.jpg)
គណៈប្រតិភូខេត្តព្រៃវែង និងខេត្តបន្ទាយមានជ័យ នៃកម្ពុជា ជួបជាមួយភាគីវៀតណាម ពង្រឹង និងពង្រីកទំនាក់ទំនងកិច្ចសហការច្រើនវិស័យ ដើម្បីប្រយោជន៍នៃប្រទេសទាំង២។ រូបថត រដ្ឋបាលខេត្តព្រៃវែង
បន្ទាយមានជ័យ/ព្រៃវែងៈ អាជ្ញាធរនៃខេត្តបន្ទាយមានជ័យ ខេត្តព្រៃវែង របស់កម្ពុជា និងខេត្តដុងថាប់ របស់វៀតណាម បានប្តេជ្ញាក្នុងការបន្តពង្រឹង និងពង្រីកទំនាក់ទំនងកិច្ចសហប្រតិបត្តិការលើច្រើនវិស័យ ពិសេស កិច្ចសហការលើផ្នែកពាណិជ្ជកម្ម ការវិនិយោគ និងធុរកិច្ច សាធារណការ និងដឹកជញ្ជូន សំដៅបម្រើផលប្រយោជន៍ភាគីទាំង ២។
ក្នុងដំណើរទស្សនកិច្ច ទៅកាន់ខេត្តដុងថាប់ នៃសាធារណរដ្ឋសង្គមនិយមវៀតណាម រយៈពេល២ថ្ងៃ កាលពីថ្ងៃទី១៨-១៩ ខែមករា ឆ្នាំ២០២៣គណ:ប្រតិភូរដ្ឋបាលខេត្តបន្ទាយមានជ័យ ដឹកនាំដោយ លោក អ៊ុំ រាត្រី អភិបាលខេត្ត និងគណៈប្រតិភូរដ្ឋបាលខេត្តព្រៃវែង ដឹកនាំដោយ លោក ជា សុមេធី អភិបាលខេត្ត បានជួបប្រជុំពិភាក្សាជាមួយ លោកផាម ធៀវ ងា (Pham Thiev Gnia) អនុលេខាបក្សកុម្មុយនីស្តវៀតណាមខេត្ត និងជាប្រធានគណ:កម្មាធិការប្រជាជនខេត្តដុងថាប់ និងលោកគៀវ ឆេឡឹម អនុប្រធានក្រុមប្រឹក្សាខេត្តដុងថាប់។
ជំនួបនេះ ក្នុងគោលបំណងដើម្បីពង្រឹងទំនាក់ទំនងមិត្តភាព ភាតរភាព សាមគ្គីភាព និងកិច្ចសហប្រតិបត្តិការ រវាងខេត្តទាំង៣ លើកិច្ចសហប្រតិបត្តិការជាច្រើនវិស័យ ដូចជា ទំនាក់ទំនងអន្តរជាតិ និងអ្នកជិតខាងល្អ ការពារជាតិ មហាផ្ទៃ កសិកម្ម ការដាំដុះ និងវារីវប្បកម្ម ពាណិជ្ជកម្ម ការវិនិយោគ និងធុរកិច្ច សាធារណការ និងដឹកជញ្ជូន ថាមពល ឧស្សាហកម្ម សិប្បកម្ម វិទ្យាសាស្ត្រ អប់រំ កីឡា បណ្តុះបណ្តាលធនធានមនុស្ស វប្បធម៌ និងសាសនា ទេសចរណ៍ជាដើម។
លោក ផាម ធៀវ ងា អនុលេខាបក្សខេត្តដុងថាប់ បានបញ្ជាក់ថា នេះជាជំនួបកិច្ចពិភាក្សាដ៏រីករាយនាឆ្នាំនេះ ចំពេលដែលប្រទេសទាំង២ កំពុងអបអរសាទរខួបទី៥៥ឆ្នាំ នៃចំណងការទូត និងកិច្ចសហប្រតិបត្តិការគ្រប់ជ្រុងជ្រោយ។ ម្យ៉ាងវិញទៀត ទំហំពាណិជ្ជកម្ម រវាងខេត្តដុងថាប់ ជាមួយខេត្តព្រៃវែង និងខេត្តនានា តាមផ្លូវទឹក តាមច្រកព្រំដែនអន្តរជាតិយិនបា-បន្ទាយចក្រី និងច្រកតំបន់ផ្សេងទៀត សម្រេចបានក្នុងទំហំទឹកប្រាក់ សរុបជិត ១ពាន់លានដុល្លារអាមេរិក ក្នុង ១ឆ្នាំៗ។
លោកបញ្ជាក់ថា៖«ទំនាក់ទំនងរវាងខេត្តដុងថាប់ បន្ទាយមានជ័យ ពោធិ៍សាត់ និងព្រៃវែង ដែលជាខេត្តសម្ព័ន្ធមេត្រីភាព បានសម្រេចដូចបំណងនូវផ្លែផ្កានៃទំនាក់ទំនង កិច្ចសហប្រតិបត្តិការលើច្រើនវិស័យ ដូចជា ទំនាក់ទំនងអន្តរជាតិ និងអ្នកជិតខាងល្អផដែរ។ វៀតណាមក៏បានផ្តល់អាហារូបករណ៍ដល់និស្សិតកម្ពុជារាប់រយនាក់លើជំនាញសុខាភិបាល និងជំនាញនានា ទាក់ទងនឹងវិស័យកសិកម្មជាដើម»។
លោកអ៊ុំ រាត្រី អភិបាលខេត្តបន្ទាយមានជ័យ ថ្លែងថា បន្ទាប់ពីអាក់ខានផ្លាស់ប្តូរដំណើរទស្សនកិច្ចដោយផ្ទាល់អស់រយៈពេល២ឆ្នាំ ពេលនេះភាគីទាំង២អាចអនុវត្តបានឡើងវិញហើយ ព្រោះប្រទេសទាំង២ បានដោះស្រាយវិបត្តិសកល នៃការឆ្លងរាលដាលជំងឺកូវីដ១៩ ឈានទៅបើកប្រទេសនិងបើកព្រំដែនពេញលេញឡើងវិញ ដើម្បីស្តារសេដ្ឋកិច្ច សង្គមកិច្ច។
លោកបញ្ជាក់ថា៖«ខេត្តទាំង៣ បានរឹតចំណងមិត្តភាពបានយ៉ាងប្រសើរ ដូចដែលមានចែងក្នុងស្មារតីខ្លឹមសារនៃអនុស្សរណ:យោគយល់គ្នាដែលបានចុះហត្ថលេខាកន្លងមក។ ដូចនេះ ខាងកម្ពុជាស្នើរៀបចំ[សេចក្តីព្រាង] កែសម្រួលខ្លឹមសារអនុស្សរណ:យោគយល់គ្នានេះ ហើយថ្នាក់ដឹកនាំ និងមន្ត្រី កម្មាភិបាលភាគីទាំង២នឹងរកពេលវេលាសមស្រប ដើម្បីប្រជុំពិភាក្សា និងចុះហត្ថលេខា ដើម្បីខេត្តចំណងមេត្រីភាពទាំងនេះ បន្តរយ:ពេល៥ឆ្នាំទៀត»។
លោកជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា បានឱ្យដឹងថា បច្ចុប្បន្ន ទាំងហេដ្ឋារចនាសម្ព័ន្ធផ្លូវថ្នល់ និងការសម្របសម្រួល ពីសំណាក់មន្ត្រីនៅតាមច្រកព្រំដែនកម្ពុជា និងវៀតណាម ជាពិសេសនៅតាមច្រកអន្តរជាតិ បានបង្កលក្ខណៈងាយស្រួលច្រើនដល់ពាណិជ្ជករដឹកជញ្ជូន ដោយមិនមានការរាំងស្ទះទេ។
លោកថ្លែងថា៖«បន្ទាប់ពីរាជរដ្ឋាភិបាល បានរៀបចំឱ្យមានច្រកអន្តរជាតិច្រើន បូករួមទាំងច្រកព្រំដែនតូចធំផ្សេងៗទៀត បានជំរុញឱ្យការដឹកជញ្ជូនមានការកើនឡើងជាលំដាប់ ជាពិសេសការដោះដូរទំនិញកសិកម្ម រវាងកម្ពុជា និងវៀតណាម។ កិច្ចសហការល្អ រវាងអាជ្ញាធរតាមព្រំដែនប្រទេស នឹងជំរុញខ្សែចង្វាក់ផ្គត់ផ្គង់ និងការដឹកជញ្ជូនតាមព្រំដែន ឱ្យកាន់តែមានលក្ខណៈងាយស្រួលបន្ថែម ដែលនឹងធ្វើឱ្យសេដ្ឋកិច្ចនៅតាមព្រំដែនកាន់តែរីកចម្រើន»៕
