កំពតៈ អង្គការជីវិតធម្មជាតិ (Nature Life Cambodia Organization) បានឱ្យដឹងថា ក្រោយពីបញ្ចប់ការច្រូតកាត់ស្រូវមិត្តក្រៀល ឆ្នាំ ២០២២ មានកសិករចំនួន ៤៩ គ្រួសារ បានលក់ស្រូវរបស់គាត់ប្រមាណជា ៧៥ តោន រីឯ ៥១គ្រួសារទៀត បានសម្រេចទុកស្រូវដែលផលិតបានទាំងអស់សម្រាប់បរិភោគ។
កាលពីថ្ងៃទី ២២ ខែមករា ឆ្នាំ ២០២៣ អង្គការជីវិតធម្មជាតិបានលើកឡើងថា ស្រូវមិត្ដក្រៀល គឺជាគម្រោងដែលផ្តួចផ្តើមឡើងក្នុងគោលបំណងផ្តល់អាហារមានសុវត្ថិភាពដល់សត្វក្រៀល និងបង្កើនជីវភាពសហគមន៍មូលដ្ឋាន។
អង្គការនេះបញ្ជាក់ថា៖«កាលពីខែធ្នូកន្លងមកនេះ ក្រុមការងារយើងបានធ្វើការយ៉ាងជិតស្និទ្ធជាមួយកសិករសហគមន៍ស្រូវមិត្តក្រៀលចំនួន១០០គ្រួសារ ដែលមានដីស្រែនៅជុំវិញតំបន់ការពារទេសភាពអន្លង់ព្រីង ក្នុងឃុំបឹងសាលាខាងត្បូង និងឃុំព្រែកក្រឹស នៃស្រុកកំពង់ត្រាច ខេត្តកំពត»។
ទីតាំងដីសើម នាតំបន់ការពារទេសភាពនេះ គឺជាទីតាំងដ៏សំខាន់ក្នុងការគាំទ្រដល់ការរស់នៅរបស់សត្វក្រៀលនារដូវមិនបន្តពូជចាប់ពីខែធ្នូ ដល់ខែឧសភា។ ស្រូវដែលបន្សល់ក្នុងស្រែរបស់ប្រជាកសិករ គឺជាចំណីរបស់សត្វក្រៀលដែលកំពុងរងគ្រោះជិតផុតពូជ។ នេះបើតាមការលើកឡើងបន្ថែមពី អង្គការជីវិតធម្មជាតិ។
ប្រភពដដែលបញ្ជាក់ទៀតថា កសិករដែលចូលរួមជាមួយគំនិតផ្តួចផ្តើមនេះ ត្រូវបានផ្តល់ពូជ និងជីសរីរាង្គ ដោយមិនគិតថ្លៃ និងត្រូវគោរពតាមលក្ខខណ្ឌចំនួន១២ ក្នុងនោះមានដូចជាដាំដុះពូជស្រូវប្រចាំតំបន់ដែលមានឈ្មោះថាសម្បកកាទឹម និងពងលលកដែលក្រៀលចូលចិត្ដស៊ី និងកាត់បន្ថយការប្រើប្រាស់ថ្នាំពុល និងជីគីមី យ៉ាងតិច៣០% ដើម្បីចូលរួមកាត់បន្ថយផលប៉ះពាល់ដល់សុខភាពមនុស្ស ប្រព័ន្ធអេកូឡូស៊ី និងជីវចម្រុះ ជាពិសេសសត្វក្រៀល។
អង្គការជីវិតធម្មជាតិ បញ្ជាក់ថា៖«កសិករ ដែលបានគោរពតាមលក្ខខណ្ឌទាំងនេះ អង្គការជីវិតធម្មជាតិ នឹងទទួលទិញស្រូវក្នុងតម្លៃ៥%ខ្ពស់ជាងទីផ្សារ។ ក្រោយពីបញ្ចប់ការច្រូតកាត់ឆ្នាំ២០២២នេះ មានកសិករចំនួន៤៩គ្រួសារបានលក់ស្រូវរបស់គាត់ប្រមាណជា៧៥តោន។ ដោយឡែក៥១គ្រួសារទៀត បានសម្រេចទុកស្រូវដែលផលិតបានទាំងអស់សម្រាប់បរិភោគ»។
បន្ថែមពីនេះទៀត កសិករដែលបន្សល់ស្រូវក្នុងស្រែចំនួន៥% សម្រាប់ជាចំណីបន្ថែមដល់សត្វក្រៀល គម្រោងផ្ដល់សំណងជូនជាថវិកាផងដែរ។ អង្គការជីវិតធម្មជាតិបានបន្ថែមថា អង្ករមិត្តក្រៀល គឺជាកសិផលដែលគិតគូរដល់ប្រព័ន្ធអេកូឡូស៊ី ផ្តល់ចំណីបន្ថែមដល់សត្វក្រៀល និងជាអង្ករដែលផ្តល់សុវត្ថិភាពសម្រាប់មនុស្ស។
សូមរំឭកដែរថា ក្រសួងបរិស្ថាន បានសហការជាមួយអង្គការជីវិតធម្មជាតិនៅកម្ពុជា និងអង្គការជីវិតសត្វស្លាបអន្តរជាតិ ដោយមានការគាំទ្រពីអង្គការ IUCN-Netherland បានផ្តួចផ្តើមធ្វើស្រូវមិត្តក្រៀល ក្នុងគោលបំណងដើម្បីលើកកម្ពស់ជីវភាពសហគមន៍មូលដ្ឋាន និងការអភិរក្សសត្វក្រៀលនៅកម្ពុជា។
សត្វក្រៀលដែលជាប្រភេទសត្វស្លាបមួយមានវត្តមាននៅតំបន់អាស៊ីអាគ្នេយ៍ ត្រូវបានចាត់ជាប្រភេទសត្វស្លាបងាយរងគ្រោះក្នុងបញ្ជីក្រហមរបស់អង្គការសហភាពអន្តរជាតិ ដើម្បីការអភិរក្សធម្មជាតិ( IUCN Red List)។
ទាក់ទងនឹងស្រូវមិត្តក្រៀល លោកនេត្រ ភក្ត្រា អ្នកនាំពាក្យក្រសួងបរិស្ថាន ធ្លាប់បានឱ្យដឹងថា ប្រភេទស្រូវ ដែលដាំគឺជាប្រភេទពូជស្រូវប្រចំាតំបន់ និងជាពូជស្រូវដែលសត្វក្រៀលចូលចិត្តស៊ី ហើយការធ្វើស្រូវមិត្តក្រៀលនេះ គឺគោរពលក្ខខណ្ឌមិនបរបាញ់ មិនដាក់អន្ទាក់ ឬប្រើថ្នាំពុលដើម្បីចាប់សត្វស្លាប មិនពង្រីកដីដំណាំរបស់ខ្លួនលើតំបន់អភិរក្ស និងជាស្រូវសរីរាង្គ មិនអនុញ្ញាតឱ្យប្រើប្រាស់ថ្នាំពុលកសិកម្ម និងជីគីមីឡើយ។
លោកថា៖«ការការពារ និងអភិរក្សសត្វក្រៀលទទួលបានជោគជ័យ លុះត្រាតែមានការគិតគូរពីជីវភាពរបស់ប្រជាសហគមន៍មូលដ្ឋាន និងមានការចូលរួមពីភាគីពាក់ព័ន្ធទាំងអស់»៕