្ងន់ធ្ងរពីជំងឺកូវីដ១៩ ប្រសិនបើលោកអ្នកមានរោគសញ្ញាសង្ស័យ សូមកុំភ្លេចប្រញាប់ធ្វើតេស្ដរហ័សដោយខ្លួនឯង ដើម្បីពិនិត្យរកវត្តមានវីរុសកូវីដ១៩ឱ្យបានលឿន»។
លោកស្រីឱ វណ្ណឌីន បន្ថែមថា ក្នុងករណី រកឃើញមានវិជ្ជមានវីរុសកូវីដ១៩ ត្រូវដាក់ខ្លួននៅដាច់ដោយឡែកពីគេ ចៀសវាងការចម្លងបន្តទៅក្រុមគ្រួសារ ឬទៅអ្នកដទៃ។ ត្រូវធ្វើការថែទាំ និងព្យាបាលខ្លួនឱ្យបានឆាប់រហ័ស ដើម្បីចូលរួមកាត់បន្ថយបានជាអតិបរមា នូវការចម្លងបន្ត និងការសម្រាកព្យាបាលនៅមន្ទីរពេទ្យ ដោយភាពធ្ងន់ធ្ងរ ព្រមទាំងអាចសន្សំសំចៃថវិកាពីការចំណាយលើការថែទាំព្យាបាលជំងឺធ្ងន់ផងដែរ។
នាឱកាសសែនដូនតា និងចូលឆ្នាំប្រពៃណីជាតិខ្មែរខាងមុខនេះ ប្រជាពលរដ្ឋទាំងអស់ បន្តការប្រុងប្រយ័ត្ន និងអនុវត្តវិធានការការពារខ្លួនពីការចម្លងវីរុសកូវីដ១៩ ដោយអនុវត្តជាចាំបាច់នូវវិធានការ ៣ការពារ និង៣កុំ និងបន្តទៅទទួលយកការចាក់វ៉ាក់សាំងជំងឺកូវីដ១៩ដូសជំរុញ នៅពេលដល់វេនឱ្យបានត្រឹមត្រូវតាមពេលវេលា។ នេះបើតាមលោកស្រីឱ វណ្ណឌីន។
លោកស្រីបញ្ជាក់ថា៖«សូមកុំភ្លេច ការធ្វើតេស្តរហ័សដោយខ្លួនឯង គឺជួយសង្គ្រោះខ្លួនឯង ឱ្យមានការថែទាំ និងព្យាបាលបានទាន់ពេលវេលា ធ្វើតេស្តរហ័ស និងព្យាបាលរហ័ស ជាមធ្យោបាយដ៏ល្អជួយអាយុជីវិតលោកអ្នកពីសត្រូវអត់ស្រមោលកូវីដ១៩»។
ទន្ទឹមនឹងនេះ លោកនាយករដ្ឋមន្រ្តីហ៊ុន សែន ក្នុងឱកាសចុះពិនិត្យការសាងសង់មន្ទីរពេទ្យជាតិ«តេជោសន្ដិភាព» និងសំណេះសំណាលជាមួយក្រុមការងារសាងសង់ នាថ្ងៃទី១៩ មករា លោកនៅតែបន្តក្រើនរំឭកឱ្យប្រជាពលរដ្ឋបន្តការការពារពីកូវីដ ដោយសារវានៅតែមាន ប៉ុន្តែដោយសារការគ្រប់គ្រងបានល្អ ទើបមិនមានការឆ្លងច្រើនដូចមុនឡើយ។
លោកក៏បានបញ្ជាក់ដែរថា៖«[ផលវិបាក]នាពេលកន្លងមក បានផ្តល់មេរៀនឱ្យយើងថា យើងត្រូវមានសមត្ថភាពគ្រប់គ្រងសភាពការណ៍បានទាន់ពេលវេលា ប្រសិនបើមានការផ្ទុះឡើងវិញ នូវការឆ្លងណាមួយកើតឡើងនោះ។ បញ្ហាសុខភាពប្រជាជន គឺជាគោលដៅចម្បងមួយ ក្នុងចំណោមគោលដៅអាទិភាព ដែលយើងត្រូវដោះស្រាយបញ្ហានេះសម្រាប់ការពិនិត្យ និងព្យាបាលប្រជាជនរបស់យើង»។
សូមបញ្ជាក់ថាអគារ«មន្ទីរពេទ្យជាតិតេជោសន្ដិភាព» មានចំនួន១១អគារ ដែលមន្ទីរពេទ្យជាតិតេជោសន្ដិភាពនេះស្ថាបនាដោយក្រុមហ៊ុន ស៊ីជេអុីស៊ី CJEC .co, Ltd សហការជាមួយសាលារាជធានីភ្នំពេញ។ មន្ទីរពេទ្យជាតិតេជោសន្ដិភាព ត្រូវបានរដ្ឋបាលរាជធានីភ្នំពេញ បើកការដ្ឋានសាងសង់ កាលពីថ្ងៃទី១៤ ខែកុម្ភៈ ឆ្នាំ២០២២។មន្ទីរពេទ្យជាតិដ៏ធំមួយនេះ គ្រោងនឹងបញ្ចប់ការសាងសង់រួចជាស្ថាពរ និងដាក់ឱ្យដំណើរការជាផ្លូវការនៅខែមិថុនាឆ្នាំ២០២៣ ដែលមកដល់ពេលនេះ សាងសង់បានប្រមាណជា៨០ភាគរយហើយ៕