ភ្នំពេញៈ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ជំរុញឱ្យក្រសួងសាធារណការ និងដឹកជញ្ជូន បន្តខិតខំដោះស្រាយបញ្ហាប្រឈមនិងពន្លឿនការងារមួយចំនួនពាក់ព័ន្ធនឹងការសាងសង់ហេដ្ឋារចនាសម្ព័ន្ធឱ្យឆាប់បានបញ្ចប់តាមការគ្រោងទុក និងត្រូវផ្តល់អាទិភាពលើគុណភាពផ្លូវ ដើម្បីចូលរួមស្តារ និងជំរុញកំណើនសេដ្ឋកិច្ចជាតិឱ្យកាន់តែមានប្រសិទ្ធភាព។
លោក អូន ព័ន្ធមុនីរ័ត្ន បានជំរុញបែបនេះក្នុងពិធីបិទសន្និបាតបូកសរុបលទ្ធផលការងារឆ្នាំ ២០២២ និងលើកទិសដៅការងារឆ្នាំ ២០២៣ របស់ក្រសួងសាធារណការ និងដឹកជញ្ជូន នៅថ្ងៃទី ១៦ កុម្ភៈ ឆ្នាំ ២០២៣។
លោកក៏បានសាទរចំពោះវឌ្ឍនភាពសមិទ្ធផលនានាក្នុងវិស័យសាធារណការ និងដឹកជញ្ជូន ដែលសម្រេចបាននូវសមិទ្ធផលជាច្រើនក្នុងការសាងសង់ហេដ្ឋារចនាសម្ព័ន្ធគ្រប់ប្រភេទ។
ប៉ុន្តែលោកថា៖ «ទោះបីវឌ្ឍនភាពជារួមមានភាពប្រសើរយ៉ាងណាក៏ដោយ លោកបានកត់សម្គាល់ឃើញថា គម្រោងសំខាន់ៗមួយចំនួននៅមិនទាន់អាចសម្រេចបានតាមការគ្រោងទុក ហើយទិសដៅមួយចំនួន ដែលត្រូវបានលើកឡើងក្នុងឆ្នាំកន្លងទៅ ក៏មិនទាន់សម្រេចបានពេញលេញនៅឡើយ»។
ដើម្បីឱ្យការងារសម្រេចបានទៅតាមផែនការ លោកឧបនាយករដ្ឋមន្ត្រី ជំរុញឱ្យក្រសួងសាធារណការ និងដឹកជញ្ជូន បន្តខិតខំដោះស្រាយបញ្ហាប្រឈម និងពន្លឿនការងារមួយចំនួនទៀត ដែលមានសារៈសំខាន់ជាយុទ្ធសាស្ត្រឱ្យបានចប់សព្វគ្រប់ និងទាន់ពេលវេលា ដើម្បីចូលរួមចំណែក ក្នុងការស្តារ និងជំរុញកំណើនសេដ្ឋកិច្ចជាតិឱ្យកាន់តែមានប្រសិទ្ធភាព។
ដើម្បីតម្រង់ទិស និងផ្តល់ជាធាតុចូល ក្នុងការប្រែក្លាយបញ្ហាប្រឈមនានាឱ្យទៅជាកាលានុវត្តភាពតាមរយៈការពន្លឿន ការកែទម្រង់ឱ្យស៊ីជម្រៅ ដើម្បីលើកកម្ពស់បរិយាកាសធុរកិច្ច និងពង្រឹងភាពប្រកួតប្រជែងរបស់កម្ពុជា លោក អូន ព័ន្ធមុនីរ័ត្ន បានផ្តល់អនុសាសន៍មួយចំនួនដល់អង្គសនិ្នបាតនេះ។
ទី១ បន្តជំរុញកិច្ចសហការជិតស្និទ្ធ ជាមួយឧត្តមក្រុមប្រឹក្សាសេដ្ឋកិច្ចជាតិដើម្បីបញ្ចប់ផែនការមេគ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរមធ្យោបាយកម្ពុជា ជំរុញការដឹកជញ្ជូនឆ្លងកាត់ព្រំដែន តាមរយៈការរកដំណោះស្រាយឈ្នះឈ្នះជាមួយប្រទេសជិតខាង ដោះស្រាយបញ្ហាកកស្ទះ និងកែលម្អហេដ្ឋារចនាសម្ព័ន្ធរូបវន្តនៅច្រកទ្វារព្រំដែនអន្តរជាតិ និងជំរុញការពិភាក្សាជាមួយភាគីថៃ និងវៀតណាម ដើម្បីបង្កើនប្រតិបត្តិការច្រកព្រំដែនអន្តរជាតិ។
ទី២ ជំរុញការកសាងគម្រោងហេដ្ឋារចនាសម្ព័ន្ធដែលកំពុងដំណើរការសាងសង់ និងគម្រោងជាអាទិភាព និងទិសដៅនៅក្នុងឆ្នាំ ២០២៣ ដើម្បីបញ្ចប់ឱ្យបានទាន់ពេលតាមផែនការគ្រោងទុក។ ទន្ទឹមនេះលោកគាំទ្រ និងការស្តារផ្លូវជាតិ ផ្លូវខេត្ត និងផ្លូវសំខាន់ៗបន្ថែមទៀត ដើម្បីធ្វើឱ្យការតភ្ជាប់មានភាពប្រទាក់ក្រឡាគ្នា ទាំងក្នុងក្របខ័ណ្ឌផ្ទៃក្នុងប្រទេស និងតំបន់។
លោកថា៖ «បន្ថែមលើនេះក្រសួងក៏ត្រូវផ្តល់អាទិភាពលើគុណភាព នៃការសាងសង់ហេដ្ឋារចនាសម្ព័ន្ធរូបវន្តគ្រប់ប្រភេទក៏ដូចជាគិតគូរដល់ផលប៉ះពាល់ពីការប្រែប្រួលអាកាសធាតុមកលើហេដ្ឋារចនាសម្ព័ន្ធផងដែរ»។
ចំពោះមុខអង្គសន្និបាត លោក អូន ព័ន្ធមុនីរ័ត្ន ស្នើឱ្យក្រសួងសាធារណការ ត្រូវធ្វើការសិក្សាឱ្យបានច្បាស់លាស់ និងគ្រប់ជ្រុងជ្រោយ លើគម្រោងផ្លូវដែកភាគខាងជើងភ្នំពេញប៉ោយប៉ែត ទាំងប្រភេទជាផ្លូវល្បឿនលឿន និងផ្លូវធម្មតា ដើម្បីលើកជាយោបល់គ្រប់ជ្រុងជ្រោយ ជូនរាជរដ្ឋាភិបាលពិនិត្យ និងសម្រេច។
បន្ថែមពីនេះលោកជំរុញឱ្យក្រសួងសាធារណការ សហការជិតស្និទ្ធជាមួយក្រសួងស្ថាប័នពាក់ព័ន្ធក្នុងការកសាង និងអភិវឌ្ឍហេដ្ឋារចនាសម្ព័ន្ធប្រព័ន្ធលូទឹកកខ្វក់ និងទឹកភ្លៀង និងបន្តជំរុញពន្លឿនការរៀបចំ និងអនុម័តច្បាប់ផែនការយុទ្ធសាស្ត្រ និងបទប្បញ្ញត្តិបច្ចេកទេសនានាពាក់ព័ន្ធវិស័យទឹកកខ្វក់រួមទាំងបញ្ចូលកម្រៃទឹកកខ្វក់ជាមួយវិក្កយបត្រទឹកស្អាតដើម្បីគាំទ្រការថែទាំ ការសាងសង់ និងការពង្រីកវិសាលភាពនៃប្រព័ន្ធលូ និងប្រព័ន្ធចម្រោះទឹកកខ្វក់នៅតាមទីក្រុង និងទីប្រជុំជននៃខេត្តគោលដៅសំខាន់ៗ និងតាមតំបន់មាត់សមុទ្រផងដែរ។
លោកថា៖ «នៅលើការអភិវឌ្ឍហេដ្ឋារចនាសម្ព័ន្ធ គម្រោងធំៗជាច្រើន នឹងក្លាយជាកាតាលីករក្នុងការជំរុញពាណិជ្ជកម្មនិងកំណើនសេដ្ឋកិច្ចជារួម»។
នៅក្នុងពិធីបើកសន្និបាតបូកសរុបលទ្ធផលការងារប្រចាំឆ្នាំ ២០២២ និងលើកទិសដៅការងារឆ្នាំ ២០២៣ នេះដែរ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានថ្លែងថា ឆ្នាំ ២០២២ គឺជាឆ្នាំដែលបានសម្ពោធដាក់ឱ្យប្រើប្រាស់ជាផ្លូវការនូវគម្រោងជាច្រើន និងបានបើកការដ្ឋានសាងសង់ ដើម្បីពង្រីក ស្តារ និងពង្រឹងគុណភាពផ្លូវផងដែរ។ ប៉ុន្តែលោកក៏ទទួលស្គាល់ដែរថា ទន្ទឹមនឹងសមិទ្ធផលទាំងនេះ ក៏នៅមានបញ្ហាយឺតយ៉ាវក្នុងការសាងសង់ផងដែរ ខណៈលោកបន្តជំរុញដល់មន្ត្រីពាក់ព័ន្ធ សូមឱ្យពន្លឿនបញ្ចប់ការសាងសង់ទៅតាមការគ្រោងទុក។
លោកថា៖ «ទន្ទឹមនឹងនេះជួបបញ្ហាខ្លះដូចជាផ្លូវជាតិលេខ ២ និងលេខស ២២ ដែលមានការយឺតយ៉ាវ មានបញ្ហានឹងគុណភាព ដូច្នេះខ្ញុំសង្ឃឹមថា ថ្នាក់ដឹកនាំ ដូចជាមន្ត្រីពាក់ព័ន្ធ នឹងខិតខំប្រឹងប្រែងពិនិត្យជំរុញឱ្យការសាងសង់ផ្លូវជាតិលេខ ២ និង ២២ នេះ ឱ្យបានចប់ជាស្ថាពរ ដើម្បីយើងសម្ពោធដាក់ឱ្យប្រើប្រាស់ជាផ្លូវការក្នុងឆ្នាំនេះ»៕