.jpg)
សៀមរាបៈ ក្រុមគ្រូពេទ្យវេជ្ជសាស្ត្រចិនបុរាណចំនួន ១៦ នាក់ បានចុះមកព្យាបាលជំងឺ ជូនពលរដ្ឋខ្មែរចំនួនជាង ១ ម៉ឺននាក់ ដោយឥតគិតថ្លៃ ដើម្បីលើកកម្ពស់ការថែរក្សាសុខភាព និងចូលរួមកាត់បន្ថយចំណាយក្នុងការព្យាបាលជំងឺ។
មន្ទីរព័ត៌មានខេត្តសៀមរាបបានដកស្រង់សម្ដីលោក លីវ ជីជៀ (Liu Zhi Jie) អគ្គកុងស៊ុលចិនប្រចាំខេត្តសៀមរាប ថា៖ «ក្រុមគ្រូពេទ្យវេជ្ជសាស្ត្រចិនបុរាណ ដែលមានអ្នកជំនាញចំនួន ១៦នាក់ មកពីទីក្រុងប៉េកាំង នៃប្រទេសចិន ឯកទេសជំនាញ ផ្នែកជំងឺផ្លូវដង្ហើម ផ្នែកជំងឺសសៃឈាមបេះដូង ផ្នែកជំងឺប្រព័ន្ធរំលាយអាហារជាដើមបានរៀបចំកម្មវិធីពិនិត្យសុខភាព និងព្យាបាលជំងឺដោយឥតគិតថ្លៃ ជូនដល់ប្រជាពលរដ្ឋកម្ពុជាបានចំនួន ៨១ដង ដែលមានអ្នកមកទទួលការព្យាបាលជំងឺបានចំនួន១២ ០០០នាក់ដោយឥតគិតថ្លៃ»។
ហ្វេសប៊ុកមន្ទីរព័ត៌មានខេត្តសៀមរាបបានឱ្យដឹងនាថ្ងៃទី១០ ខែមីនា ថា ក្រុមគ្រូពេទ្យវេជ្ជសាស្ត្រចិនបុរាណ និងមន្ទីរសុខាភិបាលខេត្តសៀមរាប នាថ្ងៃទី៩ ខែមីនា បានរៀបចំពិនិត្យព្យាបាលជំងឺជូនពលរដ្ឋក្នុងខេត្តសៀមរាបដោយឥតគិតថ្លៃ រយៈពេលពេញ១ថ្ងៃ ចំនួនប្រមាណជាង ២០០នាក់ ដែលមកពីសង្កាត់ស្វាយដង្គំ ក្រុងសៀមរាប។
លោក អ៊ាប ប៊ុនលឿន អនុប្រធានមន្ទីរសុខាភិបាលខេត្តសៀមរាប ថ្លែងក្នុងកម្មវិធីពិនិត្យព្យាបាលជំងឺថា ដោយមានកិច្ចសហប្រតិបត្តិការល្អរវាងប្រទេសកម្ពុជា និងចិន ពិសេសទំនាក់ទំនងសហប្រតិបត្តិការជាមួយរដ្ឋបាលខេត្តសៀមរាប ក៏ដូចជាមន្ទីរសុខាភិបាលខេត្ត មន្ទីរពេទ្យខេត្ត ដោយកន្លងមកបានរៀបចំកម្មវិធីមនុស្សធម៌ ក្នុងការពិគ្រោះព្យាបាលជំងឺដោយឥតគិតថ្លៃ។
លោកត្រូវបានស្រង់សម្ដីដោយមន្ទីរព័ត៌មានខេត្តសៀមរាបថា ជាក់ស្ដែងថ្ងៃនេះ កុងស៊ុលចិនប្រចាំខេត្តសៀមរាប បាននាំយកមកនូវឧបករណ៍បរិក្ខារពេទ្យ ថ្នាំពេទ្យ គ្រូពេទ្យឯកទេសជំនាញមកជួយព្យាបាល ជូនប្រជាពលរដ្ឋក្នុងសង្កាត់ស្វាយដង្គំ។
លោក អ៊ាប ប៊ុនលឿន បានថ្លែងអំណរគុណដល់ក្រុមគ្រូពេទ្យ ចិននិងខ្មែរ ដែលបានចំណាយពេលវេលា និងកម្លាំងកាយចិត្តក្នុងការព្យាបាលជំងឺដោយឥតគិតថ្លៃជូនដល់ប្រជាពលរដ្ឋ៕
