.jpg)
ព្រះសីហនុៈ រដ្ឋបាលក្រុងព្រះសីហនុនឹងកំណត់ជាផ្លូវឯកទិសចរាចរណ៍នៅតាមបណ្ដោយឆ្នេរ ចាប់ពីចំណុចចុងឆ្នេរអូរត្រេះ ២ (ស្ពានអូរត្រជាក់ចិត្ត) រហូតដល់ទីលានសម្តេចតេជោ ដើម្បីសម្រួលចរាចរក្នុងអំឡុងពេលដំណើរការកម្មវិធីរត់បណ្តាក់កម្សាន្ដ។
សេចក្តីជូនដំណឹងរដ្ឋបាលក្រុងព្រះសីហនុ បានឱ្យដឹងនាថ្ងៃទី២៨ ខែមករា ថា ក្រុមហ៊ុនវឌ្ឍនៈប្រ៊ូវើរី ឯ.ក នឹងរៀបចំកម្មវិធីរត់បណ្តាក់កម្សាន្ដ និងការប្រគុំតន្ត្រី ចាប់ពីថ្ងៃទី២៨-២៩ ខែមករា នៅទីលានសម្តេចតេជោ ស្ថិតនៅសង្កាត់លេខ៤ ក្រុងព្រះសីហនុ ខេត្តព្រះសីហនុ។
សេចក្តីជូនដំណឹងបន្តថា កម្មវិធីរត់បណ្តាក់កម្សាន្តនឹងរៀបចំនៅថ្ងៃទី២៩ ខែមករា ចាប់ពីចំណុចរង្វង់មូលព្រះសិវៈ និងព្រះនាងឧមាវតី នៅឃុំរាម ស្រុកព្រៃនប់ រហូតដល់ចំណុចបញ្ចប់នៅទីលានសម្តេចតេជោ។
សេចក្តីជូនដំណឹងបញ្ជាក់ថា៖ «ដើម្បីសម្រួលចរាចរ រក្សាសណ្ដាប់ធ្នាប់របៀបរៀបរយនៅក្នុង អំឡុងពេលដំណើរការកម្មវិធីនេះ រដ្ឋបាលក្រុងព្រះសីហនុនឹងកំណត់ជាផ្លូវឯកទិសចរាចរណ៍នៅតាមបណ្ដោយឆ្នេរ ចាប់ពីចំណុចចុងឆ្នេរអូរត្រេះ២ (ស្ពានអូរត្រជាក់ចិត្ត) រហូតដល់ទីលានសម្តេចតេជោ ក្នុងភូមិសាស្តក្រុងព្រះសីហនុ ចាប់ពីវេលាម៉ោង ៦:០០នាទីព្រឹក រហូតដល់ម៉ោង ១១:០០នាទីព្រឹក»៕
