ព្រះសីហនុៈ ថ្នាក់ដឹកនាំខេត្តព្រះសីហនុ បានធ្វើការអំពាវនាវ និងណែនាំទៅដល់សហគមន៍អេកូទេសចរណ៍ព្រៃកោងកាងព្រែកតាសុខ ស្ថិតនៅភូមិដើមថ្កូវ សង្កាត់កោះរ៉ុង ក្រុងកោះរ៉ុង ត្រូវដាក់តំបន់នេះជាតំបន់គ្មានថង់ប្លាស្ទិក គ្មានការបំពុលបរិស្ថាន ដើម្បីជួយបង្កើតការងារជូនប្រជាពលរដ្ឋក្នុងតំបន់កោះឱ្យមានការងារធ្វើកាន់តែច្រើន ធ្វើឱ្យជីវភាពរបស់ពួកគាត់កាន់តែល្អប្រសើរ។
លោក គួច ចំរើន អភិបាលខេត្តព្រះសីហនុ បានលើកឡើងដូចនេះ នៅថ្ងៃទី ២៣ ខែមករា ឆ្នាំ ២០២៣ ក្នុងពេលលោក ដឹកនាំមន្ត្រីជំនាញចុះពិនិត្យតំបន់ទេសចរណ៍ធម្មជាតិអូរបីជាន់ ស្ថិតនៅភូមិព្រែកស្វាយ និងចុះពិនិត្យសហគមន៍អេកូទេសចរណ៍ព្រៃកោងកាងព្រែកតាសុខ។
សហគមន៍អេកូទេសចរណ៍ព្រៃកោងកាងព្រែកតាសុខ លាតសន្ធឹងតាមបណ្តោយព្រែកមានផ្ទៃដីទំហំប្រមាណ ២០ ហិកតា កំពុងត្រូវបានធ្វើការអភិវឌ្ឍកែលម្អជាតំបន់ទេសចរណ៍បែបធម្មជាតិដ៏ស្រស់ត្រកាលនៅក្នុងតំបន់កោះរ៉ុង មិនមានការបំពុលបរិស្ថានដោយថង់ប្លាស្ទិក។ នេះបើយោងតាមរដ្ឋបាលខេត្តព្រះសីហនុ។
ក្នុងអំឡុងពេលនៃការចុះពិនិត្យនេះ លោក គួច ចំរើន ក៏បានណែនាំឱ្យសហគមន៍ដាក់តំបន់នេះជាតំបន់ គ្មានថង់ប្លាស្ទិក) គ្មានការបំពុលបរិស្ថាន ដើម្បីជួយបង្កើតការងារជូនប្រជាពលរដ្ឋក្នុងតំបន់កោះឱ្យមានការងារធ្វើកាន់តែច្រើន ធ្វើឱ្យជីវភាពរបស់ពួកគាត់កាន់តែល្អប្រសើរ។
លោកថា ៖ «ដោយសារព្រៃកោងកាងជាប្រភពទាក់ទាញភ្ញៀវទេសចរ បើយើងចេះច្នៃប្រឌិតវាឱ្យស្របទៅតាមតម្រូវការនៃការអភិវឌ្ឍរបស់ប្រទេសជាតិ ទន្ទឹមនោះយើងក៏ត្រូវរៀបចំវត្ថុអនុស្សាវរីយ៍ធ្វើដោយដៃ ដែលជាសមិទ្ធផលតំបន់កោះសម្រាប់ភ្ញៀវទេសចរបន្ថែមទៀត»។
ជាមួយគ្នានោះ អភិបាលខេត្តព្រះសីហនុ បានធ្វើការណែនាំឱ្យអាជ្ញាធរមូលដ្ឋាន ក៏ដូចអាជ្ញាធរសង្កាត់ ក្រុង ពិសេសប្រជាពលរដ្ឋ ត្រូវយកចិត្តទុកដាក់ចូលរួមថែរក្សានិងអភិរក្សព្រៃឈើឱ្យបានគង់វង្ស ព្រោះព្រៃឈើទាំងអស់នេះ វានាំមកនូវប្រភពចំណូលសម្រាប់ប្រជាពលរដ្ឋក្នុងតំបន់កោះ និងជាការទាក់ទាញភ្ញៀវទេសចរជាតិ ពិសេសភ្ញៀវទេសចរបរទេស មកពីតំបន់អឺរ៉ុបពួកគេចូលចិត្តទេសចរណ៍បែបធម្មជាតិ។
បច្ចុប្បន្នភ្ញៀវទេសចរជាតិ អន្តរជាតិដែលមកលេងកម្សាន្តព្រៃកោងកាងព្រែកតាសុខនេះ មានមកពីបណ្តារាជធានី-ខេត្ត ពិសេសនៅពេលមានពិធីបុណ្យជាតិ អន្តរជាតិម្តងៗ ដោយពួកគេមកលេងកម្សាន្តតំបន់កោះ មិនអាចភ្លេចសហគមន៍អេកូទេសចរណ៍ព្រៃកោងកាងនេះទេ ដែលកំពុងមានការអភិវឌ្ឍជាទីទាក់ទាញពីសំណាក់ភ្ញៀវទេសចរប្រកបដោយផាសុកភាព ព្រមទាំងមានបរិស្ថាន អនាម័យ ទទួលយកខ្យល់បរិសុទ្ធសម្រាប់ក្រុមគ្រួសារ។
ទន្ទឹមនឹងនេះដែរ លោក គួច ចំរើន ក៏បានបង្ហាញពីការគាំទ្រនូវការបង្កើតឱ្យមានសហគមន៍ទេសចរណ៍ព្រៃកោងកាង និងណែនាំឱ្យប្រធានសហគមន៍ត្រូវខិតខំយកចិត្តទុកដាក់កែច្នៃតំបន់នេះ ឱ្យក្លាយជាតំបន់អេកូទេសចរណ៍ដ៏ទាក់ទាញនាពេលខាងមុខ។
លោកបានលើកឡើងថា៖ «ទីតាំងនេះសម្បូរទៅដោយព្រៃកោងកាង រុក្ខជាតិដុះចម្រុះតាមបែបធម្មជាតិ ទន្ទឹមនឹងការការពារថែរក្សា អភិរក្ស យើងក៏ត្រូវរួមគ្នាធ្វើការដាំដុះកូនកោងកាងបន្ថែមទៀតឱ្យកាន់តែមានភាពស្រស់ស្អាត និងបៃតង»។
សូមបញ្ជាក់ថា សហគមន៍អេកូទេសចរណ៍ព្រែកតាសុខ ដែលស្ថិតនៅក្នុងភូមិដើមថ្កូវ និងភូមិសុខសាន្ត សង្កាត់កោះរ៉ុង ក្រុងកោះរ៉ុង មានផ្ទៃដី ២១ ហិកតា បានបើកដំណើរការកាលពីចុងឆ្នាំ ២០២១ ក្នុងគោលបំណងផ្សព្វផ្សាយ ដល់ប្រជាពលរដ្ឋ ភ្ញៀវទេសចរឱ្យចេះស្រឡាញ់ ការពារបរិស្ថានថែរក្សា និងអភិរក្សធនធានធម្មជាតិនៅក្នុងសហគមន៍៕