.jpg)
មន្ទីរពេទ្យជាតិតេជោសន្ដិភាពដែលកំពុងសាងសង់ស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន ចាត់ទុក «មន្ទីរពេទ្យជាតិតេជោសន្ដិភាព» នៅខណ្ឌព្រែកព្នៅ រាជធានីភ្នំពេញ ដែលកំពុងដំណើរការសាងសង់ គឺជាមន្ទីរពេទ្យធំជាងគេបង្អស់នៅកម្ពុជា ដែលមានសមត្ថភាពផ្ទុកគ្រែបានចំនួនជិត ១ ម៉ឺនគ្រែ។
ជាមួយគ្នានេះ លោកក៏បានសម្រេចឱ្យជ្រើសរើសគ្រូពេទ្យ ២០០ នាក់ និងបុគ្គលិកជាប់កិច្ចសន្យា ៣០០ នាក់បន្ថែមទៀត សម្រាប់បម្រើការងារនៅមន្ទីរពេទ្យនេះ។
លោកលើកឡើងថា ដោយសារបញ្ហាសុខភាពប្រជាជន គឺជាគោលដៅចម្បងមួយក្នុងចំណោមគោលដៅអាទិភាព ដែលរាជរដ្ឋាភិបាលត្រូវដោះស្រាយសម្រាប់ការពិនិត្យ និងព្យាបាលប្រជាជន ទើប «យើងសម្រេចកសាងមន្ទីរពេទ្យនៅទីនេះ ដែលសមត្ថភាពទទួលរហូតទៅដល់ជិត ១ ម៉ឺនគ្រែ ដែលអាចចាត់ទុកថាជាមន្ទីរពេទ្យ បើនៅក្នុងព្រះរាជាណាចក្រកម្ពុជា គឺមន្ទីរពេទ្យនេះ គឺធំជាងគេទាំងអស់»។
ក្នុងឱកាសលោកពិនិត្យមើលវឌ្ឍនភាពនៃការសាងសង់មន្ទីរពេទ្យនេះ ដែលមានទីតាំងស្ថិតនៅសង្កាត់គោករកា ខណ្ឌព្រែកព្នៅ នាថ្ងៃទី ១៩ ខែមករា លោក ហ៊ុន សែន លើកឡើងថា មន្ទីរពេទ្យមិត្តភាពខ្មែរ-សូវៀត ឬហៅថា ពេទ្យរុស្ស៊ី គឺស្មើនឹង ១០ ដង នៃចំនួនគ្រែរបស់ «មន្ទីរពេទ្យជាតិតេជោសន្ដិភាព» នេះ។
លោកបានដកស្រង់ការបញ្ជាក់ពីលោក ម៉ម ប៊ុនហេង រដ្ឋមន្ត្រីសុខាភិបាលថា មន្ទីរពេទ្យនៅភ្នំពេញដែលមានសមត្ថភាពទទួលអ្នកជំងឺខ្ពស់បំផុត គឺត្រឹមតែ ៥ ០០០ នាក់ តែប៉ុណ្ណោះ។
លោកនាយករដ្ឋមន្ត្រីបានលើកឡើងពីគោលដៅដើមនៃការកសាងមន្ទីរពេទ្យនេះថា គឺសម្រាប់គ្រប់គ្រងនៃការផ្ទុះនៃជំងឺឆ្លង ប៉ុន្តែឥឡូវនេះទោះបីមិនមានជំងឺឆ្លងក៏ដោយក៏មន្ទីរពេទ្យមានការបំពាក់គ្រែចំនួនប្រមាណជាង ២ ០០០ គ្រែ នៅក្នុងអគារ ១ សម្រាប់ជំងឺឆ្លង ដើម្បីបម្រុងទុក ព្រោះអ្នកមានជំងឺកូវីដ ១៩ មិនអាចយកទៅព្យាបាលតាមមន្ទីរពេទ្យនានានោះដូចកាលពីមុននោះទេ។
លោកថ្លែងថា៖ «ឥឡូវនេះ គឺយើងអាចផ្ទេរអ្នកជំងឺនោះមកកាន់ទីនេះវិញ ដែលមានតម្រូវការសម្រាប់ការព្យាបាលកូវីដ ដើម្បីដោះស្រាយបញ្ហានេះ បញ្ហាអ្នកជំងឺនេះមន្ទីរពេទ្យទាំងនោះ ឱ្យទៅព្យាបាលជំងឺធម្មតា»។
ទីតាំងមន្ទីរពេទ្យដែលធំជាងគេនៅកម្ពុជាពីថ្ងៃទី ១៩ មករា។ រូបថត SPM
ជាមួយគ្នានេះលោក ហ៊ុន សែន បានលើកឡើងថា ចាប់ពីឆ្នាំនេះទៅ វិស័យអប់រំ និងសុខាភិបាល គឺជាវិស័យដែលទទួលបានអាទិភាពខ្ពស់ជាងគេ ដើម្បីអភិវឌ្ឍធនធានមនុស្ស និងសុខភាពសាធារណៈ ស្របពេលដែលសង្គមកម្ពុជាមានការជឿនលឿនដែលមានតម្រូវការផ្នែកទាំងនេះ។
លោកថា ជាទូទៅសង្គមមួយដែលមានការជឿនលឿន គឺតម្រូវការផ្នែកវិស័យអប់រំ សង្គមកិច្ច និងផ្នែកសុខាភិបាល សម្រាប់ប្រទេសមួយ។
លោកបានថ្លែងថា៖ «ថវិកាឆ្នាំ ២០២៣ នេះ គឺថវិកាបម្រើឱ្យមនុស្សតែម្តង ហើយចាប់ពីពេលនេះតទៅ វិស័យអប់រំ និងវិស័យសុខាភិបាល គឺជាវិស័យដែលទទួលបានអាទិភាពខ្ពស់ជាងគេ។ ក្រសួងនានា គឺកាត់បន្ថយនៃការជ្រើសរើសបុគ្គលិក ជួនកាលចូលនិវត្តន៍ ៥ នាក់ ជ្រើសរើសមកវិញតែ ២ ឬ ៣ នាក់ទេ ប៉ុន្តែសម្រាប់គ្រូពេទ្យឆ្នាំកន្លងទៅឱ្យជ្រើសរើស ៣ ពាន់នាក់» ។
លោកបញ្ជាក់បន្ថែមថា ការវិនិយោគលើវិស័យទាំងនេះ គឺជារឿងល្អសម្រាប់សង្គមកម្ពុជា ព្រោះវាទាក់ទងនឹងការវិនិយោគធនធានមនុស្ស និងការពារជីវិតមនុស្ស។ ពាក់ព័ន្ធនឹងមន្ទីរពេទ្យជាតិ «តេជោសន្ដិភាព» វិញ លោក ហ៊ុន សែន បានអនុញ្ញាតឱ្យមានអនុប្រធានចំនួន ៥ រូប និងសម្រេចឱ្យជ្រើសរើសពេទ្យចំនួន ២០០ នាក់បន្ថែមទៀត សម្រាប់បម្រើការងារនៅមន្ទីរពេទ្យ «តេជោសន្តិភាព»។ ជាមួយគ្នានោះលោកក៏បានអនុញ្ញាតផ្តល់បុគ្គលិកជាប់កិច្ចសន្យាចំនួន ៣០០ នាក់ សម្រាប់មន្ទីរពេទ្យជាតិនេះ ខណៈមន្ទីរពេទ្យនេះមានសមត្ថភាពទទួលអ្នកជំងឺបានរហូតទៅដល់ជិត ១ ម៉ឺននាក់។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្ដិភាព លោក យង់ គិមអេង បានថ្លែងថា វិស័យទាំង ២ នេះ ពិតជាដើរតួនាទីសំខាន់ ដែលជាវិស័យស្នូលនៅក្នុងប្រទេសកម្ពុជា ពីព្រោះការអភិវឌ្ឍប្រទេសឱ្យបានជឿនលឿនវាពឹងផ្អែកទៅលើការបណ្តុះបណ្តាលធនធានមនុស្សដែលមានគុណភាពខ្ពស់។
លោកបានបញ្ជាក់ថា៖ «ប្រសិនបើយើងធ្វើឱ្យវិស័យអប់រំល្អប្រសើរ ក៏យើងអាចកាត់បន្ថយអ្នកមានលុយកាក់ច្រើនទៅសិក្សានៅសាលាឯកជន ឬបញ្ជូនកូនចៅទៅរៀននៅប្រទេសជិតខាងដែលចំណាយលុយច្រើន។ ដូច្នេះបើវិស័យអប់រំយើងល្អ គឺលុយនេះនឹងនៅក្នុងស្រុក ហើយរឿងសុខាភិបាលក៏ដូចគ្នាដែរ យើងឃើញថា លុយចេញទៅប្រទេសជិតខាងច្រើនណាស់ ហើយប្រសិនបើយើងអាចរៀបចំបាន ស្តារវិស័យសុខាភិបាលបាន គឺលុយនេះនឹងចូលរដ្ឋច្រើន។ យើងដឹងហើយថា អ្នកមានលុយកាក់សឹងតែមិនសូវចូលពេទ្យនៅស្រុកខ្មែរទេ គឺនាំគ្នាសម្រុកទៅពេទ្យក្រៅប្រទេស»។
លោកបន្ថែមថា រឿងសំខាន់បំផុតនៅពេលយើងចង់ពង្រឹងវិស័យអប់រំ គឺត្រូវបំបាត់ឱ្យបាននូវការរៀនគួរ ដោយលោកចាត់ទុកថា វាជាបញ្ហាធំសម្រាប់សិស្ស ដែលពេលនោះគ្រូៗនឹងប្រើម៉ោងបង្រៀនក្នុងសាលាកាន់តែមានភាពហ្មត់ចត់។ ចំពោះវិស័យសុខាភិបាលវិញ លោកថា ជាដំបូងត្រូវកែប្រែក្រមសីលធម៌គ្រូពេទ្យដែលតែងតែប្រើពាក្យសម្ដីមិនសមរម្យ ចំពោះអ្នកជំងឺ ដែលជះឥទ្ធិពលអាក្រក់ដល់សង្គម រួមនឹងការបំពាក់ឧបករណ៍ទំនើបៗ និងតម្លៃសមរម្យ ទើបពលរដ្ឋងាកមករកសេវាសុខាភិបាលក្នុងស្រុកវិញ។
យោងសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ រាជរដ្ឋាភិបាលគម្រោងចំណាយថវិកាចំនួន ៣៩ ២០៦ ២០៥ លានរៀល (ប្រហែល ៩,៦ ពាន់លានដុល្លារ) ស្មើនឹង ២៩,៨៧% នៃផលិតផលក្នុងស្រុកសរុប (ផសស) មានកំណើន១៣% ធៀបនឹងច្បាប់ឆ្នាំ ២០២២។ ក្នុងនោះ វិស័យចំនួន ៣ ដែលទទួលបានថវិកាច្រើនជាងគេ រួមមាន ក្រសួងអប់រំ យុវជន និងកីឡា ក្រសួងសុខាភិបាល និងក្រសួងការពារជាតិ៕
