ភ្នំពេញ/ព្រះសីហនុៈ រយៈពេល ២២ ថ្ងៃ ក្នុងខែមករា ឆ្នាំនេះ ផ្លូវល្បឿនលឿនភ្នំពេញ-ក្រុងព្រះសីហនុ មានយានយន្តចន្លោះ ពី ២៦-២៧ ម៉ឺនគ្រឿងបានបើកឆ្លងកាត់ ដែលក្រោយពីរយៈពេល ២ ខែ នៃការបើកឱ្យប្រើប្រាស់ ដោយគិតថ្លៃលើផ្លូវនេះកាលពីឆ្នាំមុននោះ ក្រុមហ៊ុនរកចំណូលបានប្រមាណ ៥ លានដុល្លារអាមេរិក។
ផ្លូវល្បឿនលឿនភ្នំពេញ-ក្រុងព្រះសីហនុ បានបើកដំណើរការដោយគិតថ្លៃសេវាធ្វើដំណើរចាប់ពីថ្ងៃទី ១ ខែវិច្ឆិកា ឆ្នាំ ២០២២ ដោយការបញ្ចុះតម្លៃ ២០ ភាគរយ រយៈពេល ១ ឆ្នាំ បន្ទាប់ពីផ្លូវនេះ ត្រូវបានក្រសួងសាធារណការ បើក ឱ្យសាកល្បងដោយឥតគិតថ្លៃរយៈពេល ១ ខែកាលពីខែតុលា។
លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន ប្រាប់ ភ្នំពេញ ប៉ុស្តិ៍ នៅថ្ងៃទី ២៣ មករាថា បន្ទាប់ពីបើកដំណើរការដោយគិតថ្លៃកាលពីខែវិច្ឆិកាមក រយៈពេល ២ ខែ ក្នុងឆ្នាំ ២០២២ ក្រុមហ៊ុនរកចំណូលបានប្រមាណជាង ៥ លានដុល្លារ (បូកបញ្ចូលទាំងលុយកាត់ពន្ធ)។ ចំពោះចំណូលក្នុងខែមករានេះ គឺនៅមិនទាន់បូកសរុបនៅឡើយទេ ខណៈរយៈពេល ២២ ថ្ងៃ ក្នុងខែមករា នេះ មានយានយន្តប្រមាណជិត ៣០ ម៉ឺនគ្រឿង បានប្រើប្រាស់ផ្លូវនេះ ដោយក្នុង ១ ថ្ងៃៗ នៃថ្ងៃធម្មតា មានយានយន្តប្រមាណ ១ ម៉ឺនគ្រឿង។
លោកបញ្ជាក់ថា៖ «នៅក្នុងរយៈពេល ២២ ថ្ងៃ គឺមានយានយន្តចរាចរក្នុងចន្លោះ ២៦ ទៅ ២៧ ម៉ឺនគ្រឿង ហើយចំនួនគ្រោះថ្នាក់ចរាចរណ៍មានប្រមាណជិត ២០ ករណីទេ។ បើយើងប្រៀបធៀបជាមួយចរាចរណ៍នៅតាមដងផ្លូវផ្សេងៗ ជាពិសេសនៅលើផ្លូវជាតិលេខ ៤ គឺមានភាពខុសគ្នាឆ្ងាយណាស់ ហើយក៏មិនមានគ្រោះថ្នាក់ណាដែលធ្ងន់ធ្ងរ រហូតទៅដល់បាត់បង់ជីវិតដែរ ព្រោះការធ្វើចរាចរណ៍ គឺក្នុងទិសដៅស្រប ដោយមានរបាំងខណ្ឌចែកទ្រូងផ្លូវ និងរបាំងការពារសុវត្ថិភាពត្រឹមត្រូវ »។
ចំពោះរយៈពេលនៃការប្រើប្រាស់ផ្លូវនេះក្នុងឱកាសបុណ្យចូលឆ្នាំថ្មីប្រពៃណីចិន លោក ហ៊ាង សុទ្ធាយុត្តិ បានអះអាងថា មានកំណើនកើនឡើងដល់ទៅជិត ៣ ដងនៃថ្ងៃធម្មតា ដោយក្នុង ១ ថ្ងៃ មានយានយន្តប្រមាណជាង ២ ម៉ឺនគ្រឿង ដែលតាមការសន្និដ្ឋាន គឺចំនួននេះអាចនឹងមានការកើនឡើងរហូតដល់ ៣ ម៉ឺនគ្រឿងក្នុង ១ ថ្ងៃ។
លោកហ៊ាង សុទ្ធាយុត្តិ បានបញ្ជាក់ថា៖ «ជារួមចរាចរណ៍មានការកើនឡើង ក្នុងរយៈពេល ២ ថ្ងៃនេះ [ថ្ងៃទី ២១ និងថ្ងៃទី ២២] ទិសដៅពីភ្នំពេញទៅព្រះសីហនុ នៅមានសភាពច្រើននៅឡើយ។ យើងឃើញថា តួលេខកាលពីថ្ងៃទី ២២ មានប្រមាណជា ២៤ ០០០ គ្រឿង ខណៈចរាចរណ៍ថ្ងៃធ្វើការធម្មតាមានប្រមាណ ១ ម៉ឺនគ្រឿងប៉ុណ្ណោះ»។
លោកបន្តថា៖ «កំណើននេះ គឺមានរហូតដល់ទៅ ២,៥ ដង។ ជាការរំពឹងនៅពេលចរាចរណ៍ត្រឡប់ចូលមករាជធានីភ្នំពេញវិញ គឺអាចនឹងមានអត្រាចន្លោះពី ២ ម៉ឺន ៥ ពាន់ទៅ ៣ ម៉ឺនគ្រឿង សម្រាប់ថ្ងៃទី ២៣ និងថ្ងៃទី២៤ ព្រោះតែអត្រានៃការបញ្ជូនប្រាក់មុនក្នុងប្រព័ន្ធគឺមានអត្រាខ្ពស់»។
កាលពីថ្ងៃទី ២២ ខែមករា ឆ្នាំ ២០២៣ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានប្រកាសបដិសេធ និងព្រមានចំពោះការផ្សព្វផ្សាយព័ត៌មានពីការកកស្ទះ ដែលក្រុមហ៊ុនបានអះអាងថា បើទោះជាមានកំណើនយានយន្តមានចំនួនច្រើនជាងទ្វេដង ប៉ុន្តែការកកស្ទះ មិនមែនជាបញ្ហារំខានដល់ការធ្វើដំណើរនៅលើដងផ្លូវនេះទេ។
ក្រុមហ៊ុនបានបញ្ជាក់ថា៖ «ដោយសារជាថ្ងៃបុណ្យចូលឆ្នាំថ្មីប្រពៃណីចិននេះ ឆ្លងផុតពីរឿងផ្សព្វផ្សាយព័ត៌មានមិនពិត ពីថ្ងៃបុណ្យសមុទ្រ ក្រុមហ៊ុនយើងខ្ញុំនៅតែប្រទះឃើញមានជនខិលខូច មួយចំនួនបានយកវីដេអូកកស្ទះចរាចរណ៍ ដែលបានកើតឡើងកាលពីអតីតមកផ្សព្វផ្សាយ បណ្តាលឱ្យសាធារណជនមានការយល់ច្រឡំពីទិដ្ឋភាពចរាចរណ៍ជាក់ស្តែងនៅលើផ្លូវល្បឿនលឿន ដែលជាហេតុបង្កជាផលប៉ះពាល់យ៉ាងធំដល់ក្រុមហ៊ុនយើងខ្ញុំ»។
ជាងនេះទៀត ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ ក៏បានអះអាងដែរថា ក្រុមហ៊ុនបានចាត់វិធានការមួយចំនួន ដើម្បីកាត់បន្ថយការកកស្ទះបណ្តោះអាសន្ននៅពេលចរាចរណ៍មមាញឹក ដោយបន្ថែមភ្លើង LED ទៅលើគន្លង ANPR បន្ថែម ដើម្បីឱ្យងាយមើលរឹតតែច្បាស់ និងបន្ថែមគំនូសសញ្ញាបន្ថែមមុនទៅដល់ផ្លូវគន្លង ETC និងគន្លង ANPR ដើម្បីងាយស្រួលដល់អ្នកដំណើរដែលបម្រុងនឹងប្រើប្រាស់គន្លងទាំង ២។ ក្រុមហ៊ុន ក៏នឹងបំពាក់ស្លាកសញ្ញាបែងចែកផ្លូវសម្រាប់គន្លងទាំង ៣ គឺគន្លង ETC គន្លង ANPR និងគន្លង MTC។
ចំពោះបញ្ហានេះ លោក ហ៊ាង សុទ្ធាយុត្តិ បានអះអាងថា កត្តាដែលបណ្តាលឱ្យមានការកកស្ទះ ក៏ព្រោះតែអ្នកបើកបរ មួយចំនួនតូច ដែលមិនគោរពស្លាកចរាចរណ៍ បានបង្កជាការរំខាន និងកកស្ទះ បើទោះជាមានអ្នកបើកបរភាគច្រើនមានការយល់ដឹងច្រើនពីការប្រើប្រាស់គន្លង និងចូលរួមគោរពការប្រើប្រាស់គន្លង ETC ANPR និង MTC។
ទោះយ៉ាងណាលោកអំពាវនាវដល់អ្នកប្រើប្រាស់ផ្លូវល្បឿនលឿន គួរស្វែងយល់ និងគោរពការប្រើប្រាស់គន្លងអាទិភាពច្រកចេញចូលផ្លូវល្បឿនលឿន និងលើកទឹកចិត្តដល់អ្នកបើកបរឱ្យប្រើប្រាស់គន្លង ETC និង ANPR ដែលតម្រូវបញ្ចូលសមតុល្យទឹកប្រាក់ជាមុន តាមស្លាកលេខ តាមកម្មវិធី Mobile Banking របស់គ្រឹះស្ថានហិរញ្ញវត្ថុធនាគារ។
បើតាមរបាយការណ៍របស់ក្រសួងសាធារណការ និងដឹកជញ្ជូន គិតចាប់ពីថ្ងៃទី ១ តុលា ២០២២ ដល់ថ្ងៃទី២២ មករា ២០២៣ យានយន្តចរាចរសរុបមាន ១ ៣៧៨ ០៥៨ គ្រឿង ដោយក្នុងនោះខែទី ១ ខែតុលា ២០២២ នៃដំណើរការសាកល្បង ដោយមិនគិតថ្លៃ មានចំនួន ៤៣៧ ៣៨១ គ្រឿង ហើយរយៈពេលគិតថ្លៃសេវាពីថ្ងៃទី ១ ខែវិច្ឆិកា ២០២២ ដល់ថ្ងៃទី ២២ មករា ឆ្នាំ ២០២៣ មានចំនួន ៩៤០ ៦៧៧ គ្រឿង៕
វីដេអូ៖