.jpg)
មន្ត្រីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការកន្លែងបន្លំ (កកប) ប្រចាំរាជធានីភ្នំពេញ បានរកឃើញ បង្គាប្រមាណ ២០០ គីឡូក្រាម ចាក់បញ្ចូលសារធាតុចាហួយ ដែលនាំឱ្យប៉ះពាល់ដល់សុខភាព ខណៈអំពាវនាវដល់ប្រជាពលរដ្ឋមានការប្រុងប្រយ័ត្ន ស្របពេលដែលវិស័យម្ហូបអាហារកើនឡើង។
ក្នុងឱកាសចូលឆ្នាំថ្មីប្រពៃណីចិន និងវៀតណាមដែលនឹងចូលមកដល់ មន្ត្រីសាខា កបប ប្រចាំរាជធានីភ្នំពេញ កាលពីថ្ងៃទី១៩ ខែមករា ឆ្នាំ២០២៣ បានចុះត្រួតពិនិត្យស្តង់លក់ផលិតផលសមុទ្រស្រស់ នៅម្តុំត្រឡោកបែក រាជធានីភ្នំពេញ ដើម្បីយកគំរូមកវិភាគរកវត្តមានសារធាតុគីមីហាមឃាត់ ដោយប្រើប្រាស់រថយន្តពិសោធន៍ចល័តផ្នែកម្ហូបអាហារ។
ប្រភព កបប បានឱ្យដឹងថា យោងលទ្ធផលវិភាគបឋមដោយឧបករណ៍ដែលបំពាក់លើរថយន្តពិសោធន៍ចល័ត ចំពោះគំរូផលិតផលចំនួន ៤០ បានបង្ហាញឱ្យឃើញថា ពុំមានប្រើប្រាស់សារធាតុគីមីហាមឃាត់ទេ។ ទោះយ៉ាងនេះក្តី មន្ត្រីជំនាញបានយកគំរូផលិតផលទាំងនោះមកវិភាគនៅមន្ទីរពិសោធន៍របស់អគ្គនាយកដ្ឋានបន្ថែមទៀត ដើម្បីផ្ទៀងផ្ទាត់លទ្ធផល។
ជាមួយគ្នានេះដែរ មន្ត្រីសាខាក.ប.ប. រាជធានីភ្នំពេញ បានត្រួតពិនិត្យផលិតផលបង្គាស្រស់ ដែលកំពុងដាក់លក់តាមបណ្តាស្តង់ និងបានរកឃើញបង្គាចំនួន ១៨០ គីឡូក្រាម មានចាក់បញ្ចូលសារធាតុ CMC (ចាហួយ)។
កកប បញ្ជាក់ថា ក្រោយរកឃើញបែបនេះ មន្ត្រីជំនាញ បានអនុវត្តនីតិវិធីពិន័យអន្តរការណ៍ រឹបអូសទំនិញទាំងនោះមកកម្ទេចចោលផងដែរ។
សូមបញ្ជាក់ថា សារធាតុ CMC (ចាហួយ) ជាសារធាតុដែលឈ្មួញ ខិលខូចមួយចំនួន តែងយកមកប្រើប្រាស់សម្រាប់ចាក់បញ្ចូលក្នុងផលិតផលបង្គាស្រស់ ដើម្បីបង្កើនទម្ងន់ ក្នុងគោលបំណងកឹបកេងផលប្រយោជន៍របស់អ្នកប្រើប្រាស់។
ស្របពេលដែលវិស័យម្ហូបអាហារត្រូវបានកើនឡើងទៅតាមកំណើនប្រជាពលរដ្ឋ កកប អំពាវនាវដល់ប្រជាពលរដ្ឋត្រូវប្រុងប្រយ័ត្ននូវម្ហូបអាហារដែលមិនមានអនុលោមភាពសម្រាប់សុខភាពផងដែរ។
តួយ៉ាង កាលពីថ្ងៃទី១៦ និង១៧ ខែមករា ឆ្នាំ២០២៣ មន្ត្រីជំនាញផ្នែកម្ហូបអាហាររបស់អគ្គនាយកដ្ឋាន ក.ប.ប. ដែលមាននៅតាមបណ្ដាសាខារាជធានី-ខេត្ត បានបន្តការត្រួតពិនិត្យយ៉ាងសកម្មក្នុងទីផ្សារ ជាពិសេសទំនិញមានហានិភ័យដែលចូលតាមច្រកព្រំដែនចូលមកប្រទេសកម្ពុជា ដើម្បីការពារ និងទប់ស្កាត់រាល់ទំនិញមិនមានអនុលោមភាពសម្រាប់អ្នកប្រើប្រាស់។
ការត្រួតពិនិត្យនេះគឺធ្វើឡើងនៅក្នុងរាជធានីភ្នំពេញ ខេត្តព្រៃវែង ខេត្តកំពង់ធំ ខេត្តរតនគិរី ខេត្តស្វាយរៀង ខេត្តឧត្តរមានជ័យ ខេត្តបន្ទាយមានជ័យ ខេត្តកំពង់ចាម ខេត្តបាត់ដំបង ខេត្តកំពង់ស្ពឺ ខេត្តកោះកុង និងខេត្តសៀមរាប ។
កបប បញ្ជាក់ថា តាមលទ្ធផលនៃត្រួតពិនិត្យគឺបានរកឃើញទំនិញមិនមានអនុលោមភាពចំនួន ៤៦៨,៤៥គីឡូក្រាម ដោយមន្ត្រីជំនាញបានធ្វើការដកហូតមករក្សាទុកដើម្បីកម្ទេចចោល និងពិន័យអន្តរការណ៍ស្របនឹងច្បាប់ដែលមានចែងផងដែរ៕
