.jpg)
មន្ដ្រីទូតថ្មីរបស់កម្ពុជាពេលចូលជួប លោក ហេង សំរិន កាលពីថ្ងៃទី២៥ មករា ។ រូបថត រដ្ឋសភា
ភ្នំពេញៈ ប្រធានរដ្ឋសភាលោក ហេង សំរិន បានផ្តល់អនុសាសន៍ដល់ឯកអគ្គរាជទូតកម្ពុជាចំនួន ១០ រូប ដែលទើបតែងតាំងប្រចាំបណ្តាប្រទេសនានាត្រូវយកចិត្តទុកដាក់ និងដោះស្រាយបញ្ហានានារបស់ពលរដ្ឋខ្មែរប្រចាំប្រទេសនោះឱ្យមានប្រសិទ្ធភាព និងត្រូវបង្កើនកិច្ចសហប្រតិបត្តិការលើគ្រប់វិស័យជាមួយប្រទេសទាំងនោះ។
ការណែនាំនេះត្រូវបានលើកឡើងនាឱកាសលោក ហេង សំរិន បានអនុញ្ញាតឱ្យឯកអគ្គរាជទូតវិសាមញ្ញ និងពេញសមត្ថភាពរបស់កម្ពុជាដែលទើបតែងតាំងថ្មីចំនួន ១០ រូប ប្រចាំនៅបណ្តាប្រទេសជាមិត្តនានាចូលជួបនៅថ្ងៃទី ២៥ ខែមករា ឆ្នាំ ២០២៣ ដើម្បីសម្តែងការគួរសមនិងទទួលអនុសាសន៍នៅមុនពេលចេញទៅបំពេញបេសកកម្មការទូតនៅក្រៅប្រទេស ។
ប្រភពពីរដ្ឋសភាបានឱ្យដឹងថា នាឱកាសនោះលោក ហេង សំរិន បានគូសបញ្ជាក់ថា ឯកអគ្គរាជទូតកម្ពុជាដែលទើបតែងតាំងនេះមានការងារសំខាន់ៗជាច្រើនដែលត្រូវបំពេញ លើការងារនយោបាយការបរទេស ក្នុងស្ថានភាពដែលពិភពលោកមានការប្រែប្រួលក្នុងបរិបទថ្មីនៃសណ្ដាប់ធ្នាប់ពិភពលោក។
លោកបន្តថា ក្នុងកាលៈទេសៈបច្ចុប្បន្ន ការស្តារសេដ្ឋកិច្ចសង្គមឱ្យងើបឡើងវិញបានឆាប់រហ័សជាកត្តាមួយដ៏សំខាន់និងចាំបាច់ដើម្បីរួមចំណែកលើកស្ទួយសេដ្ឋកិច្ចជាតិ ខណៈលោកបានផ្តល់អនុសាសន៍សំខាន់ៗផងដែរ។
លោកថា៖«ឯកអគ្គរាជទូតកម្ពុជាត្រូវតម្កល់ប្រយោជន៍ជាតិជាធំទោះក្នុងកាលៈទេសៈណាក៏ដោយត្រូវរក្សា ការពារ និងលើកតម្លៃជាតិជានិច្ចជាដើម។ត្រូវយកចិត្តទុកដាក់ជួយសម្របសម្រួលនិងដោះស្រាយបញ្ហានានារបស់ពលរដ្ឋយើងឱ្យមានប្រសិទ្ធភាពនិងទាន់ពេលវេលាតាមរយៈការបង្កើតទំនាក់ទំនងឱ្យបានខ្ជាប់ខ្ជួនជាមួយបងប្អូនពលរដ្ឋខ្មែរ ជាដើម។
លោកបានបន្ថែមថា ចាប់ពីពេលនេះតទៅ ឯកអគ្គរាជទូតគឺជាឥស្សរជនជាន់ខ្ពស់ តំណាងឱ្យព្រះរាជាណាចក្រកម្ពុជានៅបរទេស មានតួនាទីដ៏សំខាន់ក្នុងការលើកកម្ពស់ទំនាក់ទំនង មិត្តភាព និងកិច្ចសហប្រតិបត្តិការលើគ្រប់វិស័យជាមួយប្រទេសទាំងនោះ ពិសេសការលើកតម្កើងកិត្យានុភាពជាតិ ឯករាជ្យ និងការការពារអធិបតេយ្យជាតិរបស់កម្ពុជាឱ្យខាងតែបាន។
លោកថ្លែងថា៖«ចំណុច១ទៀតគឺជួយពន្យល់ដល់បណ្តាស្ថាប័នជាតិនិងអន្តរជាតិនៅទីនោះឱ្យយល់អំពីការអនុវត្តលទ្ធិប្រជាធិបតេយ្យនិងការគោរពសិទ្ធិមនុស្សនៅកម្ពុជាឱ្យបានច្បាស់លាស់ដើម្បីទប់ទល់នូវព័ត៌មានអគតិនានាដែលតែងតែនិយាយលាបពណ៌ឱ្យឃើញកម្ពុជាជាប្រទេស១មិនល្អ ដូច្នេះតួនាទីតំណាងយើងដើម្បីបង្ហាញឱ្យគេស្គាល់កម្ពុជាឱ្យច្បាស់ ព្រោះធាតុពិតនៃកម្ពុជាខុសពីកម្ពុជានៅលើបណ្តាញសារព័ត៌មានរបស់បណ្តាអគតិ»។
ជាមួយគ្នានេះដែរ លោក កុយ គួង ដែលទើបទទួលបានការតែងតាំងជាឯកអគ្គរាជទូតប្រចាំនៅប្រទេសឥណ្ឌាបានថ្លែងក្នុងនាមរូបលោកផ្ទាល់និងតំណាងឱ្យឯកអគ្គរាជទូតផ្សេងទៀតដោយបញ្ជាក់ថា៖«យើងប្តេជ្ញាចិត្តធ្វើយ៉ាងណាគឺលើកតម្កើងមុខមាត់កម្ពុជារក្សាឧត្តមភាពរបស់កម្ពុជានៅលើឆាកអន្តរជាតិនិងធ្វើយ៉ាងណាឱ្យការទូតរបស់យើងកាន់តែរីកចម្រើនទៀត ទាំងវិស័យវិនិយោគ ទេសចរណ៍យើងខិតខំផ្សព្វផ្សាយកម្ពុជាឱ្យកាន់តែខ្លាំងដើម្បីជាកំណើនសេដ្ឋកិច្ចមួយ»។
ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាលោក គិន ភា បានថ្លែងថា ជាការពិត តួនាទីឯកអគ្គរាជទូតកម្ពុជាប្រចាំក្រៅប្រទេសគឺមានសារៈសំខាន់ណាស់ជាពិសេសការងារទំនាក់ទំនងគឺឯកអគ្គរាជទូតជាតំណាងពេញសមត្ថភាពរបស់កម្ពុជា ជាអ្នកការពារនិងស្វែងរកនូវផលប្រយោជន៍ទាំងវិស័យនយោបាយ សេដ្ឋកិច្ចកិច្ច សង្គម ផ្សព្វផ្សាយវប្បធម៌និងទាក់ទាញការវិនិយោគ។
លោកថា៖«មួយទៀតនោះគឺការងារកុងស៊ុលដែលជួយអន្តរាគមន៍ការពារប្រជាពលរដ្ឋខ្មែរដែលរស់នៅប្រទេសដែលកម្ពុជាដាក់ទូតនៅទីនោះហើយកន្លងមកយើងឃើញថា ឯកអគ្គរាជទូតយើងជាច្រើនបានខិតខំប្រឹងប្រែងបំពេញភារកិច្ច តួនាទីនិងការទទួលខុសត្រូវរបស់ខ្លួនបានល្អ ដើម្បីការពារផលប្រយោជន៍ប្រទេសយើង»។
លោកបន្ថែមថា អ្វីដែលត្រូវចាំឱ្យច្បាស់នោះគឺអ្នកការទូតបច្ចុប្បន្នមិនមែនអ្នកការទូតប្រពៃណីដែលគ្រាន់តែជាតំណាងកម្ពុជានៅឯបរទេសទេគឺជាអ្នកការទូតដែលស្វែងរកនូវផលប្រយោជន៍សម្រាប់ជាតិ ជំរុញការវិនិយោគផ្ទាល់ពីបរទេសមកកម្ពុជា ផ្សព្វផ្សាយសក្តានុពលនៃការវិនិយោគនិងទេសចរណ៍ជាដើម។
សូមជម្រាបថា ឯកអគ្គរាជទូតថ្មីទាំង១០រូបដែលនឹងចេញទៅបំពេញបេសកម្មនៅក្រៅប្រទេសរួមមាន លោក កុយ គួង ឯកអគ្គរាជទូតប្រចាំនៅប្រទេសឥណ្ឌា លោក ស្មាន ម៉ាណាន ឯកអគ្គរាជទូតប្រចាំប្រទេសកូវ៉ែត លោក ហ៊ុន សារឿន ឯកអគ្គរាជទូតប្រចាំនៅប្រទេសថៃឡង់ដ៍ លោក ជឺនបូរាណ ច័ន្ទបុរី ឯកអគ្គរាជទូតប្រចាំនៅប្រទេសអូស្ត្រាលី លោក ជា ធីរៈ ឯកអគ្គរាជទូតប្រចាំប្រទេសគុយបា លោក ពេជ្រឃុន បញ្ញា ឯកអគ្គរាជទូតប្រចាំប្រទេសរុស្ស៊ី លោក អ៊ិន តារា ឯកអគ្គរាជទូតប្រចាំប្រទេសស្វ៊ីស លោក ជុំ អង្គវិចិត្រ ឯកអគ្គរាជទូតប្រចាំនៅប្រទេសមីយ៉ាន់ម៉ា លោក លឹម ហុកសេង ឯកអគ្គរាជទូតប្រចាំនៅប្រទេសប្រ៊ុយណេ និងលោក អ៊ុក ចាន់ដារ៉ា ឯកអគ្គរាជទូត ប្រចាំនៅប្រទេសម៉ាឡេស៊ី៕
