.jpg)
មន្ត្រីជំនាញពាក់ព័ន្ធនៅក្នុងសិក្ខាសាលា ស្តីពីការប្រើប្រាស់ពលកម្មដោយបង្ខំ។ រូបថត ក្រសួងពាណិជ្ជកម្ម
ភ្នំពេញៈ ក្រសួងពាណិជ្ជកម្ម កាលពីថ្ងៃទី១៦ មីនា បានបើកសិក្ខាសាលាផ្សព្វផ្សាយអំពីបទប្បញ្ញត្តិជាតិ និងអន្តរជាតិ ទាក់ទងនឹងការប្រើប្រាស់ពលកម្មដោយបង្ខំ ដើម្បីចៀសវាងការអនុវត្តខុសនាំឱ្យមានការផាកពិន័យ, ជាប់ទោសទណ្ឌ និងបង្កផលប៉ះពាល់ដល់កិត្តិនាមកម្ពុជា។
សិក្ខាសាលានេះ មានការចូលរួមពីមន្ត្រីជំនាញមកពីក្រសួងពាក់ព័ន្ធ តំណាងរោងចក្រ-សហគ្រាស ដែលជាសមាជិក នៃសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC), សមាគមស្បែកជើងកម្ពុជា, សមាគមផលិតផលធ្វើដំណើរ និងស្បែកឈើនៅកម្ពុជា, និងសមាគមកាបូប ស្បែកជើង និងអេឡិចត្រូនិកកម្ពុជា សរុបចំនួន ៨០ នាក់។
លោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្ម និងជាប្រធានគណៈកម្មការគ្រប់គ្រងកិច្ចសន្យាជួល ផលិតបន្ត ក្នុងឧស្សាហកម្មកាត់ដេរសម្លៀកបំពាក់ វាយនភណ្ឌ និងស្បែកជើង បានជម្រាបជូនអ្នកចូលរួមពីគោលបំណងនៃសិក្ខាសាលានេះថា គឺដើម្បីផ្សព្វផ្សាយឱ្យបានទូលំទូលាយនូវបទប្បញ្ញត្តិជាតិ និងអន្តរជាតិ ទាក់ទងនឹងការហាមឃាត់ នូវការប្រើប្រាស់ពលកម្មដោយបង្ខំ សំដៅចៀសវាងការអនុវត្តខុស នាំឱ្យមានការផាកពិន័យ, ជាប់ទោសទណ្ឌ, និងបង្កផលប៉ះពាល់ដល់កិត្តិនាមកម្ពុជា។
បើតាមក្រសួងពាណិជ្ជកម្ម កម្ពុជាធ្លាប់ត្រូវបានអន្តរជាតិទទួលស្គាល់ថា ផលិតនាំចេញពីកម្ពុជា បានផ្សារភ្ជាប់ជាមួយស្តង់ដាការងារល្អប្រសើរ ថែមទាំងបានគោរពទៅតាមច្បាប់កំណត់របស់អង្គការពាណិជ្ជកម្មអន្តរជាតិ (WTO) អង្គការអន្តរជាតិខាងការងារ (ILO) និងច្បាប់ការងាររបស់កម្ពុជា ផងដែរ។
លោក សុខ សុភ័ក្ត្រ បានគូសបញ្ជាក់ អំពីទិដ្ឋភាពច្បាប់ជាតិ និងច្បាប់អន្តរជាតិ ដូចជា អនុសញ្ញាលេខ ២៩ ស្តីពីការងារដោយបង្ខំ របស់អង្គការអន្តរជាតិខាងការងារ កិច្ចព្រមព្រៀងទូទៅស្តីពីពាណិជ្ជកម្មនិងពន្ធគយ របស់អង្គការពាណិជ្ជកម្មពិភពលោក ដែលកម្ពុជាបានផ្តល់សច្ចាប័ននៅក្នុងឆ្នាំ២០០៤។
ច្បាប់ស្តីពីការងារ នៃព្រះរាជាណាចក្រកម្ពុជា និងប្រកាសអន្តរក្រសួង អន្តរស្ថាប័ន ចុះថ្ងៃទី១៩ ខែមីនា ឆ្នាំ២០១២ ស្តីពីការហាមឃាត់ការប្រើប្រាស់ពលកម្មជនជាប់ឃុំក្នុងពន្ធនាគារ ដើម្បីផលិតទំនិញនាំចេញជាដើម។
ក្រសួងពាណិជ្ជកម្មបានឱ្យដឹងថា ក្នុងឆ្នាំ២០២២ កម្ពុជា បាននាំចេញទៅកាន់ទីផ្សារសហរដ្ឋអាមេរិកមានប្រមាណ ៨ ៩៦៩ លានដុល្លារអាមេរិក, ទីផ្សារសហភាពអឺរ៉ុបមានប្រមាណ៤ ០៤៥ លានដុល្លារអាមេរិក, និងទីផ្សារជប៉ុនមានប្រមាណ ១ ១៧៣ លានដុល្លារ និងទៅបណ្តាទីផ្សារដទៃទៀត ផងដែរ។
ហេតុនេះកម្ពុជាមិនអាចបណ្តែតបណ្តោយឱ្យមានការលួចផលិតនូវមុខទំនិញដោយប្រើពលកម្មដោយបង្ខំ នោះឡើយ៕
