លោក សោម ពិសិដ្ឋ នៅក្នុងកិច្ចប្រជុំកាលពីថ្ងៃទី២៩ ឧសភា ។ រូបថត រដ្ឋបាលខេត្ដកែប
កែបៈ ខេត្តកែបនឹងប្រកាសបញ្ចប់ទាំងស្រុងនូវការបន្ទោបង់ពាសវាលពាសកាល (ODF) ត្រឹមពាក់កណ្តាលខែមិថុនាខាងមុខ ខណៈពេលនេះខ្នងផ្ទះប្រជាពលរដ្ឋនៅទូទាំងខេត្តនេះមានបង្គន់ប្រើប្រាស់រហូតដល់ ៩៨ ភាគរយហើយ។
មន្ទីរព័ត៌មានខេត្តកែបបានឱ្យដឹងនៅថ្ងៃទី២៩ ខែឧសភាថា គិតត្រឹមខែឧសភា ឆ្នាំ២០២៣ ខេត្តកែបនៅមានខ្នងផ្ទះពលរដ្ឋចំនួន១៩៨ខ្នងផ្ទះទៀតដែលគ្មានបង្គន់សម្រាប់ប្រើប្រាស់ឬស្មើនឹង២%ខណ:ខ្នងផ្ទះប្រជាពលរដ្ឋដែលមានបង្គន់ប្រើប្រាស់រហូត៩៨%ទូទាំងខេត្ត។តាមផែនការត្រឹមពាក់កណ្តាលខែមិថុនាខាងមុខខេត្តកែបនឹងបញ្ចប់ទាំងស្រុងនូវការបន្ទោបង់ពាសវាលពាសកាល។
ប្រភពដដែលបានឱ្យដឹងទៀតថា មន្ត្រីជាន់ខ្ពស់នៃក្រសួងអភិវឌ្ឍន៍ជនបទ បានបើកកិច្ចប្រជុំពិនិត្យតាមដានស្តីពីលទ្ធផលនៃការជំរុញស្ថានភាពបញ្ចប់ការបន្ទោបង់ពាសវាលពាសកាលនៅខេត្តកែបនេះផងដែរ។
តាមរយៈមន្ទីរព័ត៌មានខេត្តកែប លោក ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជនបទបានលើកឡើងក្នុងកិច្ចប្រជុំថា ដោយមានការជំរុញពីថ្នាក់ដឹកនាំនៃក្រសួងអភិវឌ្ឍន៍ជនបទ និងថ្នាក់ដឹកនាំខេត្ត នឹងខិតខំគ្រប់មធ្យោបាយឱ្យខ្នងផ្ទះដែលនៅខ្វះបង្គន់ទាំងអស់មានបង្គន់ប្រើប្រាស់១០០%ដើម្បីឈានទៅសម្រេចគោលដៅដែលដាក់ខេត្តកែបជាខេត្តលេខរៀងទី៦ ក្នុងការបញ្ចប់ការបន្ទោបង់ពាសវាលពាសកាលក្នុងឆ្នាំ២០២៣នេះ។
ជុំវិញរឿងនេះ លោក សោម ពិសិដ្ឋ អភិបាលខេត្តកែបបានឱ្យដឹងនៅថ្ងៃទី៣១ ខែឧសភាថា ការបញ្ចប់ទាំងស្រុងនូវការបន្ទោបង់ពាសវាលពាសកាលទូទាំងខេត្តនេះ មានសារៈសំខាន់ខ្លាំងណាស់ ព្រោះខេត្តកែបជាខេត្តគោលដៅទេសចរណ៍ដែលមានតំបន់សមុទ្រដ៏ស្រស់ស្អាត។
លោកបន្តថា ខេត្តនេះក៏ត្រូវបានរាជរដ្ឋាភិបាលកំណត់ជាខេត្តគោលដៅទេសចរណ៍ល្អប្រណីតកម្រិតខ្ពស់ផងដែរ ហេតុនេះទាមទារឱ្យអាជ្ញាធរខេត្តត្រូវមានការរៀបចំសម្បទាទេសចរណ៍ឱ្យបានសមស្របផងដែរ។
លោកសោម ពិសិដ្ឋ បានថ្លែងថា៖«ការបញ្ចប់ការបន្ទោបង់ពាសវាលពាសកាលនេះ ក៏ជះឥទ្ធិពលដល់សេដ្ឋកិច្ចសង្គមនៅមូលដ្ឋាន ក្នុងការធ្វើឱ្យប្រជាពលរដ្ឋហូបស្អាត ផឹកស្អាត និងមានការរស់នៅស្អាត។ ដូច្នេះបានជាយើងខិតខំបញ្ចប់ឱ្យបានទៅលើសហគមន៍ ភូមិ ផ្ទះយើងស្អាត នាំឱ្យឃុំយើងស្អាត ស្រុកយើងស្អាត ខេត្តយើងស្អាតដែលធ្វើប្រជាពលរដ្ឋយើងរស់នៅដោយមានភាពអនាម័យល្អ សុខភាពល្អ។
លោកបានបន្តថា ក្រៅពីប្រជាពលរដ្ឋទទួលបានអនាម័យល្អហើយ ពួកគាត់ក៏ចៀសឆ្ងាយពីជំងឺផ្សេងៗផងដែរ ហេតុនេះការបញ្ចប់ការបន្ទោបង់ពាសវាលពាសកាលនេះ មានឥទ្ធិពលផ្នែកសេដ្ឋកិច្ចផង និងផ្នែកសុខុមាលប្រជាពលរដ្ឋផង។
បើតាមលោកសោម ពិសិដ្ឋ គិតមកទល់ពេលនេះក្នុងចំណោម១៨ភូមិទូទាំងខេត្តកែប អាជ្ញាធរខេត្តបានសម្រេចចំនួនខ្នងផ្ទះដែលមានបង្គន់សម្រាប់ប្រើប្រាស់ប្រមាណ៩៨ភាគរយក្នុងនោះមានតែ២ឬ៣ភូមិប៉ុណ្ណោះ ដែលនៅមិនទាន់មានបង្គន់ប្រើប្រាស់។
លោកបានបញ្ជាក់ថា៖ «ទោះបីជាយ៉ាងណាក៏ដោយ រដ្ឋបាលខេត្តនឹងសហការយ៉ាងយកចិត្តទុកដាក់ដើម្បីឈានទៅប្រកាសខេត្តកែបក្លាយជាខេត្តបញ្ចប់ការបន្ទោបង់ពាសវាលពាសកាលនៅក្នុងអាណត្តិទី៦នេះ»។
យោងតាមរបាយការណ៍ក្រសួងអភិវឌ្ឍន៍ជនបទ បានរកឃើញថា ខេត្តកែប ដែលខ្នងផ្ទះគ្មានបង្គន់ទាំង១៩៨ខ្នងផ្ទះនេះចែកជា៣ប្រភេទក្នុងនោះប្រភេទទី១មាន១៥ខ្នងផ្ទះជាគ្រួសារមានលទ្ធភាពតែមិនព្រមសាងសង់,ប្រភេទទី២មាន៧៦ខ្នងផ្ទះជាគ្រួសារខ្វះលទ្ធភាព(ក្រីក្រ) និងប្រភេទទី៣ មាន៨៥ខ្នងផ្ទះស្ថិតក្នុងតំបន់មិនរៀបរយ៕
