.jpg)
ភ្នំពេញៈ ក្នុងសប្តាហ៍ទី៤ នៃការប្រកាសទ្រព្យសម្បត្តិ និងបំណុលតាមរបប២ឆ្នាំសម្រាប់ឆ្នាំ ២០២៣ អង្គភាពប្រឆាំងអំពើពុករលួយ (ACU) បានទទួលឯកសារពីអ្នកដែលត្រូវប្រកាសទ្រព្យសម្បត្តិ និងបំណុល ចំនួន ២២ ៤៦៩ នាក់ ស្មើនឹង ៩៨ ភាគរយនៃចំនួនអ្នកដែលត្រូវប្រកាសសរុប ដែលមាន ២២ ៨៦៤ នាក់។
ACU បញ្ជាក់ក្នុងហ្វេសប៊ុកនាថ្ងៃទី២៨ ខែមករា ថា៖ «ចាប់ពីម៉ោង ៨ព្រឹក ដល់ ម៉ោង១២ថ្ងៃត្រង់នេះ នាយកដ្ឋានប្រកាសទ្រព្យសម្បត្តិ និងបំណុលបានទទួលឯកសារពីអ្នកជាប់កាតព្វកិច្ចត្រូវប្រកាសទ្រព្យសម្បត្តិ និងបំណុល ចំនួន១៥ រូប ធ្វើឱ្យឯកសារប្រកាសទ្រព្យសម្បត្តិ និងបំណុល បានកើនទៅដល់ ចំនួន២២ ៤៦៩ រូប ស្មើនឹង៩៨,២៧ភាគរយ នៃចំនួនត្រូវប្រកាសសរុប២២ ៨៦៤រូប»។
ACU បញ្ជាក់ថា ក្រុមការងារនៃនាយកដ្ឋានប្រកាសទ្រព្យសម្បត្តិ និងបំណុល នឹងរង់ចាំទទួលឯកសារប្រកាសទ្រព្យសម្បត្តិ និងបំណុល ៧ថ្ងៃក្នុង១សប្ដាហ៍ គិតចាប់ពីថ្ងៃទី១ រហូតដល់ថ្ងៃទី៣១ ខែមករា ឆ្នាំ២០២៣ ដោយមិនឈប់សម្រាកថ្ងៃសៅរ៍ ថ្ងៃអាទិត្យ និងថ្ងៃបុណ្យឡើយពីម៉ោង៨ព្រឹកដល់ម៉ោង៥ល្ងាច៕
