.jpg)
លោក សុខ លូ នៅក្នុងសន្និសីទកាសែតនៅថ្ងៃទី២៤ មករា ។ ហុង មិនា
បាត់ដំបងៈ អភិបាលខេត្តបាត់ដំបងលោក សុខ លូ បានថ្លែងថា រដ្ឋបាលខេត្តមិនបានអនុវត្តការផាកពិន័យទៅដល់អ្នកចោលសំរាមនៅតាមទីសាធារណៈនាពេលកន្លងមក ដោយសារខេត្តចង់យកមធ្យោបាយអប់រំជាគោលជាជាងការផាកពិន័យ ប៉ុន្តែនៅតែមានពលរដ្ឋបោះសំរាមចោលពាសវាលពាសកាល។
ការលើកឡើងដូចនេះបន្ទាប់ពីមានការរិះគន់ទៅលើរដ្ឋបាលក្រុងបាត់ដំបងដែលបានផាកពិន័យទៅលើអ្នកបោះចោលសំរាមពាសវាលពាសកាល។
លោក សុខ លូ បានថ្លែងដូចនេះ នៅក្នុងសន្និសីទសារព័ត៌មានស្តីពី «ភាពជោគជ័យ៥ឆ្នាំ របស់រដ្ឋបាលខេត្តបាត់ដំបង»ដែលបានធ្វើឡើងនៅថ្ងៃទី២៤ ខែមករា ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាលកម្ពុជា។
លោកបានបញ្ជាក់ថា៖«រដ្ឋបាលខេត្តមានប្រកាសអន្តរក្រសួងស្តីពីការផាកពិន័យទៅដល់អ្នកចោលសំរាមនៅតាមទីសាធារណៈនេះយូរហើយ ប៉ុន្តែរដ្ឋបាលខេត្តមិនបានអនុវត្តការផាកពិន័យទេ ដោយយើងយកមធ្យោបាយអប់រំប្រជាពលរដ្ឋជាគោលជាជាងការផាកពិន័យជាបន្តបន្ទាប់ ប៉ុន្តែនៅតែមានប្រជាពលរដ្ឋបោះសំរាមចោលពាសវាលពាសកាល»។
អភិបាលខេត្តរូបនេះបានបន្ថែមថា បញ្ហាទាក់ទងនឹងរឿងសំរាមនេះគឺជារឿងធំមិនមែនជារឿងតូចតាចនោះទេ ដោយគ្រាន់តែក្រុងបាត់ដំបង១ថ្ងៃមានសំរាមប្រហែលជា៣០០តោនហើយមានក្រុមហ៊ុនចំនួន២ ដែលជាអ្នកយកសំរាមពីផ្ទះរបស់ប្រជាពលរដ្ឋទៅទីលានចាក់សំរាម។
លោកបន្តថា ដើម្បីអនុវត្តនូវការយកសំរាមឱ្យអស់បានគឺវាត្រូវការការចូលរួមពីប្រជាពលរដ្ឋទាំងអស់ដោយការបង់លុយថ្លៃដឹកសំរាមទៅតាមតម្លៃខុសៗនៃផ្ទះតាមប្រភេទអាជីវកម្មគឺមានពី១ម៉ឺនឬ១ម៉ឺន៥ពាន់រៀល។
លោក សុខ លូ បានបញ្ជាក់ថា ៖ «ខ្ញុំគិតថា តម្លៃនេះមិនជាច្រើននោះទេ ប៉ុន្តែចង់សួរថាតើមានបងប្អូនប៉ុន្មានភាគរយក្នុងក្រុងបាត់ដំបងដែលបានបង់លុយថ្លៃដឹកនិងប្រមូលសំរាមនេះ?ខ្ញុំសុំជម្រាបថា អ្នកបង់ថ្លៃប្រមូលសំរាមនេះគឺមិនដល់៥០ភាគរយនោះទេ ដែលបង់លុយថ្លៃសំរាម ដែលនេះហើយគឺជាបញ្ហាចំណោទសម្រាប់យើង»។
ថ្នាក់ដឹកនាំខេត្តបាត់ដំបងរូបនេះបានឱ្យដឹងដែរថា បើលោកមិនគិតគូរឬមិនជំរុញនោះទេបញ្ហាទាំងនេះនឹងមិនអាចដោះស្រាយបានទេ។
លោកថា៖«យើងបានគិតគូរជាបន្តបន្ទាប់ ប៉ុន្តែរឿងអ្វីក៏ដោយយើងមិនអាចធ្វើបាន១ឬ២ថ្ងៃអស់នោះទេ ហើយរឿងសំរាមនេះគឺជារឿងស្មុគស្មាញ ដែលវាត្រូវការនូវការភ្ញាក់រឭកពីបងប្អូនទាំងអស់គ្នា ដោយទី១ ត្រូវបង់លុយ
ទី២ ត្រូវចោលសំរាមតាមកន្លែងដែលបានកំណត់តាមកាលវិភាគដែលបានជូនដំណឹង»។
ក្រសួងបរិស្ថានតែងតែខិតខំជួយដល់ខេត្តបាត់ដំបងនេះផងដែរ ដោយបានផ្តល់ជារថយន្តដឹកសំរាមដើម្បីធ្វើយ៉ាងណាជួយឱ្យក្រុមហ៊ុនមានលទ្ធភាពប្រមូលសំរាមនិងដឹកសំរាមឱ្យកាន់តែប្រសើរឡើងហើយរដ្ឋបាលខេត្តបាត់ដំបងក៏កំពុងសិក្សាផងដែរ ទៅលើការបង្កើតAppសម្រាប់ប្រជាពលរដ្ឋដឹងពីការប្រមូលសំរាមនេះ។
លោក សុខ លូ បានបញ្ជាក់ថា៖«យើងនឹងមានAppដែលបងប្អូនយើងអាចដឹងពីម៉ោងពេលវេលារបស់ឡានសំរាម យើងអាចដឹងពីតំបន់ដែលបងប្អូនយើងអត់បានបង់ថ្លៃប្រមូលសំរាម ហើយយើងនឹងជំរុញឱ្យបងប្អូនបង់ថ្លៃសំរាម ដែលនេះជាកាតព្វកិច្ចទាំងអស់គ្នា»។
សូមបញ្ជាក់ផងដែរថា ខេត្តបាត់ដំបង មានទីលានចាក់សំរាមដែលទើបកសាងរួចលើទំហំដីជាង២០ហិកតា ដែលទីតាំងនេះជាទីលានចាក់សំរាមស្តង់ដា ហើយរដ្ឋបាលខេត្តនឹងធ្វើការញែកសំរាមនៅទីលានចាស់ដឹកទៅទីលានថ្មីជាបន្តបន្ទាប់ផងដែរ។
បើតាមលោក សុខ លូ រដ្ឋបាលខេត្តនឹងសិក្សារួមគ្នាជាមួយនឹងក្រុមហ៊ុនមកពីកូរ៉េដោយចង់សិក្សាទីលានចាក់សំរាមឱ្យចេញជាហ្គាសបង្កើតជាភ្លើងអគ្គិសនី ហើយនឹងអាចធ្វើជាកំប៉ុសសម្រាប់ប្រើប្រាស់ផងដែរ។
ជាមួយគ្នានេះ លោក សុខ លូ ក៏បានសំណូមពរឱ្យប្រជាពលរដ្ឋធ្វើយ៉ាងណាត្រូវតែម្ចាស់ការទទួលខុសត្រូវ ហើយត្រូវចាត់ទុកថា រឿងនេះជាបញ្ហាទាំងអស់គ្នា គ្មាននរណាម្នាក់អាចធ្វើឱ្យអស់សំរាមនោះទេ បើគ្មានការចូលរួម គ្មានការទទួលខុសត្រូវរបស់បុគ្គលម្នាក់ៗ។
ទាក់ទងនឹងសំរាមនេះដែរលោកនាយករដ្ឋមន្ត្រី ហ៊ុន សែន ធ្លាប់បានអំពាវនាវឱ្យប្រជាពលរដ្ឋចូលរួមរក្សាអនាម័យបរិស្ថានដើម្បីទីក្រុងស្អាត ដោយត្រូវប្រកាន់ខ្ជាប់នូវអនាម័យចេះទុកដាក់សំរាមឱ្យបានត្រឹមត្រូវមិនត្រូវបោះចោលសំរាមពាសវាលពាសកាលនិងត្រូវខិតខំទាំងអស់គ្នាដើម្បីកាត់បន្ថយសំរាមហូរតាមទឹកចូលទន្លេ បឹង ប្រឡាយ និងលូជាដើម។
លោកមានប្រសាសន៍ថា៖«ឥឡូវនេះមិនដូចពេលមុនទេសំរាមក្នុង១ថ្ងៃមានប្រមាណជា៣ពាន់តោនដូចនេះអ្វីដែលជាបញ្ហាកង្វល់របស់យើងគឺបញ្ហាប្រជាពលរដ្ឋយើងមិនព្រមរៀបចំសម្អាតអនាម័យតាមរយៈការប្រមូលសំរាម»។
យោងតាមរបាយការណ៍របស់ក្រសួងបរិស្ថានបានឱ្យដឹងថា នៅឆ្នាំ២០២២ សំរាមដែលបានបង្កើតឡើងនៅក្នុងប្រទេសកម្ពុជាបានកើនឡើងជាង៤លានតោននៅក្នុង១ឆ្នាំៗហើយក្នុង១ថ្ងៃសំរាមមានជាង១ម៉ឺនតោនហើយកម្រិតនៃការកើនឡើងសំណល់រឹងសំរាមនៅកម្ពុជាគឺមានចន្លោះពី១០ ទៅ១៥ភាគរយនៅក្នុង១ឆ្នាំ។
ក្រសួងបានបន្តថា ក្នុងចំណោមសំរាម១០០ភាគរយមានតែសំរាម៦៤ភាគរយប៉ុណ្ណោះដែលត្រូវបានយកទៅចាក់នៅលើលានក្រៅពីនោះសំរាម៣៦ភាគរយទៀតគឺរាយប៉ាយតាមទៅតាំងផ្សេងឬនៅប្រភពទឹកឬនៅតាមទី
សាធារណៈ៕
