The Phnom Penh Post Search

Search form

Logo of Phnom Penh Post newspaper Phnom Penh Post - ​ពលរដ្ឋ​ជិត​ ៤ ​ម៉ឺន​នាក់ ​ទទួលផល​ពី​ការដោះមីន​ដោយ​ការចូលរួម​ពី​អង្គការ​ APOPO

​ពលរដ្ឋ​ជិត​ ៤ ​ម៉ឺន​នាក់ ​ទទួលផល​ពី​ការដោះមីន​ដោយ​ការចូលរួម​ពី​អង្គការ​ APOPO

Content image - Phnom Penh Post
លោកលី ធុជ និងមន្ត្ APOPO ពិភាក្សាពីគម្រោងសម្អាតមីននាថ្ងៃទី​​ ២៥ មករា។ រូប ស៊ីម៉ាក់

​ពលរដ្ឋ​ជិត​ ៤ ​ម៉ឺន​នាក់ ​ទទួលផល​ពី​ការដោះមីន​ដោយ​ការចូលរួម​ពី​អង្គការ​ APOPO

ភ្នំពេញៈ ប្រជាពលរដ្ឋ​ជិត​​ ៤ ម៉ឺន​នាក់ បាន​ទទួលផល​វិជ្ជមាន​ពី​សកម្មភាព​ដោះមីន និង​ផ្ទៃដី​ជាង​ ២៣ ​លាន​ម៉ែត្រក្រឡា ត្រូវបាន​រំដោះ​ចេញពី​គ្រាប់មីន និង​សំណល់​ជាតិ​ផ្ទុះ​ពី​សង្គ្រាម តាមរយៈ ការចូលរួម​ពី​អង្គការ APOPO ប្រចាំ​កម្ពុជា​។ នេះ បើតាម​អនុប្រធាន​ទី១ នៃ​អាជ្ញាធរ​មីន​កម្ពុជា លោក ​លី ធុជ នា​ថ្ងៃទី​ ២៥ មករា​។​

​ក្នុងជំនួប​ជាមួយ​លោក Michael Raine ប្រធាន​អង្គការ APOPO ប្រចាំ​កម្ពុជា និង​លោក Charlie Richter នាយក​កៀរគរ​មូលនិធិ​របស់​អង្គការ​ APOPO នៅ​ទីស្នាក់ការ​អាជ្ញាធរ​មីន នា​ថ្ងៃទី​ ២៥ ខែមករា លោក​ទេសរដ្ឋមន្ត្រី លី ធុជ លើកឡើងថា ការចូលរួម​ធ្វើការ​បោសសម្អាត​មីន និង​សំណល់​ជាតិ​ផ្ទុះ​ពី​សង្គ្រាម ពិតជា​ការរួមចំណែក​សំខាន់ ក្នុង​ការជួយ​កាត់បន្ថយ​អត្រា​គ្រោះថ្នាក់​នៅ​កម្ពុជា​។

​លោក​បន្ដថា ក្នុងនាម​រាជរដ្ឋាភិបាល​កម្ពុជា លោក​បាន​វាយតម្លៃ​ខ្ពស់​ចំពោះ​ការចូលរួម​របស់​អង្គការ APOPO ក្នុង​ការងារ​រាវរក​គ្រាប់មីន និង​សំណល់​ជាតិ​ផ្ទុះ​ពី​សង្គ្រាម​នៅ​កម្ពុជា ចាប់តាំងពី​ឆ្នាំ​ ២០១៤​ មក​។ សកម្មភាព​នេះ ពិតជា​បាន​ចូលរួម​ក្នុង​ការរំដោះ​ផ្ទៃដី​ជូន​ដល់​ប្រជាពលរដ្ឋ នៅតាម​មូលដ្ឋាន ដើម្បី​អាច​ប្រកបការងារ​ដោយ​សុវត្ថិភាព​។​

​លោក​បន្ថែមថា បច្ចុប្បន្ន អង្គការ APOPO មាន​បុគ្គលិក​សរុប​ចំនួន ៩៥ ​រូប ដែល​បាន​ប្រតិបត្តិ​ការរាវ រក​មីន និង​គ្រាប់ ដោយ​ប្រើប្រាស់​សត្វ​កណ្តុរ និង​សុនខ នៅ​ខេត្តរតនគិរី ខេត្តព្រះវិហារ ខេត្តសៀមរាប និង​ខេត្តបាត់ដំបង ក្រោម​ភាពជា​ដៃគូ និង​កិច្ចសហប្រតិបត្តិកា​រយ៉ា​ង​ល្អ​ជាមួយ​អង្គភាព​ស៊ីម៉ាក់ និង​អង្គការ MAG​។

​លោក​លី ធុជ បញ្ជាក់ថា​៖ «​គិត​ត្រឹម​ខែធ្នូ ឆ្នាំ​ ២០២២​ កន្លងទៅនេះ អង្គការ APOPO បាន​ចូលរួម​បោសសម្អាត​មីន និង​សំណល់​ជាតិ​ផ្ទុះ​ពី​សង្គ្រាម ក្នុង​ទំហំ​ផ្ទៃដី​ចំនួន ២៣ ០១១ ៥៨៣​ ម៉ែត្រក្រឡា និង​បានផ្តល់​ផលប្រយោជន៍​ដល់​ប្រជាពលរដ្ឋ​ចំនួន​ ៣៨ ០៦៩ ​នាក់ ឬ​ស្មើនឹង​ ៨ ៩២៨ គ្រួសារ​ថែមទៀត​»​។

​បើតាម​ជំនួប​ខាងលើ អង្គការ APOPO គឺជា​អង្គ​ការមិន​រកប្រាក់​ចំណេញ​របស់​ប្រទេស​បែលហ្ស៊ិក និង​ជា​អង្គការ​បោសសម្អាត​មីន​មនុស្សធម៌ ដែល​ទទួលបាន​បណ្ណ ទទួលស្គាល់ និង​អាជ្ញាប័ណ្ណ​ផ្លូវការ ពី​អាជ្ញាធរ​មីន សម្រាប់​អនុវត្ត​ការងារ​បោសសម្អាត​មីន​/​គ្រាប់​ក្នុងប្រទេស​កម្ពុជា​។ ការប្រើប្រាស់​សត្វ​កណ្តុ​រហិត​រក​មីន​/​គ្រាប់ អង្គការ APOPO ជា​អង្គការទី​១ ​ក្នុងប្រទេស​កម្ពុជា ដែល​ប្រើប្រាស់ វិធីសាស្ត្រ​នេះ ដែល​សត្វ​កណ្តុរ​ទាំងនោះ នាំ​មកពី​ប្រទេស​ Tanzania នៃ​ទ្វីប​អាហ្រ្វិក​។

​បន្ថែម​លើ​ការប្រើប្រាស់​សត្វ​កណ្តុរ​ក្នុងការ​ហិត​រក​មីន​/​គ្រាប់ អង្គការ APOPO បាន​ប្រើប្រាស់​សត្វ​សុនខ​ជា​ជំនួយ​ក្នុងការ​ហិត​រក មីន​/​គ្រាប់ ដែលជា​វិធីសាស្ត្រ​ថ្មី​ក្នុងការ​ស្រាវជ្រាវ និង​បោសសម្អាត ដោយ​សហការ​ជាមួយ​អង្គការ MAG និង​មជ្ឈមណ្ឌល​សកម្មភាព​កំចាត់មីន​កម្ពុជា​ ​(CMAC)​។​

​គិត​ចាប់ពី​ឆ្នាំ​ ១៩៩២-២០២១ រយៈពេល​ ២៩ ​ឆ្នាំ​កន្លងមកនេះ ផ្ទៃដី​ទំហំ ២ ៣២៥​ គីឡូម៉ែត្រ​ការ៉េ ត្រូវបាន​បោសសម្អាត សម្រាប់​ប្រើប្រាស់ និង​បង្កបង្កើនផល​។ ក្នុងនោះ វិស័យ​កសិកម្ម ៧១% ហេដ្ឋារចនាសម្ព័ន្ធ ៨% និង​ផ្សេងៗ ២១% រួមមាន​ការសាងសង់​លំនៅឋាន ភូមិក សាលារៀន មណ្ឌល​សុខភាព​ជាដើម ដោយមាន​ប្រជាពលរដ្ឋ​ទទួលផល​ជាង​ ៧​ លាន​នាក់​។

ចំនួន​ជនរងគ្រោះ​បាន​ថយចុះ​ពី ៤ ៣២០​ នាក់​នៅ​ឆ្នាំ​ ១៩៩៦​ មក​ត្រឹម​ ៤៤ ​នាក់​ក្នុង​ឆ្នាំ ​២០២១​។ ដោយ​មើលឃើញថា បញ្ហា​មីន​នៅតែ​ធ្វើឱ្យមាន​អ្នករងគ្រោះ លោកនាយក​រដ្ឋមន្ត្រី​ហ៊ុន សែន បានប្រកាស​ដាក់ ចេញ​នូវ​យុទ្ធសាស្ត្រ​ជាតិ “​កម្ពុ​ជាមួយ​គ្មាន​មីន​ឆ្នាំ​ ២០២៥»​។​

​អាជ្ញាធរ​មីន និង​តំណាង​អង្គការ APOPO ក៏បាន​បង្ហាញ​ក្តី​រំពឹង​ដែរ​ថា តាមរយៈ​ការចូល​ពី​ដៃគូ​ពាក់ព័ន្ធ ពិសេស​ការចូលរួម​ពី​អង្គការ​អន្តរជាតិ នឹង​ជួយ​ព​ន្លឿ​ន​ឱ្យ​សម្រេច យុទ្ធសាស្ត្រ​ជាតិ “​កម្ពុ​ជាមួយ​គ្មាន​មីន នៅ​ឆ្នាំ​ ២០២៥»៕

អត្ថបទគួរចាប់អារម្មណ៍