.jpg)
លោក ប្រាក់ សុខុន ក្នុងជំនួបជាមួយលោក ហាយ៉ាហ្ស៊ី យ៉ូហ្ស៊ីម៉ាសា រដ្ឋមន្ត្រីការបរទេសជប៉ុន កាលពីថ្ងៃទី ២៤ ខែមករា។ រូបថត ក្រសួងការបរទេស
ភ្នំពេញៈ ដើម្បីស្វែងយល់ពីដំណើរការលទ្ធិប្រជាធិបតេយ្យពហុបក្ស នៅប្រទេសជប៉ុន រដ្ឋមន្ត្រីការបរទេសកម្ពុជា និងជប៉ុនបានឯកភាពឱ្យមានការចាប់ផ្ដើមឡើងវិញ នូវកម្មវិធីសម្រាប់អ្នកនយោបាយវ័យក្មេងកម្ពុជា ហើយបានប្តេជ្ញាក្នុងការរក្សាខ្ជាប់ខ្ជួននូវកិច្ចសន្ទនា ស្ដីពីស្ថានភាពសិទ្ធិមនុស្សរវាងប្រទេសទាំង ២។
ការឯកភាពគ្នានេះត្រូវបានធ្វើឡើង ក្នុងអំឡុងទស្សនកិច្ចផ្លូវការរបស់លោកប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ ចាប់ពីថ្ងៃទី ២១ ដល់ទី ២៤ ខែមករា។
ដំណើរទស្សនកិច្ចនេះ ត្រូវបានប្រព្រឹត្តទៅស្របពេលនឹងការប្រារព្ធខួបអនុស្សាវរីយ៍លើកទី ៧០ នៃការបង្កើតទំនាក់ទំនងការទូតរវាងប្រទេសកម្ពុជា និងជប៉ុននៅក្នុងឆ្នាំ ២០២៣ នេះផងដែរ។
សេចក្តីប្រកាសព័ត៌មានក្រសួងការបរទេសកម្ពុជា ចុះថ្ងៃទី ២៤ មករា សរសេរថា៖ «ចំពោះប្រជាធិបតេយ្យនៅកម្ពុជា រដ្ឋមន្ត្រីការបរទេសទាំង ២ បានឯកភាពឱ្យមានការចាប់ផ្ដើម ឡើងវិញនូវកម្មវិធីសម្រាប់អ្នកនយោបាយវ័យក្មេងកម្ពុជា ដែលត្រូវបានខកខានដោយសារជំងឺរាតត្បាតសកល ដើម្បីស្វែងយល់ពីដំណើរការលទ្ធិប្រជាធិបតេយ្យពហុបក្សនៅប្រទេសជប៉ុន និងបានសម្តែងនូវការប្តេជ្ញាក្នុងការរក្សាខ្ជាប់នូវកិច្ចសន្ទនា ស្ដីពីស្ថានភាពសិទ្ធិមនុស្ស ដែលមានស្រាប់ រវាងប្រទេសទាំង២»។
រដ្ឋមន្ត្រីទាំង២ក៏បានសម្តែងនូវការពេញចិត្ត ចំពោះភាពល្អប្រសើរបំផុតដែលពុំធ្លាប់មាននៅក្នុងប្រវត្តិសាស្ត្រនៃទំនាក់ទំនងទ្វេភាគី ដែលត្រូវបានស្ដែងឡើងតាមរយៈការផ្លាស់ប្តូរទស្សនកិច្ចជាន់ខ្ពស់យ៉ាងញឹកញាប់។ ជាពិសេស គឺជំនួបកំពូលទ្វេភាគីចំនួន ៤ លើក រវាងលោកនាយករដ្ឋមន្ត្រីហ៊ុន សែន និងលោក ហ្វូមីអូ គីស៊ីដា នាយករដ្ឋមន្ត្រីជប៉ុន កាលពីឆ្នាំមុន។ លើសពីនោះភាគីទាំង ២ ក៏បានស្វាគមន៍កិច្ចសហប្រតិបត្តិការ និងទំនាក់ទំនងយ៉ាងសកម្មលើវិស័យសន្តិសុខ និងការពារជាតិដែលបានឆ្លុះបញ្ចាំងតាមរយៈការផ្លាស់ប្តូរទស្សនកិច្ច រវាងនាយទាហាននៃប្រទេសទាំង ២ និងការចូលចតរបស់នាវានៃកងកម្លាំងស្វ័យការពារជើងទឹកជប៉ុន (JMSDF) នៅកំពង់ផែស្វយ័តក្រុងព្រះសីហនុកាលពីឆ្នាំមុន។
ក្រសួងក៏បានឱ្យដឹងផងដែរថា រដ្ឋមន្ត្រីទាំង ២ ក៏បានសម្តែងការរីករាយចំពោះការកើនឡើងនៃទំហំពាណិជ្ជកម្មរវាងប្រទេសទាំង ២ ដែលបានឈានទៅជិតដល់កម្រិតមុនវិបត្តិជំងឺកូវីដ ១៩ ព្រមទាំងលំហូរយ៉ាងខ្លាំង នៃវិនិយោគពីប្រទេសជប៉ុនចូលមកកម្ពុជា។ បន្ថែមពីនោះរដ្ឋមន្ត្រីទាំង ២ ក៏បានឯកភាពធ្វើការជិតស្និទ្ធជាមួយគា្ន ក្នុងការលើកកម្ពស់បន្ថែមទៀតនូវកិច្ចសហប្រតិបត្តិការសេដ្ឋកិច្ចដែលកំពុងរីកចម្រើន រួមទាំងការជំរុញឱ្យមានការហោះហើរផ្ទាល់ឡើងវិញរវាងកម្ពុជា និងជប៉ុនផងដែរ។
ក្រសួងការបរទេសបញ្ជាក់ថា៖ «ឯកឧត្ដម ប្រាក់ សុខុន បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនជប៉ុន ដែលបានចូលរួមចំណែកយ៉ាងសំខាន់ ដល់ដំណើរការសន្តិភាព និងការអភិវឌ្ឍសេដ្ឋកិច្ចសង្គមរបស់កម្ពុជា ព្រមទាំងការប្រយុទ្ធប្រឆាំងនឹងជំងឺកូវីដ ១៩ និងក៏បានវាយតម្លៃខ្ពស់ចំពោះការបន្តគាំទ្ររបស់ជប៉ុន ក្នុងការអភិវឌ្ឍកំពង់ផែស្វយ័តក្រុងព្រះសីហនុ និងដើម្បីសម្រេចគោលដៅ«កម្ពុជាគ្មានគ្រាប់មីននៅត្រឹមឆ្នាំ ២០២៥» របស់កម្ពុជា»។
រដ្ឋមន្ត្រីទាំង ២ ក៏បានពិភាក្សាលើកិច្ចសហប្រតិបត្តិការពហុភាគី និងឯកភាពគ្នាពង្រឹងភាពជាដៃគូ និងកិច្ចសហប្រតិបត្តិការបន្ថែមទៀត ពិសេសក្នុងក្របខ័ណ្ឌអង្គការសហប្រជាជាតិ និងក្របខ័ណ្ឌពាក់ព័ន្ធអាស៊ាន។
លើសពីនោះ រដ្ឋមន្ត្រីការបរទេសទាំង ២ ក៏បានផ្លាស់ប្តូរទស្សនៈគ្នាលើបញ្ហានៅក្នុងតំបន់ និងអន្តរជាតិដែលជាកង្វល់រួម ក្នុងនោះរួមមានបញ្ហាសង្គ្រាមនៅអ៊ុយក្រែន និងសភាពការណ៍នៅឧបទ្វីបកូរ៉េ។ លោកប្រាក់ សុខុន ក៏បានបញ្ជាក់សាជាថ្មីពីការគាំទ្រឥតងាករេរបស់កម្ពុជាចំពោះជប៉ុនជាសមាជិកអចិន្រៃ្តយ៍របស់ក្រុមប្រឹក្សាសន្តិសុខអង្គការសហប្រជាជាតិ និងចំពោះកិច្ចខិតខំប្រឹងប្រែងរបស់ជប៉ុន ក្នុងការពន្លឿនឱ្យមានដំណោះស្រាយឆាប់រហ័ស លើបញ្ហាការចាប់ពង្រត់ជនជាតិជប៉ុនដោយកូរ៉េខាងជើង។
លើសពីនេះ លោកឧបនាយករដ្ឋមន្ត្រីក៏បានសម្តែងការគាំទ្ររបស់កម្ពុជាចំពោះគោលការណ៍សំខាន់ ៣ នៃយុទ្ធសាស្ត្រសន្ដិសុខជាតិជប៉ុន (NSS) ដែលផ្តោតលើវិភាគទានប្រកបដោយបុរេសកម្មដើម្បីសន្តិភាព គុណតម្លៃសកល និងសន្តិសហវិជ្ជមាន ព្រមទាំងវិបុលភាពរួមគ្នាជាមួយនឹងបណ្តាប្រទេសដទៃទៀត។
អគ្គលេខាធិការរាជបណ្ឌិត្យសភាកម្ពុជាលោក យង់ ពៅ ថ្លែងថា កម្ពុជា និងជប៉ុន បានដំឡើងកិច្ចសហប្រតិបត្តិការទ្វេភាគីរហូតដល់កម្រិតដៃគូយុទ្ធសាស្ត្រគ្រប់ជ្រុងជ្រោយ គឺជាកិច្ចសហប្រតិបត្តិការដ៏ល្អមួយ ខណៈឆ្នាំនេះកម្ពុជា និងជប៉ុន ក៏បានប្រារព្ធខួប ៧០ ឆ្នាំនៃទំនាក់ទំនងការទូត ស្របពេលភាគីទាំង ២ ក៏ដំឡើងកិច្ចសហប្រតិបត្តិការទៅជាដៃគូយុទ្ធសាស្ត្រគ្រប់ជ្រុងជ្រោយដែលនឹងផ្តល់ផលប្រយោជន៍ដល់ទ្វេភាគី។ «អ៊ីចឹងក្នុងដំណើរទស្សនកិច្ចរបស់ឯកឧត្តមប្រាក់ សុខុនក៏ដូចជាការដំឡើងកិច្ចសហប្រតិបត្តិការយុទ្ធសាស្ត្រ គ្រប់ជ្រុងជ្រោយនេះបានផ្តល់ផលចំណេញទៅវិញទៅមកទាំងនយោបាយ ការទូត សេដ្ឋកិច្ចពាណិជ្ជកម្ម យុទ្ធសាស្ត្រនៅតំបន់ឥណ្ឌូប៉ាស៊ីហ្វិក»៕
