.jpg)
ប្រធានាធិបតីនៃប្រទេសអ៊ុយក្រែន លោក វ៉ូឡូឌីមៀ ហែលលិនស្គី (ស្ដាំ) និងលោកនាយករដ្ឋមន្ត្រី ហ៊ុន សែន។
ភ្នំពេញៈ ក្នុងជំនួបជាមួយតាមទូរស័ព្ទជាមួយលោក វ៉ូឡូឌីមៀ ហែលលិនស្គី ប្រធានាធិបតីនៃប្រទេសអ៊ុយក្រែន នៅថ្ងៃទី ២៩ ខែឧសភា នៅទីក្រុងភ្នំពេញ លោកនាយករដ្ឋមន្ត្រីហ៊ុន សែន បានស្វាគមន៍និងអបអរសាទរការចូលជាភាគីនៃសន្ធិសញ្ញាមិត្តភាព និងកិច្ចសហប្រតិបត្តិការនៅអាស៊ីអាគ្នេយ៍ (TAC) របស់ប្រទេសអ៊ុយក្រែន។
សេចក្តីប្រកាសព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិបានឱ្យដឹងថា ជំនួបរវាងមេដឹកនាំទាំង២នេះ ធ្វើឡើងតបតាមសំណើរបស់ លោក វ៉ូឡូឌីមៀ ហែលលិនស្គី (VOLODYMYR ZELENSKYY)។ ក្នុងនោះ ជាកិច្ចចាប់ផ្តើម លោកប្រធានាធិបតីអ៊ុយក្រែនបានរំឭកសាជាថ្មី និងថ្លែងអំណរអរគុណចំពោះកម្ពុជាដែលបានគាំទ្រ និងបានចូលជាសហស្ថាបនិកសេចក្តីសម្រេចចិត្តរបស់មហាសន្និបាតអង្គការសហប្រជាតិ និងជំហររបស់កម្ពុជាពាក់ព័ន្ធនឹងសង្គ្រាមអ៊ុយក្រែន។
លោកប្រធានាធិបតីក៏បានថ្លែងអំណរគុណចំពោះជំនួយមនុស្សធម៌របស់កម្ពុជាក្នុងការបណ្តុះបណ្តាល អ្នកដោះមីនរបស់អ៊ុយក្រែន កាលពីខែមករា ឆ្នាំ ២០២៣ កន្លងទៅផងដែរ។ ជាមួយគ្នានោះ លោកបានកោតសរសើរចំពោះជោគជ័យរបស់កម្ពុជា ក្នុងនាមជាប្រធានអាស៊ាននៅឆ្នាំ ២០២២ ដែលបានអនុញ្ញាតឱ្យមានការចុះហត្ថលេខារបស់អ៊ុយក្រែនលើលិខិតូបករណ៍ចូលជាភាគីនៃសន្ធិសញ្ញាមិត្តភាព និងកិច្ចសហប្រតិបត្តិការនៅអាស៊ីអាគ្នេយ៍ (TAC) នៅរាជធានីភ្នំពេញ និងការគាំទ្ររបស់កម្ពុជាចំពោះសំណើរបស់អ៊ុយក្រែនសុំចូលជាដៃគូសន្ទនាតាមវិស័យរបស់អាស៊ាន។
លោកនាយកដ្ឋមន្ត្រី ហ៊ុន សែន បានសម្តែងក្ដីសោមនស្សរីករាយដែលបានជួបសន្ទនាតាមប្រព័ន្ធទូរស័ព្ទជាលើកទី២ ជាមួយ លោក វ៉ូឡូឌីមៀ ហ្វែលលិនស្គី ប្រធានាធិបតីអ៊ុយក្រែន។ជំនួបនេះលោកនាយករដ្ឋមន្ត្រីកម្ពុជាបានសង្កត់ធ្ងន់អំពីសារៈសំខាន់នៃការស្វែងរកកិច្ចសន្ទនាតាមមធ្យោបាយជាក់ស្ដែងដើម្បីបញ្ចប់សង្គ្រាម និងទុក្ខវេទនារបស់ប្រជាជនអ៊ុយក្រែន។
លោក ហ៊ុន សែន បានបញ្ជាក់ថា ពីគោលជំហរជាគោលការណ៍របស់កម្ពុជាចំពោះមុខសង្គ្រាមនៅអ៊ុយក្រែនថា៖ «កម្ពុជាគោរព និងប្រកាន់ខ្ជាប់យ៉ាងម៉ឺងម៉ាត់ធម្មនុញ្ញអង្គការសហប្រជាជាតិ និងច្បាប់អន្ដរជាតិ»។ ជាមួយគ្នានោះលោកក៏បានបញ្ជាក់សាជាថ្មីពីការបន្តគាំទ្រសំណើរបស់អ៊ុយក្រែនចូលជាដៃគូសន្ទនាតាមវិស័យរបស់អាស៊ានផងដែរ ។
លោកប្រធានាធិបតីនៃប្រទេសអ៊ុយក្រែន បានថ្លែងអំណរគុណជូននាយករដ្ឋមន្ត្រីកម្ពុជាចំពោះជំនួបតាមទូរសព្ទ័ដ៏រាក់ទាក់នេះ ហើយបានសម្តែងអំណរសាទរយ៉ាងកក់ក្ដៅជូនចំពោះ រាជរដ្ឋាភិបាល និងប្រជាជនកម្ពុជា និងបានជូនពររាជរដ្ឋាភិបាល និងប្រជាជនកម្ពុជា ទទួលបានសន្តិភាព និងវិបុលភាពជានិរន្តរ៍៕
