The Phnom Penh Post Search

Search form

Logo of Phnom Penh Post newspaper Phnom Penh Post - អ្នកសារព័ត៌មាន​ម្នាក់​ នឹងត្រូវ​ហៅ​សួរ​រឿង​ប្រកែក​គ្នា​ក្នុងករណី​គ្រោះថ្នាក់​ចរាចរណ៍​

អ្នកសារព័ត៌មាន​ម្នាក់​ នឹងត្រូវ​ហៅ​សួរ​រឿង​ប្រកែក​គ្នា​ក្នុងករណី​គ្រោះថ្នាក់​ចរាចរណ៍​

Content image - Phnom Penh Post
លោក សុវណ្ណ រិទ្ធី អ្នកសារព័ត៌មានទូរទស្សន៍អនឡាញ​​​។ រូបថត ហ្វេសប៊ុក

អ្នកសារព័ត៌មាន​ម្នាក់​ នឹងត្រូវ​ហៅ​សួរ​រឿង​ប្រកែក​គ្នា​ក្នុងករណី​គ្រោះថ្នាក់​ចរាចរណ៍​

ភ្នំពេញ​: ក្រសួង​ព័ត៌មាន នឹងធ្វើ​ការកោះហៅ អ្នកសារព័ត៌មាន​ទូរទស្សន៍​អន​ឡាញ​ឈ្មោះ សុវណ្ណ រិទ្ធី ដែល​បាន​ប្រើ​តួនាទី​លើសពី​ដែន​កំណត់​វិជ្ជាជីវៈ​របស់​អ្នកសារព័ត៌មាន​ទៅ​សាកសួរ ក្នុងករណី​ឈ្លោះប្រកែក​រហូតដល់​តឹងសរសៃក ជាមួយ​បុរស​ម្នាក់ ដែល​បាន​ជួយ​យកអាសា​ជនរងគ្រោះ​ក្នុង​គ្រោះថ្នាក់​ចរាចរណ៍​។

​ការកោះហៅ​សាកសួរ​នេះ គឺ​បន្ទាប់ពី​លោក សុវណ្ណ រិទ្ធី បានប្រកែក​តតាំង និង​ចោទប្រកាន់​អ្នកដំណើរ​ម្នាក់ ដែល​ជួយ​យកអាសា​ប្រជាពលរដ្ឋ​ជួប​គ្រោះថ្នាក់​ចរាចរណ៍​រវាង​ម៉ូតូ និង​ម៉ូតូ​កង់​ ៣ កាលពី​យប់​ថ្ងៃទី ​២៣ ខែមករា ឆ្នាំ​ ២០២៣ នៅ​គល់ស្ពាន​ជ្រោយចង្វារ​។

​នៅក្នុង​វីដេអូ​បង្ហោះ​លើ​ហ្វេ​ស​ប៊ុ​ក ដែល​ក្រោយមក​ត្រូវបាន​លុបចោល​នៅពេល​រង​នូវ​ការរិះគន់​យ៉ាងខ្លាំង​ពី​សំណាក់​អ្នកប្រើប្រាស់​បណ្ដាញ​សង្គម បាន​បង្ហាញថា លោក សុវណ្ណ រិទ្ធី បាន​ស្រែក​តឹងសរសៃក​ទៅលើ​បុរស​ម្នាក់ ដែល​បាន​សុខចិត្ត​ទទួលស្គាល់ថា ខ្លួន​មាន​កំហុស ដែល​លើក​ម៉ូតូ ជា​វត្ថុតាង និង​បាន​សំពះសុំទោស​អ្នកសារព័ត៌មាន​ខាងលើ​នេះ​ជាច្រើន​ដង ដោយ​សុំឱ្យ​បញ្ចប់រឿង​ត្រឹម​ការសុំ​ទោស​នេះ​។

​លោក មាស សុ​ភ័​ណ្ឌ អនុរដ្ឋលេខាធិការ និង​ជា​អ្នកនាំពាក្យ​ក្រសួង​ព័ត៌មាន បាន​ប្រាប់ ​ភ្នំពេញ​ ប៉ុស្ដិ៍​ថា​៖ «​ទាក់ទង​នឹង​ករណីនេះ ខ្ញុំ​សូមបញ្ជាក់ថា នៅក្នុង​សប្ដាហ៍​នេះ អគ្គនាយកដ្ឋាន​ព័ត៌មាន និង​សោតទស្សន៍ នៃ​ក្រសួង​ព័ត៌មាន នឹង​អញ្ជើញ​ម្ចាស់​គេហទំព័រ​នេះ​មក​សាកសួរ​ចំពោះ​ករណី [​កំពុងតែ​ផ្ទុះ​ខ្លាំង​នេះ​] ផងដែរ​»​។

​លោក​បន្ដថា​៖ «​កន្លងមក​បងប្អូន​អ្នកសារព័ត៌មាន ដែល​បាន​ចុះបញ្ជី​ស្របច្បាប់ បាន​ចូលរួមចំណែក​បំពេញ​តួនាទី​ភារកិច្ច​យ៉ាងសកម្ម​ក្នុងការ​ផ្សព្វផ្សាយ​ព័ត៌មាន​ដល់​សាធារណជន​។ ប៉ុន្ដែ​នៅក្នុង​នោះ​យើង​ក៏បាន​ឃើញថា បងប្អូន​អ្នកសារព័ត៌មាន​មួយចំនួន​តូច នៅតែ​មិនទាន់​អនុវត្ដ​តួនាទី និង​ភារកិច្ច​បាន​ត្រឹមត្រូវ ហើយ​ការប្រកាន់យក​នូវ​ក្រមសីលធម៌​វិជ្ជាជីវៈ​ក៏​មិនទាន់​ពេញលេញ​ផងដែរ​»​។

​លោក​និយាយថា ការ​អនុវត្ដ និង​បំពេញភារកិច្ច ក៏ដូចជា​ក្រមសីលធម៌​វិជ្ជាជីវៈ​នៅ​ចន្លោះប្រហោង​នេះ បាន​ជះឥទ្ធិពល​ដល់​តម្លៃ និង​សេចក្ដីថ្លៃថ្នូរ​របស់​អ្នកសារព័ត៌មាន​។ ទោះយ៉ាងណា​លោក មាស សុ​ភ័​ណ្ឌ មិនទាន់ បានបញ្ជាក់​ពី​ពេលវេលា​ជាក់លាក់ ក្នុងការ​កោះហៅ​លោក សុវណ្ណ រិទ្ធី ទៅ​សាកសួរ​នៅឡើយ​។​

​នៅពេល ​ភ្នំពេញ ​ប៉ុស្តិ៍​ បាន​ទាក់ទង​សុំ​ធ្វើ​អត្ថាធិប្បាយ​លើ​បញ្ហា​នេះ លោក​ សុវណ្ណ រិទ្ធី បាន​និយាយ​យ៉ាងខ្លី​ថា​៖ «​ខ្ញុំ​សូម​មិន​និយាយ​អ្វី​ទាំងអស់​។ ទុកពេល​ឱ្យ​ខ្ញុំ​នៅ​ម្នាក់ឯង​សិន​»​។

​លោក ស សុខា រដ្ឋលេខាធិការ​ក្រសួង​អប់រំ យុវជន និង​កីឡា​ ​បាន​សរសេរ​នៅលើ​ហ្វេ​ស​ប៊ុ​ក​របស់លោក ដោយ​ភ្ជាប់​ជាមួយ​វីដេអូ​ឃ្លី​ប​ខ្លី នៃ​ឧ​ប្ប​ត្ដិ​ហេតុ​គ្រោះថ្នាក់​ចរាចរណ៍​នោះ ក្នុងនាម​ជា​ពលរដ្ឋ​ម្នាក់​។ ដោយ​មើលឃើញ​ពី​មតិយោបល់​ប្រឆាំង​ច្រើនជាង​ការគាំទ្រ លោក​សុខា បាន​ផ្ដោតលើ​កត្ដា​ ៤ ចំណុច ដែល​ក្ដោប​រួម​ចង់បង្ហាញ​អត្ថន័យ​នៃ​ការចេះ​ជួយ​យកអាសា​គ្នា រវាង​ប្រជាជន​ខ្មែរ ដោយ​ការជួយ​សង្គ្រោះ​ជនរងគ្រោះ​ថ្នាក់​ដោយ​គ្រោះថ្នាក់​ចរាចរណ៍​ជា​អាទិភាព ដែល​មិន​បានគិត​អំពី​ផ្លូវច្បាប់​ក្នុងការ​ទុកឱ្យ​ប៉ូលិស​ចរាចរណ៍​វាស់វែង​សិន​។

​លោក​សរសេរថា​៖ «​ខ្ញុំ​ថា បើ​យើង​បន្ទោស ឬ​ដាក់​កំហុស​លើ​គាត់ [​បុរស​ជួយ​យកអាសា​] ហាក់ដូចជា យើង​នាំគ្នា​បំផុស ឬ​លើកទឹកចិត្ត​ឱ្យ​បោះបង់​វប្បធម៌​ជួយ​យកអាសា​គ្នា​ទៅវិញ​។ ជារួម​ក្នុងស្ថានភាព​នោះ បើសិនជា​យើង​វិញ យើង​ក្ដី មហាជន​ក្ដី​គិត ឬ​មើលឃើញថា ជា​ករណី​ដួល​ដោយ​ខ្លួនឯង ដែល​គួរ​ចុះជួយ​ជាដើម​»​។

​លោក​បាន​បន្ដថា ទោះ​វត្ថុតាង​ត្រូវបាន​យកចេញ​ពី​កន្លែងកើតហេតុ​យ៉ាងណាក៏ដោយ ក៏​ប៉ូលិស​ចរាចរណ៍​នៅមាន​វិធីសាស្ដ្រ​ច្រើន​ទៀត ក្នុង​ការប្រមូល​ភ័ស្ដុតាង​ស្វែងរក​យុត្ដិធម៌​ដល់​ជនរងគ្រោះ​ពិតប្រាកដ​ដែរ​។

លោក​បាន​លើកឡើងថា​៖ «​ក្រៅតែពី​ការវាស់វែង​បាញ់​គំនូស នៅមាន​មធ្យោបាយ​ច្រើន​ទៀត ដែល​អាច​ប្រមូល និង​បង្ហាញ​ភ័ស្ដុតាង​បានដូចជា កាមេរ៉ា​សុវត្ថិភាព​នៅ​កន្លែងកើតហេតុ​បើសិន​ជាមាន ស្លាកស្នាម​នៅ​កន្លែងកើតហេតុ ចម្លើយ​របស់​ភាគី អ្នកឃើញ​ហេតុការណ៍ និង​វីដេអូ ដែល​អ្នក Live បាន​ទៅដល់​មុនគេ​នោះ ដែល​សុទ្ធតែ​អាច​យក​ធ្វើជា​មូលដ្ឋាន​បាន​»​។

​លោក​ សុខា ក៏បាន​បញ្ចេញមតិ​ខ្លះៗ​ជុំវិញ​ការផ្សាយ​ព័ត៌មាន​របស់​អ្នកសារព័ត៌មាន​ថា អ្នកសារព័ត៌មាន​គប្បី​ប្រកាន់យក​តួនាទី ក្រមសីលធម៌​វិជ្ជាជីវៈ​ក្នុងនាម​អ្នកសារព័ត៌មាន​អាជីព​ស្របច្បាប់ ពោលគឺ ផ្ដល់ព័ត៌មាន​ពិត ទាន់​ហេតុការណ៍ និង​តាម​ព្រឹត្តិការណ៍​ជាក់ស្ដែង ដោយ​ពុំ​អាច​ដើរតួ​ជា​សមត្ថកិច្ច ឬ​ឈ្លោះប្រកែក​វែកញែក​តឹងសរសៃក​ជាមួយ​នរណាម្នាក់​នោះឡើយ​។

​ដោយបាន​អាន​សំណេរ​បញ្ចេញមតិ​ចំពោះ​ឧ​ប្ប​ត្ដិ​ហេតុ​រវាង​អ្នកសារព័ត៌មាន​អន​ឡាញ និង​បុរស​ជួយ​លើក​អ្នករងរបួស និង​ម៉ូតូ​ចេញពី​ផ្លូវ លោកនាយក​រដ្ឋមន្ដ្រី ហ៊ុន សែន ក៏បាន​សរសេរ​គាំទ្រ​ដល់​លោក ស សុខា ដោយ​លោក​បាន​ផ្ដោត​សំខាន់​លើ​ការជួយ​មនុស្ស​ជាមុន​ទៅតាម​ទម្លាប់​ប្រពៃណី​ខ្មែរ ដែល​តែងតែ​ជួយ​យកអាសា​គ្នា​។

​លោកនាយក​រដ្ឋមន្ដ្រី បាន​សរសេរ​ដោយ​ប្រើ​គណនី​ហ្វេ​ស​ប៊ុ​ក​ផ្ទាល់ខ្លួន​ថា​៖ «​គាំទ្រ​ការបកស្រាយ និង​ពន្យល់​របស់​ក្មួយ ស សុខា​។ ត្រូវ​ជួយ​គ្នា​ជាមុន ទើប​បញ្ចៀស​បាន​នូវ​បញ្ហា​កាន់តែ​ធំ​។ ខ្ញុំ​សូម​អរគុណ និង​កោតសរសើរ​ចំពោះ​អ្នក​បាន​ជួយ ដែល​នេះ​ជា​វប្បធម៌​ដ៏​ល្អ​នៃ​ជាតិ​សាសន៍​យើង​»​។

​លោក​ មាស សុ​ភ័​ណ្ឌ បន្ដថា ការ​អនុវត្ដ​សកម្មភាព​មួយចំនួន ដែល​ប៉ះពាល់ ឬ​ប្រាសចាក​ពី​ក្រមសីលធម៌​វិជ្ជាជីវៈ ធ្វើឱ្យមាន​ប្រតិកម្ម​ផ្សេងៗ​ពី​សាធារណជន​ឬក៏​ប្រជាពលរដ្ឋ ចំពោះ​អ្នកព័ត៌មាន​នេះ​។ នេះ​ជា​កត្ដា​មួយ​ដែល​អ្នកសារព័ត៌មាន​ទាំងអស់​ត្រូវ​ចៀសវាង ហើយ​ត្រូវ​រំឭក​ដល់​ខ្លួនឯង​ឱ្យ​ជាប់​ជាប្រចាំ​ថា ការ​អនុវត្ដ​តួនាទី និង​ភារកិច្ច​របស់ខ្លួន​ត្រូវគោរព​ទៅតាម​បទដ្ឋាន​គតិយុត្ត ព្រមទាំង​ប្រកាន់​នូវ​ក្រមសីលធម៌​វិជ្ជាជីវៈ​របស់ខ្លួន​កុំ​បំពេញ​តួនាទី​លើសពី​អ្វី​ដែលជា​សិទ្ធិ និង​ការទទួលខុសត្រូវ​ទៅតាម​វិជ្ជាជីវៈ និង​ក្រមសីលធម៌​របស់ខ្លួន​។

​លោក​បន្ថែមថា​៖ «​យើង​ត្រូវ​ការប្រមូល​ព័ត៌មាន​ឱ្យបាន​ច្រើន​ហើយ​នៅក្នុង​សប្ដាហ៍​នេះ​យើង​នឹង​អញ្ជើញ​ម្ចាស់​គេហទំព័រ​នេះ ហើយ​យើង​នឹង​សម្រេច​ថា តើ​នឹងត្រូវ​អនុវត្ដ​វិធានការ​បែបណា​ទៀត ក្រោយ​ការហៅ​សួរនាំ​»​។

​គួរ​បញ្ជាក់ថា កាលពី​ថ្ងៃទី​ ៨ ខែមេសា​ឆ្នាំ ​២០២០ លោក​រដ្ឋមន្ដ្រីក្រសួង​ព័ត៌មាន​ខៀវ កាញារីទ្ធ ធ្លាប់បាន​ដក​អាជ្ញាប័ណ្ណ​គេហទំព័រ​ចំនួន ​៣ របស់លោក​សុវណ្ណ រិទ្ធី​ម្ដង​រួចមកហើយ​ដោយសារតែ​ម្ចាស់​ស្ថាប័ន​សារព័ត៌មាន​រូបនេះ​រង​នូវ​បទ​ចោទ «​ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍​» ដោយ​បង្ហោះ​សារ​របស់​លោកនាយករ​ដ្ឋ​មន្ដ្រី​ថា «​បើ​អ្នករត់ម៉ូតូឌុប​ក្ស័យធន លក់​ម៉ូតូ​ចាយ​សិន​ទៅ​! រដ្ឋាភិបាល​គ្មាន​លទ្ធភាព​ជួយ​នោះទេ​»​។

ករណីនេះ លោក​ សុវណ្ណ រិទ្ធី ត្រូវបាន​តុលាការ​សម្រេច​ផ្ដន្ទាទោស ១៨​ ខែ តែ​តម្រូវឱ្យ​អនុវត្ត​ទោស​ក្នុង​ពន្ធនាគារ ៥ ខែ និង ២៨​ ថ្ងៃ ចំណែក​ទោស​នៅសល់​ត្រូវបាន​ព្យួរ​៕

អត្ថបទគួរចាប់អារម្មណ៍