ភ្នំពេញៈ កម្ពុជា ត្រូវបានការិយាល័យអង្គការ UNODC អញ្ជើញឱ្យចូលរួមក្នុងកិច្ចប្រជុំដែលជាព្រឹត្តិការណ៍អម (Mekong MOU side event) ជាមួយប្រទេសសមាជិកចំនួន ៥ ផ្សេងទៀតក្នុងនោះមាន ចិន ឡាវ សហភាព មីយ៉ាន់ម៉ា ថៃ និងវៀតណាម ក្រោមប្រធានបទ «៣០ ឆ្នាំនៃកិច្ចសហប្រតិបត្តិការត្រួតពិនិត្យគ្រឿងញៀននៅតំបន់ទន្លេមេគង្គ៖ ការដកស្រង់បទពិសោធន៍, មេរៀនដែលបានឆ្លងកាត់, និងកិច្ចសហប្រតិបត្តិការនាពេលអនាគត»។
កិច្ចប្រជុំនេះ ត្រូវបានធ្វើឡើង ចាប់តាំងពីថ្ងៃទី១៣ ដល់ថ្ងៃទី១៧មីនា នៅទីក្រុងវីយ៉ែន ប្រទេសអូទ្រីស។
បើតាមអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន ដែលបានចាត់បញ្ជូន កញ្ញា វរសេនីយ៍ទោ ស៊ិន សុខពន្លឺ អនុប្រធាននាយកដ្ឋានសហប្រតិបត្តិការអន្តរជាតិ ទៅចូលរួមក្នុងកិច្ចប្រជុំកំពូលអន្តរជាតិស្តីពីគ្រឿងញៀននេះ បានឱ្យដឹងថា នេះគឺជាកិច្ចប្រជុំដោយផ្ទាល់លើកទី១ បន្ទាប់ពីវិបត្តិកូវីដ១៩។
កិច្ចប្រជុំនេះ ធ្វើឡើងក្នុងគោលបំណងត្រួតពិនិត្យអំពីស្ថានភាពវិវត្តយ៉ាងឆាប់រហ័សនៃគ្រឿងញៀននៅកម្រិតតំបន់ និងអន្តរជាតិបន្ទាប់ពីវិបត្តិកូវីដ១៩ បញ្ហាប្រឈម និងរិះរកវិធានការឆ្លើយតបដែលមានប្រសិទ្ធភាព ព្រមទាំងលើកកម្ពស់យន្តការសហប្រតិបត្តិការអន្តរជាតិ សំដៅទប់ស្កាត់និងបង្ក្រាបការផលិត និងការចរាចរគ្រឿងញៀន និងសារធាតុគីមីផ្សំខុសច្បាប់៕