ភ្នំពេញៈ រាជរដ្ឋាភិបាលតាមរយៈក្រសួងការងារ បានប្រកាសផ្តល់ប្រាក់ឧបត្ថម្ភលើកទី៨៨ ជូនដល់កម្មករនិយោជិតក្នុងវិស័យទេសចរណ៍ប្រមាណ ៩០០ នាក់ ដែលត្រូវបានព្យួរកិច្ចសន្យាការងារ ដោយសារផលប៉ះពាល់ពីការរីករាលដាលនៃជំងឺកូវីដ ១៩ ស្របតាមស្មារតីនៃកញ្ចប់វិធានការរបស់រាជរដ្ឋាភិបាល។
សេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈចុះថ្ងៃទី ១៨ មករា បានឱ្យដឹងថា ការផ្តល់ជូនសាច់ប្រាក់ឧបត្ថម្ភលើកទី៨៨ នេះ មានកម្មករនិយោជិតក្នុងវិស័យទេសចរណ៍ចំនួន ៨៦៦ នាក់ នៃសហគ្រាសទាំង ១២ នៃវិស័យទេសចរណ៍ដែលត្រូវបានព្យួរកិច្ចសន្យាការងារស្របតាមស្មារតីជុំទី៣ នៃកញ្ចប់វិធានការរបស់រាជរដ្ឋាភិបាល។
សេចក្តីជូនដំណឹងបន្តថា ធនាគារឯកទេសវីង នឹងផ្ញើសារអំពីការបើកប្រាក់ឧបត្ថម្ភរបស់រាជរដ្ឋាភិបាលទៅលេខទូរស័ព្ទ ដែលកម្មករបានផ្ដល់មកឱ្យក្រសួងតាមរយៈរដ្ឋបាលរោងចក្រ សហគ្រាសនាពេលកន្លងមក។
ប្រាក់ឧបត្ថម្ភនេះ នឹងត្រូវបើកផ្តល់ជាប្រាក់រៀល និងអាស្រ័យលើចំនួនថ្ងៃនៃការព្យួរកិច្ចសន្យាការងារក្នុងនោះកម្មករនិយោជិតម្នាក់ៗនឹងទទួលបានប្រាក់ចំនួន ១២១ ៥០០ រៀល (៣០ ដុល្លារ) សម្រាប់ការព្យួរកិច្ចសន្យាការងាររយៈពេលពី ១១ ថ្ងៃ ដល់ ២០ ថ្ងៃ និងទទួលបាន ១៦២ ០០០ រៀល (៤០ ដុល្លារ) សម្រាប់ការព្យួរកិច្ចសន្យាការងាររយៈពេលចាប់ពី ២១ ថ្ងៃ ដល់ ១ ខែ។
ប្រធានក្រុមប្រឹក្សាភិបាលសមាគមទេសចរណ៍កម្ពុជាលោក ហូ វណ្ឌី មានប្រសាសន៍ថា ការបន្តផ្តល់ប្រាក់ឧបត្ថម្ភ ជូនកម្មករនិយោជិតក្នុងវិស័យទេសចរណ៍នាពេលនេះ គឺជាការលើកទឹកចិត្តដល់វិនិយោគិនក្នុងស្រុក និងក្រៅស្រុក ដើម្បីជួយសម្រួលដល់ការបើកដំណើរការឡើងវិញ។
លោកបន្តថា ទោះបីវិស័យនេះហាក់បានងើបឡើងវិញបន្តិចមែន ប៉ុន្តែនៅតែជួបបញ្ហាប្រឈមផ្នែកហិរញ្ញវត្ថុដដែល។ លោកថា៖ «នេះជាការលើកទឹកចិត្តទៅដល់ពួកគាត់ពីព្រោះ ការបើកដំណើរការឡើងវិញមិនទាន់មានផលចំណេញនៅឡើយទេក្នុងវិស័យនេះ។ យើងឃើញហើយវិស័យនេះ បានលិចលង់ជាង ២ ឆ្នាំ ដូច្នេះការស្រោចស្រង់នៅក្នុងវិស័យនេះឡើងវិញ ត្រូវប្រើពេលវេលាបន្តទៀត»។ លោកបន្តទៀតថា ប្រសិនបើករណីកូវីដ ១៩ មិនបន្តឆ្លងរាលដាលនៅលើពិភពលោក មិនមានដាក់រនាំងការឆ្លងដែន មិនបង្អាក់នូវសេវាកម្មផ្សេង ឬមិនមានគ្រោះធម្មជាតិទេនោះ វិស័យទេសចរណ៍ នឹងវិលត្រឡប់មករក ភាពប្រក្រតីឡើងវិញនៅឆ្នាំ ២០២៤ ឬ ២០២៥ ខាងមុខ។
ក្រសួងការងារ បានរំឭកថា ធនាគារវីង នឹងបង្វិលប្រាក់ឧបត្ថម្ភនេះជូនរាជរដ្ឋាភិបាលវិញ ប្រសិនកម្មករ ខកខានមិនបានទៅបើកប្រាក់ឧបត្ថម្ភនេះ ក្នុងរយៈពេល ១០ ថ្ងៃ បន្ទាប់ពីទទួលបានសារតាមទូរស័ព្ទពីធនាគារវីង។ ដើម្បីបើកប្រាក់ឧបត្ថម្ភនេះ កម្មករត្រូវយកអត្តសញ្ញាណប័ណ្ណសញ្ជាតិខ្មែរ និងទូរស័ព្ទដែលទទួលបានសារនោះ ទៅកាន់ភ្នាក់ងារវីងដែលនៅជិតបំផុតហើយមិនតម្រូវឱ្យបង់ថ្លៃសេវាទៅភ្នាក់ងារវីងឡើយពេលបើកប្រាក់ឧបត្ថម្ភនេះ។
ក្នុងករណីកម្មករនិយោជិត ដែលបម្រើការងារនៅសហគ្រាសទាំង ១២ នេះ មិនបានទទួលសារតាមទូរស័ព្ទពីធនាគារវីង សូមទំនាក់ទំនងសួរព័ត៌មានបន្ថែម ឬធ្វើបច្ចុប្បន្នភាពលេខទូរស័ព្ទ ទៅរដ្ឋបាលសហគ្រាសរបស់ខ្លួន៕